Read La Bible en Sango courant – Mbeti ti Nzapa Ezekiel 28 Bible Online

Ezekiel 28 - La Bible en Sango courant – Mbeti ti Nzapa bible

Ezekiel 28

¹Tënë ti *KOTA GBIA asi na mbi, atene:

²“*Molenge ti zo, tene na makonzi ti Tir, mo tene: Tënë so Kota Gbia NZAPA atene ayeke so: Be ti mo asuku na baba si mo tene: ‘Mbi yeke nzapa, mbi duti na ndö ti mbata ti gbia na popo ti anzapa na be ti kota ngu-ingo.’ Mo tene na be ti mo, mo tene, mo lingbi na nzapa, andaa mo yeke gi senge zo, mo yeke nzapa pepe.

³Mo baa ti mo, mo tene, mo yeke na ndara, mo hon Daniel; mbeni tënë ti gbe mingo ti honde na le ti mo ayeke daa pepe.

⁴Na lege ti ndara ti mo na mayere ti mo, mo wara gba ti mosoro; mo bongbi lôro na wen ti nginza na ya ti kubu ti da so mo bata amosoro ti mo daa.

⁵Na lege ti kota mayere ti mo na ya ti dengo buze, mo kiri mo wara gba ti mosoro ahon ndoni. Tongaso, be ti mo asuku na baba.

⁶“Ndani laa, tënë so mbi Kota Gbia NZAPA, mbi tene ayeke so: Ndali ti so mo tene na be ti mo, mo tene, mo lingbi na nzapa,

⁷mbi yeke sara titene awande aga na tere ti mo, awande so ayeke sara sioni na zo ahon amara kue. Fade ala yeke buba aye so mo wara na lege ti pendere ndara ti mo; ala yeke bi nengo ti mo na sese.

⁸Ala yeke sara titene mo zu na ya ti du ti kuâ, mo yeke kui kuâ ti ngangu na be ti kota ngu-ingo.

⁹Na dawa ti zo so ayeke fâ ande mo, mo lingbi ti tene: ‘Mbi yeke nzapa’? Andaa na gbe ti maboko ti azo so ayeke fâ mo so, mo yeke gi senge zo, mo yeke nzapa lawa!

¹⁰Mo yeke kui tongana mbo, tongana ti azo so afâ *ganza pepe; awande laa ayeke fâ mo. Biani, mbi tene tënë awe; so tënë ti yanga ti Kota Gbia NZAPA laa.”

¹¹Tënë ti KOTA GBIA asi na mbi, atene:

¹²“Molenge ti zo, mo he mbeni bia ti totongo kuâ na ndö ti gbia ti Tir. Mo tene na lo, mo tene: Tënë so Kota Gbia NZAPA atene ayeke so: ‘Mo yeke lani tapande ti azo so alingbi kue, mo yeke lani na ndara mingi, pendere ti mo alingbi kue.

¹³Mo yeke lango na Eden, yaka ti Nzapa; atêne ti ngangu ngere ndenge na ndenge akanga tere ti mo: rubis, topaze na diaman, krizolite, kornaline na zaspe, safir, grena na emerode. Aye ti pendere so mo yeke yu, a sara ni na lôro, a leke ni gi na lango so a sara mo.

¹⁴Mo *sheruben so mo yeke bata zo, mo so mo yoro *kpangi ti mo yongoro na nduzu, mbi zia lani mo na ndö ti hoto ti mbi so ayeke nde si ayeke nzoni kue; mo yeke tambula na popo ti atêne so ale ti wâ ayeke sigigi daa.

¹⁵Sarango ye ti mo alingbi kue, ato nda ni na lango so a sara mo ngbii asi na lango so a wara ye ti sioni na ndo ti mo.

¹⁶Dengo buze ti mo so ague na nduzu apusu mo ti sara ngangu na azo, mo sara siokpari. Nilaa mbi tumba mo na ndö ti hoto ti mbi si mbi zia mo na popo ti asenge zo. Mo sheruben so mo yeke bata zo, mbi yeke tumba mo titene mo londo na popo ti atêne so ale ti wâ ayeke sigigi daa.

¹⁷Be ti mo asuku na baba ndali ti pendere ti mo; mo zia lege na anzoni ye so mo wara ti buba ndara ti mo. Ndani laa, mbi bi mo na sese, mbi zia mo titene mo ga ye ti ngia na le ti agbia.

¹⁸Na lege ti dengo buze ti mo so ayeke na legeni pepe, na lege ti asiokpari mingi so mo sara, mo sara si ando so mo zia nde ndali ti anzapa ti mo aga sioni. Ndani laa, mbi yeke sara titene mbeni wâ asigigi na ya ti gbata ti mo ti gbi mo kue. Mbi yeke sara titene mo ga mburu ti wâ na le ti azo so ayeke baa mo.

¹⁹Amara so kue ahinga mo, fade li ti ala kue ayeke kpe ndali ti mo, mo yeke ga ye ti ziango mbeto na be ti azo; ti mo ahunzi biani biani awe!’ ”

²⁰Tënë ti *KOTA GBIA asi na mbi, atene:

²¹“*Molenge ti zo, baa ndo na mbage ti gbata ti Sidon si mo tene peko ti tënë ti mbi na tere ti gbata ni.

²²Mo tene na lo, mo tene: Tënë so Kota Gbia NZAPA atene ayeke so: Mo Sidon, mbi yeke ga na tere ti mo! Mbi yeke sara titene azo ane mbi na ya ti gbata ni. Fade azo kue ayeke hinga atene, mbi laa mbi yeke KOTA GBIA na ndembe so mbi yeke fâ ngbanga na li ti lo; mbi yeke fa so mbi yeke Nzapa so mbi yeke nde si mbi yeke nzoni kue.

²³Mbi yeke tokua na tere ti mo sioni kobela ti bubango kodro, mene ayeke sua na ndö ti alege ti mo. Azo ayeke tiri bira na mo mbage na mbage si azo ti mo mingi ayeke kui na ya ti gbata ni. Tongaso, fade azo ayeke hinga atene, mbi laa mbi yeke KOTA GBIA.”

²⁴“Fade amara nde so alango nduru na azo ti Israel ayeke kiri ti baa ala tongana mbumbuse ye pepe. Amara ni ayeke kiri ti duti tongana akeke ti ki ti kpo azo ti Israel pepe, ti suru ala na ka pepe. Tongaso, fade azo ayeke hinga atene, mbi laa mbi yeke KOTA GBIA.

²⁵“Tënë so mbi Kota Gbia NZAPA, mbi tene ayeke so: Lani, mbi sara si azo ti Israel akangbi na popo ti amara; fade mbi yeke mu ala na popo ti amara ni, ti bongbi ala na ndo oko. Na lege ti azo ti Israel, mbi yeke fa na le ti amara nde so mbi yeke Nzapa so mbi yeke nde si mbi yeke nzoni kue. Fade azo ti Israel ayeke duti na sese ti ala, sese so mbi mu ando na Jacob, zo ti kua ti mbi.

²⁶Kâ, ala yeke duti na siriri, ala yeke sara ada, ala yeke fâ ayaka ti *vinye; ala yeke duti na siriri na ndembe so mbi yeke fâ ngbanga na li ti azo so ayeke baa azo ti Israel ni tongana mbumbuse ye. Fade ala yeke hinga atene, mbi laa mbi yeke KOTA GBIA, Nzapa ti ala.”