Read La Bible en Sango courant – Mbeti ti Nzapa Ezekiel 31 Bible Online

Ezekiel 31 - La Bible en Sango courant – Mbeti ti Nzapa bible

Ezekiel 31

¹Na kozo lango ti ota nze ni, na ngu baleoko na oko ni, tënë ti *KOTA GBIA asi na mbi, atene:

²“*Molenge ti zo, mo tene na Faraon, gbia ti Ezipte nga na gba ti azo ti lo, mo tene: ‘Mo so mo yeke kota mingi so, mo kpa zo wa?

³Mo kpa keke ti sedre ti Liban so amaboko ni apendere mingi, so asara gbe ti de nzoni mingi; so ayo na nduzu mingi si li ti lo asi na ya ti ambinda.

⁴Ngu asara si keke ni ayo; gba ti ngu ti gbe ti sese asara si amai. Ngu abongbi na tere ti agunda ni, na pekoni, ngu ni asua na mbage ti akeke kue ti ngonda.

⁵Ndali ti gba ti ngu ni, keke ni ayo na nduzu ahon akeke kue ti ngonda, amaboko ni asigigi mingi mingi, amaboko ni ayo mbage na mbage.

⁶Andeke ti nduzu kue asara da ti ala na ya ti amaboko ti keke ni, anyama ti ngonda kue adu amolenge ti ala na gbe ti amaboko ti keke ni, gba ti amara aduti na gbe ti de ti lo.

⁷Lo pendere mingi ndali ti konongo ti lo, ndali ti ayongoro maboko ti lo. Biani, agunda ti lo alinda na ya ti sese so gba ti ngu ayeke daa.

⁸Na yaka ti Nzapa, mbeni keke ti sedre oko alingbi na lo pepe, amaboko ti mbeni keke ti sipre oko alingbi nga na amaboko ti lo pepe, mbeni keke oko alingbi na kete maboko ti lo pepe. Ataa yaka ti Nzapa, mbeni keke oko apendere alingbi na lo pepe.

⁹Mbi mu na lo gba ti amaboko so asara pendere ti lo; nilaa akeke kue ti Eden, yaka ti Nzapa asara kota be na tere ti lo.’ ”

¹⁰“Ndani laa, tënë so mbi Kota Gbia NZAPA, mbi tene ayeke so: Keke ti sedre ni akono awe, lo yo na nduzu ngbii li ti lo asi na ya ti ambinda si baba ahon ndö ti lo ndali ti yongo ti lo ni.

¹¹Ndani laa mbi ke lo, mbi zia lo na maboko ti makonzi ti amara nde so ayeke sara na lo alingbi na sioni ti lo.

¹²Awande, ala so asara sioni mingi na zo ahon amara kue, ade lo na sese si ala do lo azia. Amaboko ti lo ati na ndö ti ahoto nga na apopo-hoto. Amaboko ti lo akungbi si alango na ya ti adu kue ti kodro ni so ngu ayeke sua daa. Azo ti kodro so lani aduti na gbe ti de ti lo ahon, ala do lo azia.

¹³Andeke kue ti nduzu ayeke duti na ndö ti fango gere ti lo; anyama kue ti ngonda ayeke lango na popo ti amaboko ti lo.

¹⁴Tongaso, mbeni keke oko so ayeke na tere ti ngu alingbi ti yo na nduzu ngbii li ti lo asi na ya ti ambinda pepe si lo pika kate ti lo ndali ti yongo ti lo ni pepe. Biani, azo na akeke, ala kue ayeke kui kuingo si ala yeke gue na gbe ti sese legeoko tongana ala so ali na du ti kuâ.

¹⁵“Tënë so mbi Kota Gbia NZAPA, mbi tene ayeke so: Na lango so keke ti sedre azu na ndo ti akuâ, mbi mu yanga na aye ti dunia ti sara mua ti lo. Mbi kanga lege na gba ti ngu ti gbe ti sese ti sigigi, mbi gbanzi lege na *abale ti sua; mbi sara si gba ti ngu aluti na ndo oko. Ndali ti lo, mbi sara si vukongo ndo akanga ndö ti ahoto ti Liban, mbi sara si akeke kue ti ngonda ahole.

¹⁶Na ndembe so mbi sara si keke so ati si azu na ndo ti akuâ legeoko tongana azo so ali na du na kuâ, azo ama toto ti tingo ti lo ni, tere ti ala ato nda ti do na mbeto. Kâ na gbe ti sese, akeke kue ti Eden, akeke so apendere mingi na ala so awara ngu ti Liban gbani, ala kue be ti ala ade.

¹⁷Ala nga, ala na lo azu na ndo ti akuâ, na tere ti ala so akui na ya ti bira, ala so lani amu maboko na lo si ala duti na gbe ti de ti lo na popo ti amara nde so.

¹⁸“Na popo ti akeke ti Eden, keke wa laa pendere ti lo alingbi na ti mo? Konongo ti lo alingbi na ti mo? Fade a yeke sara si mo na akeke ti Eden ni azu na gbe ti sese. Kâ, mo yeke lango na popo ti azo so afâ *ganza pepe, mo na azo so akui na ya ti bira. Baa, ye so ayeke si ande na Faraon na azo ti lo so ayeke gbani gbani laa! So tënë ti yanga ti Kota Gbia NZAPA laa.”