Read La Bible en Sango courant – Mbeti ti Nzapa Ezekiel 26 Bible Online

Ezekiel 26 - La Bible en Sango courant – Mbeti ti Nzapa bible

Ezekiel 26

¹Na ngu baleoko na oko ni, na kozo lango ti nze ni so a gbu azo, a gue na ala na kodro wande, tënë ti *KOTA GBIA asi na mbi, atene:

²“*Molenge ti zo, ndali ti so azo ti gbata ti Tir ahe Jérusalem, atene: ‘Huuu! Huuu, ti lo ahunzi awe, gbata so lani azo kue ayeke hon daa so! Fadeso, ngoi ti e alingbi awe titene e wara gba ti mosoro, ngbanga ti so lo ti biani awe!’

³Ndali ti tënë so, tënë so mbi Kota Gbia NZAPA, mbi tene ayeke so: Mo Tir, mbi yeke ga na tere ti mo! Mbi yeke pusu gba ti amara nde ti tiri bira na mo; ala yeke tuku na ndö ti mo tongana ti so kota ngu-ingo ayeke sara si *amapo alondo.

⁴Azo ni ayeke kungbi na sese agbagba ti bira ti mo, ala yeke kinda na sese ada ti mo so ayo na nduzu; mbi yeke balee afuku ti sese ni, mbi yeke sara titene kota têne so ayeke na gbe ti gbata ni, ndö ni angba senge.

⁵Na be ti kota ngu-ingo, fade Tir ayeke ga ndo so azo ti gingo susu ayeke gbara agbanda ti ala daa titene ahole. Biani, mbi Kota Gbia NZAPA, mbi tene tënë awe. So tënë ti yanga ti mbi, Kota Gbia NZAPA laa. Fade amara nde ayeke ga ti nzi aye ti gbata ni kue.

⁶Ala yeke buba agbata so ayeke nduru na ni, na yanga ti kota ngu-ingo. Tongaso, fade azo ayeke hinga atene, mbi laa mbi yeke KOTA GBIA.

⁷“Biani, tënë so mbi Kota Gbia NZAPA, mbi tene ayeke so: Mbi yeke sara titene Nabukodonosor, gbia ti Babilone, kota gbia ti agbia alondo na mbage ti Banga ti ga na tere ti mo, gbata ti Tir. Lo yeke ga na ambarata, apusu ti mbarata, azo ti kpengo na mbarata nga na aturugu gbani gbani.

⁸Lo yeke buba agbata so ayeke nduru na mo, na yanga ti kota ngu-ingo. Na pekoni, lo yeke koro du na gbe ti sese na tere ti mo kue, lo yeke bongbi sese aga *koto na tere ti mo si lo yeke mu gba ti *avala ti kanga lege na ale ti kokora ti mo.

⁹Lo yeke mu amasini ti bira ti lo ti kpo na agbagba ti mo, lo yeke mu angbongboro wen ti kungbi na ada ti mo so ayo na nduzu so.

¹⁰Fade fuku ti sese ayeke mu tere ti mo kue ndali ti hongo ti gba ti ambarata ti lo; agbagba ti mo ayeke yingi ndali ti toto ti gere ti ambarata na ti apusu ti mbarata. Ala yeke hon na yanga ti gbagba ti mo ti li na ya ti gbata ni tongana ti so zo ayeke li na ya ti gbata na peko ti so a koro du na ya ti gbagba ni.

¹¹Ambarata ti lo ayeke do alege ti mo kue na sokoto ti ala. Lo yeke fâ azo ti mo na yongoro zeme si lo yeke tuku na sese angbongboro têne so mo leke si aluti na nduzu so.

¹²Azo ni ayeke nzi amosoro ti mo, ala yeke gbu akungba ti mo ti ngere ti hon na ni. Ala yeke kungbi na sese agbagba ti mo si ala yeke buba apendere kota da ti mo; ala yeke mu atêne ti da ni, akeke ni nga na afuku ti sese ni si ala yeke tuku ni na ya ti ngu.

¹³Mbi yeke kai abia ti mo; zo ayeke kiri ti ma go ti akundi ti mo pepe.

¹⁴Mbi yeke sara titene ndö ti kota têne ti mo angba senge; mo yeke ga ndo so azo ti gingo susu ayeke gbara agbanda ti ala daa titene ahole; a yeke kiri ti leke mo pepe. Biani, mbi KOTA GBIA, mbi tene tënë awe. So tënë ti yanga ti Kota Gbia NZAPA laa.

¹⁵“Tënë so mbi Kota Gbia NZAPA, mbi tene na gbata ti Tir ayeke so: A yeke buba mo, a yeke fâ azo so kue ayeke na ndo ti mo si azo so awara ka ayeke dema. Na ndembe so azo so alango yongoro na ya ti azoa ayeke ma tënë ni, ala yeke do na mbeto.

¹⁶Amakonzi ti azo so alango na yanga ti kota ngu-ingo ayeke londo na ndö ti ambata ti ala, ala yeke zi akota bongo ti ala, ala yeke zi apendere bongo ti ala. Mbeto ayeke hon ndö ti ala si ala yeke duti na sese. Tere ti ala ayeke do na mbeto lakue, ye ayeke hon ndö ti ala ndali ti mo.

¹⁷Ala yeke he bia ti totongo kuâ so na ndö ti mo, atene: ‘Ae! Tir, a buba mo awe! Mo, kota gbata so iri ti mo awu lani mingi so! Mo girisa na le ti kota ngu-ingo awe! Mo gbata so ngangu ti mo, na ngangu ti azo ti mo ayeke na le ti kota ngu-ingo; gbata so lani ayeke zia mbeto na be ti azo kue.

¹⁸Fadeso, azo ti yanga ti ngu ayeke do na mbeto ndali ti tingo ti mo; azo so alango yongoro na ya ti azoa, mbeto ahon ndö ti ala, ngbanga ti so, ti mo ahunzi awe.’

¹⁹“Biani, tënë so mbi Kota Gbia NZAPA, mbi tene ayeke so: Mbi yeke sara titene mo ga tongana agbata so a buba ni kue awe, so zo oko ayeke lango daa mbeni pepe. Mbi yeke sara titene gba ti ngu alondo na gbe ti kota ngu-ingo aga amene mo.

²⁰Fade mbi yeke sara titene mo zu na ndo ti akuâ, na mbage ti azo so akui ando awe so, ti duti na gbe ti sese kâ. Mo yeke ga tongana angbene kodro so ati awe, mo yeke duti na popo ti azo so ayeke na ya ti du ti kuâ. Tongaso si mbeni zo ayeke kiri ti lango na ndo ti mo pepe; mbi yeke sara titene sese ti azo so angba na fini aduti pendere.

²¹Mbi yeke sara titene tere ti azo kue ado na mbeto ndali ti mo, ngbanga ti so mo yeke daa mbeni pepe. Azo ayeke gi mo, me zo oko ayeke wara mo laoko pepe. So tënë ti yanga Kota Gbia NZAPA laa.”