Read La Bible en Sango courant – Mbeti ti Nzapa Ezekiel 32 Bible Online

Ezekiel 32 - La Bible en Sango courant – Mbeti ti Nzapa bible

Ezekiel 32

¹Na kozo lango ti nze baleoko na use ni, na ngu baleoko na use ni, tënë ti *KOTA GBIA asi na mbi, atene:

²“*Molenge ti zo, mo he mbeni bia ti totongo kuâ na ndö ti Faraon, gbia ti Ezipte, mo tene: ‘Mo kpa kete bamara na popo ti amara; mo yeke tongana sioni nyama so akpa ngunde na ya ti kota ngu-ingo. Mo duti kpoo na ya ti angu ti mo pepe, mo buba ni na gere ti mo, mo sara si le ti ngu ni aga sioni.

³Tënë so Kota Gbia NZAPA atene ayeke so: Na ndembe so gba ti amara ayeke bongbi, mbi yeke bi gbanda ti mbi na ndö ti mo si ala yeke gboto mo na ya ti gbanda ni.

⁴Mbi yeke bi mo na sese, mbi yeke bi mo na ya ti ngonda; mbi yeke sara titene andeke ti nduzu aduti na ndö ti mo, anyama ti sese kue ate kasa ti mo, ya ti ala asi.

⁵Tanga ti kasa ti mo so angba so, mbi yeke zia ni na ndö ti ahoto, mbi yeke sara si apopo-hoto asi singo na afungo kasa ti mo.

⁶Mbi yeke tuku mene ti mo na ndö ti sese; mene ni ayeke mu ndö ti ahoto si ayeke si singo na ya ti adu so ngu ayeke sua daa.

⁷Na ndembe so fini ti mo ayeke hunzi, mbi yeke kanga le ti nduzu, mbi yeke sara si le ti atongoro avuko, mbi yeke sara si mbinda akanga le ti lâ si nze akiri ti su pepe.

⁸Ndali ti mo, mbi yeke sara titene aye so kue ayeke su na le ti nduzu avuko vukongo, mbi yeke sara si ndo avuko pitipiti na kodro ti mo. So tënë ti yanga ti Kota Gbia NZAPA laa.

⁹Li ti gba ti amara ayeke kpe tongana mbi sara si ala ma sango ti bubango ti mo; sango ni ayeke gue ngbii asi na ya ti akodro so mo hinga ni pepe.

¹⁰Ndali ti mo, mbi yeke sara si gba ti amara abaa sioni. Be ti agbia ti ala ayeke do na kota mbeto tongana mbi yoro yongoro zeme na le ti ala. Na lango so mo yeke ti na sese, fade tere ti ala ayeke ngba ti do dongo; zo oko oko ayeke sara mbeto ndali ti fini ti lo wani.

¹¹‘Biani, tënë so Kota Gbia NZAPA atene ayeke so: Fade yongoro zeme ti gbia ti Babilone ayeke li na ya ti mo.

¹²Azo ti tiringo bira so ayeke sara sioni mingi na zo ahon amara kue, mbi yeke tokua ala ti fâ azo ti mo so ayeke gbani gbani so. Azo ti bira ni ayeke buba aye so ayeke sara baba ti Ezipte, ala yeke fâ azo ti kodro ni kue ti hunzi ala.

¹³Mbi yeke sara si anyama so kue mo yeke na ni na tere ti ngu ti Nil akui. Fade gere ti zo wala sokoto ti nyama ayeke kiri ti buba le ti ngu ni pepe.

¹⁴Tongaso, mbi yeke sara si le ti ngu ni aduti kpoo, ngu ni asua yeke-yeke tongana mafuta. So tënë ti yanga ti Kota Gbia NZAPA laa.

¹⁵Mbi yeke sara titene Ezipte aga benyama, mbi yeke zi aye so kue ayeke na ya ni, mbi yeke fâ azo so kue alango na ya ni. Tongaso, fade azo ayeke hinga atene, mbi laa mbi yeke KOTA GBIA.’

¹⁶“So mbeni bia ti totongo kuâ laa; fade azo ayeke he ni, awali ti amara nde ayeke he ni; ala yeke he bia ti totongo kuâ so na ndö ti Ezipte nga na ndö ti azo ti lo so ayeke gbani gbani. So tënë ti yanga ti Kota Gbia NZAPA laa.”

¹⁷Na lango baleoko na oku ti ngu baleoko na use ni, tënë ti *KOTA GBIA asi na mbi, atene:

¹⁸“*Molenge ti zo, toto na ndö ti azo ti Ezipte so ayeke gbani gbani so. Ayeke nzoni bia ti mo ni asara si ala na azo ti amara nde azu na gbe ti sese, ala na ambeni so ayeke zu na ndo ti akuâ.

¹⁹Mo tene na ala: Ala baa ti ala atene, ala yeke pendere ahon azo kue? Ala zu, ala lango na popo ti azo so afâ *ganza pepe, ala so a fâ ala na ya ti bira.

²⁰Biani, fade azo ti Ezipte ayeke kui na ya ti bira. Fadeso, a gboto ayongoro zeme na ya ti bozo ni awe: ayeke fâ Ezipte na azo ti lo so ayeke gbani gbani.

²¹Na ndo ti akuâ, amakonzi ti angangu zo ti bira nga na azo ti mungo maboko na Ezipte ayeke dekongo, atene: ‘Ala zu awe, ala lango na popo ti e, ala so afâ ganza pepe si ala kui na ya ti bira so!’

²²“Baa, gbia ti Asirii laa, lo na bongbi ti azo ti lo; adu ti kuâ ti aturugu ti lo angoro lo kue; a fâ ala kue na ya ti bira.

²³Adu ti kuâ ti ala ayeke yongoro kâ, na gbe ti ndo ti akuâ, angoro du ti kuâ ti gbia ni. A fâ ala kue na ya ti bira, ala so ayeke zia lani mbeto na be ti azo so angba na fini na ndö ti dunia so.

²⁴“Baa, gbia ti Elam laa, lo na azo ti lo so ayeke gbani gbani; adu ti kuâ ti ala angoro ti ti lo kue. A fâ ala kue na ya ti bira. Azo so afâ ganza pepe si ayeke zia lani kota mbeto na be ti azo so angba na fini na ndö ti dunia so, ala zu yongoro kâ na gbe ti sese awe. Kamene ahon ndö ti ala, ala na azo so azu na ya ti du ti kuâ.

²⁵Biani, gbia ti Elam alango na popo ti aturugu ti lo so akui na ya ti bira; adu ti kuâ ti azo ti lo so ayeke gbani gbani angoro lo kue. Azo so kue afâ ganza pepe so, ala kui na ya ti bira; ala yeke zia lani kota mbeto na be ti azo so angba na fini na ndö ti dunia so; fadeso kamene ahon ndö ti ala, ala na azo so azu na ya ti du ti kuâ, ala so a fâ ala na ya ti bira.

²⁶“Gbia ti Meshek na gbia ti Tubal ayeke kâ, ala na azo ti ala so ayeke gbani gbani; adu ti kuâ ti ala angoro ala kue. Azo so kue afâ ganza pepe, ala kui na ya ti bira; ala yeke zia lani kota mbeto na be ti azo so angba na fini na ndö ti dunia so.

²⁷A lu ala legeoko pepe na angangu zo ti bira so akui giriri, ala so afâ ganza pepe si ala kui so. Angangu zo ti bira ni azu na ndo ti akuâ na aye ti bira ti ala na tere ti ala si a zia ayongoro zeme ti ala na gbe ti li ti ala. Me sioni ti ala ayeke na ndö ti abio ti ala, ngbanga ti so ala yeke zia ando kota mbeto na be ti azo so angba na fini na ndö ti dunia so.

²⁸Me ti ala, azo ti Ezipte, ala yeke kui si a yeke lu ala na popo ti azo so afâ ganza pepe si ala kui na ya ti bira so.

²⁹“Baa, azo ti Edom laa, ala na agbia ti ala na amakonzi ti ala. Ataa aye ti koli so ala sara ando, a zia ala na popo ti azo so akui na ya ti bira; a lu ala legeoko na azo so afâ ganza pepe nga na azo so azu na ya ti du ti kuâ.

³⁰“Baa, amakonzi kue ti Banga na azo ti Sidon kue laa; ala zu na ndo ti akuâ. Ando, ala yeke sara aye ti koli mingi si ala yeke zia kota mbeto na be ti azo. Me fadeso, kamene ahon ndö ti ala si ala na azo so afâ ganza pepe so alango legeoko na azo so azu na ya ti du ti kuâ.

³¹“Tongana Faraon abaa ande azo ni, be ti lo ayeke de ndali ti azo ti lo so ayeke gbani gbani so. Biani, lo na aturugu ti lo so ayeke kui na ya ti bira. So tënë ti yanga ti Kota Gbia NZAPA laa.

³²Biani, mbi zia Faraon titene lo zia kota mbeto na be ti azo so angba na fini na ndö ti dunia so; me fadeso, lo wani nga na azo ti lo so ayeke gbani gbani, a yeke lu ala na popo ti azo so afâ ganza pepe, ala so akui na ya ti bira. So tënë ti yanga ti Kota Gbia NZAPA laa.”