Read La Bible en Sango courant – Mbeti ti Nzapa Ezekiel 2 Bible Online

Ezekiel 2 - La Bible en Sango courant – Mbeti ti Nzapa bible

Ezekiel 2

¹Go ni atene na mbi: “*Molenge ti zo, londo, mo luti na nduzu, ngbanga ti so mbi ye ti tene tënë na mo.”

²Gi so tënë ni angba ngbango na yanga ti lo, yingo ti Nzapa ali na ya ti mbi, asara si mbi luti na nduzu. Tongaso mbi ma lo so ayeke tene tënë na mbi so.

³Lo tene na mbi, lo tene: “Molenge ti zo, mbi yeke tokua mo na azo ti Israel, azo ti ngangu li so atomboka na tere ti mbi so. Ala na akotara ti ala ake mbi ngbii asi laso.

⁴Azo ti Israel ayeke azo ti ngangu li mingi, be ti ala akpengba mingi. Mbi yeke tokua mo ti tene na ala, mo tene: ‘Tënë so Kota Gbia NZAPA atene ayeke so.’

⁵Tongaso, ataa ala ma mo, ataa ala ma mo pepe — ala yeke ti ala azo ti mara ti ngangu li — fade ala yeke hinga atene, mbeni wayanga-Nzapa ayeke na popo ti ala.

⁶“Ti mo, molenge ti zo, sara mbeto ti ala pepe, sara mbeto ti tënë ti yanga ti ala pepe. Azo ni ayeke dekite na mo mingi; ye ni ayeke duti, mo baa mo tene, mo yeke na popo ti aki wala mo duti na ndö ti akparakongo. Me mo sara mbeto ti tënë ti yanga ti ala pepe, tere ti mo ado na le ti ala pepe. Biani, ala yeke azo ti mara ti ngangu li.

⁷Fade mo yeke tene na ala atënë ti mbi, ataa ala ma mo, ataa ala ma mo pepe; azo ni ayeke azo ti ngangu li.

⁸“Ti mo, molenge ti zo, mo ma tënë so mbi yeke tene na mo. Mo sara ngangu li tongana ti azo ti mara ti ngangu li so pepe. Mo zi yanga ti mo, mo te ye so mbi yeke mu na mo.”

⁹Mbi baa ndo: mbi baa mbeni maboko so a yoro ni na mbage ti mbi. Maboko ni agbu mbeni mbeti so a rule ni rulengo.

¹⁰Maboko ni azi ya ti mbeti ni na le ti mbi. A su mbeti na le ti *rulo ni na ya ni nga na peko ni kue. Abia ti demango tere, atënë ti toto na ti dema laa a su na le ni.