Read La Bible en Sango courant – Mbeti ti Nzapa Ezekiel 20 Bible Online

Ezekiel 20 - La Bible en Sango courant – Mbeti ti Nzapa bible

Ezekiel 20

¹Na ngu mbarambara ni, na lango baleoko ti nze oku ni, na peko ti so a gbu azo ti Israel na ngangu si a gue na ala na kodro wande, ambeni *kangba ti Israel aga aduti na dawa ti mbi ti hunda *KOTA GBIA na nda ti tënë ti ala.

²Tongaso, tënë ti KOTA GBIA asi na mbi, atene:

³“*Molenge ti zo, mo tene na akangba ti Israel, mo tene: Tënë so Kota Gbia NZAPA atene ayeke so: ‘Ala ga ti hunda mbi na nda ti tënë ti ala? Fini ti mbi! Mbi yeke zia lege na ala pepe titene ala hunda mbi na tënë! So tënë ti yanga ti Kota Gbia NZAPA laa.’

⁴“Molenge ti zo, mo ye biani ti fâ ngbanga na li ti ala? Alingbi mo fa na ala ti hinga asioni ye so akotara ti ala asara ando si zo alingbi ti baa na le ti lo fani use pepe so.

⁵Mo tene na ala, mo tene: Tënë so Kota Gbia NZAPA atene ayeke so: Na lango so mbi soro Israel, mbi yoro maboko ti mbi na nduzu, mbi deba yanga ti mbi na *ahale ti sewa ti Jacob. Mbi sara si ala hinga mbi na sese ti Ezipte; mbi yoro maboko ti mbi na nduzu, mbi deba yanga ti mbi na ala, mbi tene: ‘Mbi yeke KOTA GBIA, Nzapa ti ala.’

⁶Na lango ni so, mbi yoro maboko ti mbi na nduzu, mbi deba yanga ti mbi na ala, mbi tene: fade mbi yeke sara si ala sigigi na sese ti Ezipte ti gue na mbeni kodro so mbi *bembe ni ando ndali ti ala; kodro ni ayeke pendere ahon akodro kue, *kodro so ngu ti me ti bagara na mafuta ti wotoro asi singo daa.

⁷Mbi mu yanga so na ala, mbi tene: ‘Alingbi zo oko oko abi yongoro afungo yanda so ayeke gboto lo. Ala ga *sioni pepe na lege ti vorongo ayanda ti Ezipte! Mbi laa mbi yeke KOTA GBIA, Nzapa ti ala.’

⁸“Me akotara ti ala ni atomboka na tere ti mbi, ala ye ti ma mbi pepe. Afungo yanda so ayeke gboto ala, zo oko abi ni yongoro pepe; zo oko azia ayanda ti Ezipte pepe. Tongaso mbi tene na be ti mbi: Fade mbi yeke tuku ngonzo ti mbi ti wâ na ndö ti ala taa na Ezipte; mbi yeke tuku ngonzo ni na ndö ti ala ngbii be ti mbi ade si.

⁹Mbi sara tongaso ti bata nengo ti mbi si iri ti mbi abuba pepe na le ti amara nde so akotara ti ala alango ando na popo ti ala. Biani, na le ti amara ni so laa mbi sara si ala hinga mbi, na lege so mbi sara si azo ti Israel asigigi na Ezipte.

¹⁰Tongaso mbi sara si ala sigigi na sese ti Ezipte si mbi gue na ala na benyama.

¹¹Mbi mu na ala andia ti mbi, mbi sara si ala hinga lege ti sarango ye so mbi fa; zo so asara ye alingbi na ni, lo yeke duti na fini.

¹²Mbi mu nga na ala *lango ti wungo tere ti ga mbeni ye ti fa atene, songo ayeke na popo ti mbi na ala si ala hinga atene, mbi laa mbi yeke KOTA GBIA so mbi zia ala nde ndali ti mbi.

¹³Me na benyama, azo ti Israel atomboka na tere ti mbi; ala sara ye alingbi na andia ti mbi pepe nga na lege ti asarango ye so mbi fa na ala. Andaa aye ni ayeke sara titene zo aduti na fini tongana lo sara ye alingbi na ni. Ala sara si lango ti wungo tere aga sioni ahon ndoni. Tongaso mbi tene: Mbi yeke kiri ti tuku ngonzo ti mbi ti wâ na ndö ti ala na benyama si mbi yeke fâ ala ti hunzi ala.

¹⁴Mbi sara ye ni ti bata nengo ti mbi si iri ti mbi abuba pepe na le ti amara nde so abaa mbi na ngoi so mbi sara si azo ti Israel asigigi na sese ti Ezipte.

¹⁵Na benyama, mbi yoro lani maboko ti mbi na nduzu, mbi deba yanga ti mbi, mbi tene: kodro so mbi mu na ala si ayeke pendere ahon akodro kue, kodro so ngu ti me ti bagara na mafuta ti wotoro asi singo daa so, mbi yeke gue na ala na ya ni pepe.

¹⁶Mbi deba yanga ti mbi na ala, ngbanga ti so aye so mbi fa na ala, ala baa ni tongana mbumbuse ye, ala sara ye alingbi na andia ti mbi pepe, ala sara si lango ti wungo tere aga sioni. Biani, be ti ala angba gi na ndö ti ayanda ti ala.

¹⁷Me mbi baa mawa ti ala mingi, mbi fâ ala pepe si mbi hunzi ala na benyama pepe.”

¹⁸“Na benyama, mbi tene na amolenge ti akotara ti ala, mbi tene: ‘Ala sara ye alingbi na andia ti ababâ ti ala pepe, ala mu peko ti asarango ye ti ala pepe, ala ga *sioni pepe na lege ti vorongo ayanda ti ala.

¹⁹Mbi laa mbi yeke *KOTA GBIA, Nzapa ti ala! Ala sara ye na lege ti andia nga na lege ti asarango ye so mbi fa; ala sara ye alingbi na ni.

²⁰Ala zia *lango ti wungo tere nde ndali ti mbi; lango ni afa songo so ayeke na popo ti mbi na ala, tongaso si ala hinga atene, mbi laa mbi yeke KOTA GBIA, Nzapa ti ala.’

²¹Me amolenge ti ala ni atomboka na tere ti mbi. Ala sara ye alingbi na andia ti mbi pepe, ala sara ye pepe na lege ti asarango ye so mbi fa; ala sara ye alingbi na ni pepe. Andaa zo ayeke duti na fini tongana lo sara ye alingbi na aye ni so. Ala sara si lango ti wungo tere aga sioni. Tongaso mbi tene: Na benyama, fade mbi yeke tuku ngonzo ti mbi ti wâ na ndö ti ala ngbii be ti mbi ade si.

²²Me mbi kiri na maboko ti mbi; mbi sara ye ni ti bata nengo ti mbi si iri ti mbi abuba pepe na le ti amara nde so lani abaa mbi na ngoi so mbi sara si akotara ti ala asigigi na Ezipte so.

²³Na benyama, mbi kiri mbi yoro maboko ti mbi na nduzu, mbi deba yanga ti mbi na ala, mbi tene: fade mbi yeke kangbi ala na popo ti amara, mbi yeke kangbi ala na ya ti akodro wande.

²⁴Mbi deba yanga ti mbi na ala, ngbanga ti so ala sara ye pepe alingbi na lege ti asarango ye so mbi fa, ala baa andia ti mbi tongana mbumbuse ye, ala sara si lango ti wungo tere aga sioni, le ti ala angba gi na peko ti ayanda ti ababâ ti ala.

²⁵Mbi nga laa mbi mu na ala andia so ayeke nzoni pepe nga na lege ti asarango ye so mbi fa si ayeke sara titene zo aduti na fini pepe.

²⁶Mbi zia ala titene ala ga *sioni na lege ti akozo molenge ti ala so ala yeke gbi na wâ ti mu na *sandaga. Mbi sara tongaso titene ala baa pasi si ala hinga atene, mbi laa mbi yeke KOTA GBIA.”

²⁷“Ndani laa, *molenge ti zo, mo tene na azo ti Israel, mo tene: Tënë so *KOTA GBIA atene ayeke so: Akotara ti ala akiri azonga mbi na lege so ala bata be ti ala na mbi pepe.

²⁸Mbi sara si ala li na kodro so mbi yoro lani maboko ti mbi na nduzu, mbi deba yanga ti mbi ti mu na ala. Na ya ti kodro ni, le ti ala agi ndo so akete hoto kue ayeke daa nga na akeke so gba ti akugbe ayeke daa. Kâ laa, ala mu asandaga ti ala, ala mu amatabisi ti ala ti gingo na yanga ti mbi, ala mu asandaga so fion ni afun nzoni nga na sandaga ti samba.

²⁹Tongaso, mbi hunda ala, mbi tene: ‘Ndo so ayeke na nduzu si ala yeke gue daa so ayeke nyen?’ Ala di iri ti ndo ni ‘ndo so ayeke na nduzu’, ngbii asi laso.

³⁰Ndani laa, mo tene na azo ti Israel, mo tene: Tënë so Kota Gbia NZAPA atene ayeke so: Ye ni nyen! Ala ga *sioni tongana akotara ti ala, ala sara ye ti ndumba na vorongo ayanda ti ala so zo alingbi ti baa na le ti lo fani use pepe so!

³¹Ti fadeso, ala ngba ti ga *sioni na lege ti amatabisi ti ala, na lege ti amolenge ti ala so ala yeke gbi na wâ ti mu na sandaga na ayanda. Ala azo ti Israel, na sarango ye tongaso, fade mbi yeke yeda titene ala ga ti hunda mbi na mbeni tënë? Fini ti mbi! So tënë ti yanga ti mbi, Kota Gbia NZAPA laa. Fade mbi yeke yeda pepe titene ala hunda mbi na mbeni tënë!

³²Ala yeke tene na be ti ala: ‘E ye ti ga tongana ambeni mara, tongana akete mara ti ambeni kodro, e ye ti voro keke na têne’. Me ye so ayeke si pepe.

³³Fini ti mbi! So tënë ti yanga ti mbi, Kota Gbia NZAPA laa: mbi yeke ga na tere ti ala na lege ti ngangu ti maboko ti mbi, maboko ti mbi so mbi yoro, na lege ti ngonzo ti mbi ti wâ so mbi yeke tuku na ndö ti ala; lege so mbi yeke le-gbia na ndö ti ala laa.

³⁴Na lege ti ngangu ti maboko ti mbi nga na lege ti maboko ti mbi so mbi yoro, na lege ti ngonzo ti mbi ti wâ so mbi tuku na ndö ti ala, mbi yeke sara si ala sigigi na popo ti amara ni; mbi yeke mu ala na ya ti akodro so ala kangbi lani daa ti bongbi ala na ndo oko.

³⁵Fade mbi yeke gue na ala na benyama ti amara ni. Kâ, le na le, mbi yeke fâ ngbanga na ndö ti ala.

³⁶Fade mbi yeke fâ ngbanga na ndö ti ala tongana ti so mbi fâ ando na ndö ti akotara ti ala na benyama ti Ezipte. So tënë ti yanga ti Kota Gbia NZAPA laa.

³⁷Fade mbi yeke sara si ala hon na gbe ti keke ti wabatango-taba si mbi yeke li na ala na ya ti *mbuki so akanga mbi na ala.

³⁸Azo so atomboka na tere ti mbi na azo so ake ti ma yanga ti mbi, fade mbi yeke zi ala na popo ti ala, azo ti Israel. Mbi yeke sara si ala sigigi na ya ti akodro so ala duti daa tongana awande, me ala yeke li na sese ti Israel pepe. Tongaso, fade azo ni ayeke hinga atene, mbi laa mbi yeke KOTA GBIA.

³⁹Ti ala, azo ti Israel, tënë so mbi Kota Gbia NZAPA, mbi tene ayeke so: Ayeke nzoni zo oko oko ague, avoro ayanda ti lo ma! Me na pekoni, e yeke baa wala ala yeke ngba ti ke yanga ti mbi. Tongaso, iri ti mbi so ayeke nde si ayeke nzoni kue, ala yeke kiri ti sara si aga sioni pepe na lege ti amatabisi ti ala nga na lege ti vorongo ayanda ti ala.

⁴⁰Biani, na ndö ti hoto ti mbi so ayeke nde si ayeke nzoni kue, na ndö ti yongoro hoto ti Israel laa azo ti Israel so kue ayeke na ya ti kodro ni ayeke voro mbi. So tënë ti yanga ti mbi, Kota Gbia NZAPA laa. Kâ, mbi yeke yamba ala na nzoni be, mbi yeke yeda na aye so kue ala zia nde ndali ti mbi, amatabisi ti ala nga na asandaga ti anzoni ye so ala yeke ya na mbi.

⁴¹Na peko ti so mbi yeke sara si ala sigigi na popo ti amara si mbi yeke mu ala na ya ti akodro so ala kangbi lani daa ti bongbi ala na ndo oko, mbi yeke yamba ala na nzoni be tongana sandaga so fion ni afun nzoni. Na lege ti ala, fade mbi yeke fa na le ti amara nde so mbi yeke nde si mbi yeke nzoni kue.

⁴²Fade mbi yeke mu ala, mbi kiri na ala na sese ti Israel, sese so mbi yoro maboko ti mbi na nduzu, mbi deba yanga ti mbi ti mu na akotara ti ala. Tongaso, fade ala yeke hinga atene, mbi laa mbi yeke KOTA GBIA.

⁴³Kâ, ala yeke dabe ti ala na sioni lege ti dutingo ti ala ti kozoni nga na asarango ye ti ala so asara si ala ga *sioni so. Fade be ti ala ayeke londo ndali ti asioni ye so kue ala sara.

⁴⁴Ala azo ti Israel, fade mbi yeke baa ndo na sioni lege ti dutingo ti ala pepe nga na asioni sarango ye ti ala pepe. Me mbi yeke sara na ala ndali ti nengo ti iri ti mbi. Tongaso, fade ala yeke hinga atene, mbi laa mbi yeke KOTA GBIA. So tënë ti yanga ti Kota Gbia NZAPA laa.”