Read La Bible en Sango courant – Mbeti ti Nzapa Ezekiel 29 Bible Online

Ezekiel 29 - La Bible en Sango courant – Mbeti ti Nzapa bible

Ezekiel 29

¹Na lango baleoko na use ti nze baleoko ti ngu baleoko ni, tënë ti *KOTA GBIA asi na mbi, atene:

²“*Molenge ti zo, baa ndo na mbage ti Faraon, gbia ti Ezipte, mo tene peko ti tënë ti yanga ti mbi na tere ti lo nga na tere ti Ezipte kue.

³Mo tene na lo: Tënë so Kota Gbia NZAPA atene ayeke so: Mbi yeke ga na tere ti mo, Faraon, gbia ti Ezipte. Mo yeke tongana kota sioni nyama so akpa ngunde si alango na ya ti angu ti Nil. Mo tene: ‘Ngu ti Nil ayeke ti mbi; mbi wani laa mbi sara ni.’

⁴Fade mbi yeke yoro *kongi na ngbangba ti mo; mbi yeke kanga asusu ti angu ti mo ni na tere ti *ahali ti mo; mbi yeke gboto mo na ya ti angu ni ti sigigi na mo, mo na asusu kue ti angu ti mo so a kanga ala na tere ti ahali ti mo so.

⁵Mbi yeke bi mo na asusu ni kue na benyama. Mo yeke kui na ndö ti sese, zo oko ti mu kuâ ti mo ayeke daa pepe, zo oko ti lu mo ayeke daa pepe. Mbi yeke sara titene mo ga kobe ti anyama ti sese na ti andeke ti nduzu.

⁶Tongaso, fade azo ti Ezipte kue ayeke hinga atene, mbi laa mbi yeke KOTA GBIA. “Ezipte, mo yeke tongana sosongo so zo agbu ti luti daa, andaa sosongo ni awoko wokongo.

⁷Azo so agbu mo na ya ti maboko ti ala, mo fâ si mo suru ndö ti maboko ti ala kue na ka; azo so agbu mo ti luti na ndö ti mo, mo fâ si mo sara titene be ti ala awoko kue.

⁸Ndani laa, tënë so mbi Kota Gbia NZAPA, mbi tene ayeke so: Mbi yeke sara titene bira aga na ndö ti mo, mbi yeke hunzi azo na anyama ti kodro ti mo kue.

⁹Fade Ezipte ayeke buba kue si ayeke ga benyama. Tongaso, fade azo ayeke hinga atene, mbi laa mbi yeke KOTA GBIA. “Mo tene: ‘Ngu ti Nil ayeke ti mbi; mbi laa mbi sara ni.’

¹⁰Ndani laa, mbi yeke ga na tere ti mo nga na tere ti angu ti Nil ti mo. Mbi yeke sara titene Ezipte abuba kue si aga benyama, ti londo na Migdol ngbii asi na gbata ti Asuan, ngbii asi na katikati ti Etiopii.

¹¹Gere ti zo oko ayeke kiri ti do ndo ni pepe; gere ti nyama oko ayeke kiri ti do ndo ni pepe. Na ya ti ngu baleosio, ye oko ayeke duti kâ pepe.

¹²Mbi yeke sara titene Ezipte aga benyama ahon akodro so kue aga benyama. Agbata ti lo ayeke ga benyama ahon agbata so kue abuba; ye ni ayeke duti tongaso na ya ti ngu baleosio. Mbi yeke kangbi azo ti Ezipte na popo ti amara nde, mbi yeke kangbi ala kirikiri na ya ti akodro wande.

¹³“Biani, tënë so mbi Kota Gbia NZAPA, mbi tene ayeke so: Na peko ti ngu baleosio ni, mbi yeke mu azo ti Ezipte na popo ti amara so a kangbi ala lani daa ti bongbi ala na ndo oko.

¹⁴Mbi yeke sara si dutingo ti azo ti Ezipte aga tongana ti kozo; mbi yeke sara si ala kiri na Patros, taa kodro ti ala. Kâ, ala yeke sara mbeni kodro-gbia so ayeke gi kete.

¹⁵Kodro ni ayeke duti kete ahon akodro-gbia kue, kodro ni ayeke kiri ti duti na ndö ti amara nde pepe. Mbi yeke kiri na wungo ti azo ti kodro ni na gbeni, tongaso si ala kiri ti sara komandema na ndö ti amara nde pepe.

¹⁶Fade azo ti Israel ayeke kiri ti zia be ti ala na ndö ti kodro ni pepe ti duti na siriri. Ala yeke kiri ti sara siokpari pepe na lege so ala yeke hunda na azo ti Ezipte ti mu na ala maboko. Tongaso, fade azo ayeke hinga atene, mbi laa mbi yeke KOTA GBIA.”

¹⁷Na kozo lango ti kozo nze ti ngu baleuse na mbarambara ni, tënë ti *KOTA GBIA asi na mbi, atene:

¹⁸“*Molenge ti zo, baa, Nabukodonosor, gbia ti Babilone agbu aturugu ti lo na ngangu ti sara angangu kua na tere ti gbata ti Tir. A kpaka kua ti li ti aturugu ti lo kue, ndö ti maboko ti ala kue asuru na ka. Me gbia ni, lo na aturugu ti lo awara futa pepe ndali ti akua so ala sara na tere ti Tir.

¹⁹Ndani laa, tënë so mbi Kota Gbia NZAPA, mbi tene ayeke so: Mbi yeke zia Ezipte na maboko ti Nabukodonosor, gbia ti Babilone. Lo yeke nzi aye ti kodro ni kue, lo yeke ro aye so kodro ni agbu na peko ti bira ti hon na ni, lo yeke mu amosoro kue ti kodro ni si lo yeke kangbi ni na aturugu ti lo tongana futa ti ala.

²⁰Ndali ti angangu kua so lo sara, mbi yeke mu na lo Ezipte tongana futa ti lo, ngbanga ti so lo na aturugu ti lo, ala sara kua ndali ti mbi. So tënë ti yanga ti Kota Gbia NZAPA laa.

²¹“Na lango ni so, mbi yeke kiri ti mu ngangu na azo ti Israel. Ti mo Ezekiel, mbi yeke mu na mo ngangu ti sara tënë na ala. Tongaso, fade ala yeke hinga atene, mbi laa mbi yeke KOTA GBIA.”