Read La Bible en Sango courant – Mbeti ti Nzapa Ezekiel 30 Bible Online

Ezekiel 30 - La Bible en Sango courant – Mbeti ti Nzapa bible

Ezekiel 30

¹Tënë ti *KOTA GBIA asi na mbi, atene:

²“*Molenge ti zo, tene tënë na iri ti mbi, mo tene: Tënë so Kota Gbia NZAPA atene ayeke so: Ala dema tere ti ala ndali ti lango ti mawa ni!

³Biani, lango ni ayeke ga, *lango ti KOTA GBIA aga nduru awe; lango ni ayeke duti lango so mbinda asara si ndo avuko vukongo. So ngoi ndali ti amara nde laa.

⁴Bira ayeke ga na ndö ti Ezipte; azo ayeke do na mbeto ngbii asi na Etiopii. A yeke fâ azo ti Ezipte gbani, a yeke nzi amosoro ti ala, a yeke buba kodro ti ala biani biani.

⁵Azo ti Etiopii, ti Put na ti Lud, ala ti Arabii na ti Libii, ataa azo ti Israel, ala yeke kui na ya ti bira.

⁶Tënë so mbi KOTA GBIA, mbi tene ayeke so: Ti londo na Migdol ngbii asi na gbata ti Asuan, azo so amu mbage ti Ezipte, fade ala yeke kui na ya ti bira; ngangu so Ezipte ayeke fa baba ni ayeke ti na gbeni. So tënë ti yanga ti Kota Gbia NZAPA laa.

⁷Fade Ezipte ayeke ga benyama ahon akodro so kue aga benyama. Agbata ti lo ayeke buba ahon agbata so kue abuba.

⁸Tongana mbi bi wâ na ya ti kodro ti Ezipte si a fâ azo ti mungo maboko na lo, fade azo ayeke hinga atene, mbi laa mbi yeke KOTA GBIA.

⁹Na lango ni so, mbi yeke tokua azo na mangboko ti gue na iri ti mbi, ti sara si azo ti Etiopii so ayeke duti na siriri, tere ti ala ado na mbeto. Na lango so mbi yeke buba Ezipte, fade tere ti ala ayeke do na mbeto. Biani, lango ni aga nduru awe!

¹⁰“Tënë so mbi Kota Gbia NZAPA, mbi tene ayeke so: Mbi yeke sara titene Nabukodonosor, gbia ti Babilone afâ azo ti Ezipte ti hunzi ala, ala so ayeke gbani gbani so.

¹¹Lo na azo ti lo, azo ti lo so ayeke sara sioni na zo ahon amara kue, ayeke ga ti buba kodro ni. Ala yeke tiri bira na azo ti Ezipte, ala yeke sara si akuâ asi singo na ya ti kodro ni.

¹²Mbi yeke sara titene angu ti Nil ahole, mbi yeke ka kodro ni na azo ti sioni. Na lege ti awande, mbi yeke buba kodro ni na amosoro ti lo kue. Mbi KOTA GBIA, mbi tene tënë awe.

¹³“Tënë so mbi Kota Gbia NZAPA, mbi tene ayeke so: Mbi yeke buba ayanda si mbi yeke zi abuba nzapa so ayeke na gbata ti Manfis. Mbeni makonzi ayeke kiri ti duti na Ezipte pepe; mbi yeke sara titene mbeto amu ya ti kodro ni kue.

¹⁴Mbi yeke buba Patros, mbi yeke bi wâ na gbata ti Soan, mbi yeke fâ ngbanga na li ti gbata ti No.

¹⁵Mbi yeke tuku ngonzo ti mbi ti wâ na ndö ti Sin, ngangu gbata so ayeke bata Ezipte; mbi yeke fâ azo ti No ti hunzi ala, ala so ayeke gbani gbani so.

¹⁶Mbi yeke bi wâ na Ezipte. Tere ti azo ti Sin ayeke do na mbeto. A yeke koro du na tere ti gbagba ti No si ngu ayeke suku amu ya ti gbata ti Manfis kue.

¹⁷A yeke fâ amaseka-koli ti One na ti Pi-Beset na ya ti bira si a yeke gbu tanga ti azo ti gbata ni ti gue na ala na kodro wande.

¹⁸Na lango so mbi yeke buba ngangu ti Ezipte si ngangu ti lo so lo yeke sara baba ni ayeke hunzi, fade ndo ayeke han na ndö ti gbata ti Tapanes pepe. Vukongo mbinda ayeke kanga ndö ti gbata ni si a yeke gbu azo ti sese ni ti gue na ala na kodro wande.

¹⁹Mbi yeke fâ ngbanga na li ti Ezipte, tongaso, fade azo ayeke hinga atene, mbi laa mbi yeke KOTA GBIA.”

²⁰Na lango mbarambara ti kozo nze ti ngu baleoko na oko ni, tënë ti *KOTA GBIA asi na mbi, atene:

²¹“*Molenge ti zo, mbi kungbi maboko ti Faraon, gbia ti Ezipte awe. Zo oko ti zia yoro na le ti ka ni ayeke daa pepe, zo oko ti kanga ni ayeke daa pepe, zo oko ti kanga ka ni na bongo ayeke daa pepe; maboko ni ayeke kiri ti wara ngangu ti gbu yongoro zeme pepe.

²²Ndani laa, tënë so mbi Kota Gbia NZAPA, mbi tene ayeke so: Mbi yeke ga na tere ti Faraon, gbia ti Ezipte. Mbi yeke kungbi amaboko ti lo use kue, maboko ti lo so angba nzoni na mbeni so akungbi awe so. Mbi yeke sara si yongoro zeme so ayeke na maboko ti lo ati na sese.

²³Mbi yeke kangbi azo ti Ezipte na popo ti amara nde, mbi yeke kangbi ala kirikiri na ya ti akodro wande.

²⁴Me mbi yeke sara si maboko ti gbia ti Babilone awara ngangu si mbi yeke zia yongoro zeme ti mbi na maboko ti lo. Mbi yeke kungbi maboko ti Faraon si lo yeke dema na dawa ti wato ti lo tongana zo so awara ka ti fango lo.

²⁵Biani, mbi yeke sara si maboko ti gbia ti Babilone awara ngangu, me maboko ti Faraon ayeke woko wokongo. Mbi yeke zia yongoro zeme ti mbi na maboko ti gbia ti Babilone si lo yeke yoro ni na tere ti Ezipte; tongaso, fade azo ayeke hinga atene, mbi laa mbi yeke KOTA GBIA.

²⁶Mbi yeke kangbi azo ti Ezipte na popo ti amara nde, mbi yeke kangbi ala kirikiri na ya ti akodro wande. Tongaso, fade azo ayeke hinga atene, mbi laa mbi yeke KOTA GBIA.”