Read La Bible en Sango courant – Mbeti ti Nzapa Ezekiel 36 Bible Online

Ezekiel 36 - La Bible en Sango courant – Mbeti ti Nzapa bible

Ezekiel 36

¹“*Molenge ti zo, tene peko ti tënë ti yanga ti mbi na tere ti ahoto ti Israel, mo tene: Ala ahoto ti Israel, ala ma tënë ti *KOTA GBIA!

²Tënë so mbi Kota Gbia NZAPA, mbi tene ayeke so: Awato ti ala ahe ala, atene: ‘Huuu! Huuu! Angbene hoto so aga ye ti e awe!’

³Fadeso mo tene peko ti tënë ti yanga ti mbi, mo tene: Tënë so Kota Gbia NZAPA atene ayeke so: Mbage na mbage, azo abuba ala si asara nzara ti ala; amara nde amu ala ti ga ye ti ala; azo ahe ala na ngia si azonga ala.

⁴Ndani laa, ala ahoto ti Israel, ala ma tënë ti Kota Gbia NZAPA! Tënë so mbi Kota Gbia NZAPA, mbi tene ayeke so: Akota hoto, akete hoto, akete ngu so ayeke sua, apopo-hoto, akodro so abuba awe si aga benyama, agbata so azo ado azia, agbata so azo anzi aye ti ya ni kue si azo ti amara nde so angoro ni ahe ni na ngia,

⁵tënë so mbi Kota Gbia NZAPA, mbi tene ayeke so: Mbi deba yanga ti mbi! Na lege ti ngonzo ti mbi so alondo tongana wâ, mbi tene tënë so na tere ti amara nde nga na tere ti Edom kue, ngbanga ti so ala mu sese ti mbi ti ga ye ti ala. Be ti ala asi singo lani na ngia, ala baa kodro ti mbi tongana mbumbuse ye si ala nzi ando so anyama ayeke te pere daa.

⁶Ndani laa, mo tene peko ti tënë ti yanga ti mbi na ndö ti sese ti Israel, na ndö ti akota hoto, akete hoto, akete ngu so ayeke sua nga na apopo-hoto, mo tene: Tënë so Kota Gbia NZAPA atene ayeke so: Baa, na lege ti ngonzo ti mbi ti wâ na mbanda ti mbi laa mbi tene tënë so, ngbanga ti so amara nde azia kamene na le ti ala.

⁷Ndani laa, tënë so mbi Kota Gbia NZAPA, mbi tene ayeke so: Mbi yoro maboko ti mbi na nduzu, mbi deba yanga ti mbi, mbi tene: Amara nde so angoro ala, ala laa kamene ni ayeke kiri ti gbu le ti ala.

⁸Ti ala, ahoto ti Israel, fade amaboko ti akeke ti ala ayeke sigigi, akeke ni ayeke le ndali ti azo ti Israel so ayeke azo ti mbi. Biani, ala ga nduru ti kiri na sese ti ala awe.

⁹Biani, mbi yeke ga na mbage ti ala, mbi yeke kiri na mbage ti ala; azo ayeke kiri ti fâ yaka na ndö ti sese ti ala si ala lu kobe daa.

¹⁰Mbi yeke sara titene azo awu mingi na ya ti kodro ti Israel kue; azo ayeke kiri ti lango na ya ti agbata, ando so lani abuba, a yeke kiri ti leke ni.

¹¹Mbi yeke sara titene azo na anyama awu mingi. Ala yeke du amolenge si ala yeke ga gbani gbani; mbi yeke sara titene ala kiri awu mingi ahon ti giriri, mbi yeke sara nzoni na ala ahon ti kozo. Tongaso, fade ala yeke hinga atene, mbi laa mbi yeke KOTA GBIA.

¹²Mbi yeke sara titene ala azo ti Israel, azo ti mbi atambula na ya ti kodro ni kue. Ala yeke mu sese ni ti ga ye ti ala, ayeke ga ye ti ala si ala ahoto, ala yeke kiri ti fâ amolenge ti azo ni pepe.

¹³Tënë so mbi Kota Gbia NZAPA, mbi tene ayeke so: Ambeni zo atene na mo Israel, atene: Mo yeke kodro so mo yeke te azo, mo fâ amolenge ti azo ti mara ti mo.

¹⁴Tongaso, fade mo yeke kiri ti te azo pepe, mo yeke kiri ti fâ amolenge ti azo ti mara ti mo pepe. So tënë ti yanga ti Kota Gbia NZAPA laa.

¹⁵Mbi yeke sara titene azo akiri ti zia kamene na le ti mo pepe, mo yeke kiri ti ma azongango ndo ti amara nde pepe. Mo yeke sara titene azo ti mara ti mo akiri ati pepe. So tënë ti yanga ti Kota Gbia NZAPA laa.”

¹⁶Tënë ti *KOTA GBIA asi na mbi, atene:

¹⁷“*Molenge ti zo, na ndembe so azo ti Israel aduti ando na sese ti ala, ala sara si sese ni aga *sioni na lege ti dutingo ti ala nga na asarango ye ti ala. Lege ti dutingo ti ala ayeke *sioni na le ti mbi tongana wali so aga *sioni na ngoi ti bango ya ti lo.

¹⁸Ala sara si kodro ni aga *sioni na lege ti mene so ala tuku nga na lege ti afungo yanda. Ndani laa, mbi tuku ngonzo ti mbi ti wâ na ndö ti ala.

¹⁹Mbi kangbi ala na popo ti amara nde si ala kangbi kirikiri na ya ti akodro wande. Mbi fâ ngbanga na li ti ala alingbi na dutingo ti ala nga na asarango ye ti ala.

²⁰Andaa, na popo ti amara so ala gue daa, ala buba iri ti mbi so ayeke nde si ayeke nzoni kue. Biani, azo atene tënë ti ala, atene: ‘So azo ti KOTA GBIA laa; kodro ti lo laa ala do azia!’

²¹Tongaso be ti mbi aso ndali ye so: iri ti mbi so ayeke nde si ayeke nzoni kue, azo ti Israel abuba ni na popo ti amara nde so azo ti Israel aga na ndo ti ala.

²²Ndani laa, tene na azo ti Israel, mo tene: Tënë so Kota Gbia NZAPA atene ayeke so: Ye so mbi sara so, mbi sara ni ndali ti ala, azo ti Israel pepe. Me mbi sara ni ndali ti iri ti mbi so ayeke nde si ayeke nzoni kue, iri ti mbi so ala buba ni na popo ti amara nde so ala ga na ndo ti ala.

²³Kota iri ti mbi so ala buba na popo ti amara nde, iri ti mbi so ala buba ni na popo ti ala so, fade mbi yeke fa na amara nde so iri ni ayeke nde si ayeke nzoni kue; mbi yeke fa ni na ala na lege ti ala, azo ti Israel. Tongaso, fade amara nde ni ayeke hinga atene, mbi laa mbi yeke KOTA GBIA. So tënë ti yanga ti Kota Gbia NZAPA laa.”

²⁴“Fade mbi yeke zi ala na popo ti amara nde, mbi yeke mu ala na sese nde nde, mbi yeke bongbi ala si mbi yeke kiri na ala na sese ti ala.

²⁵Mbi yeke tuku *nzoni ngu na ndö ti ala si ala ga *nzoni. Mbi yeke *sukula asioni ti ala kue, mbi yeke zi ayanda ti ala.

²⁶Mbi yeke mu na ala fini be, mbi yeke zia fini yingo na ya ti ala. Mbi yeke zi be ti ala so akpengba tongana têne si mbi yeke mu na ala be ti zo

²⁷Mbi yeke zia taa yingo ti mbi na ya ti ala, mbi yeke sara titene ala sara ye alingbi na atënë ti ndia ti mbi, ala bata ni si ala sara ye alingbi na aye so mbi fa.

²⁸Tongaso, fade ala yeke duti na sese so mbi mu ando na akotara ti ala; ala yeke duti azo ti mbi si mbi yeke duti Nzapa ti ala.

²⁹Mbi yeke zi ala na ya ti *asioni ti ala kue. Mbi yeke kiri ti tokua nzara na ya ti kodro ti ala pepe, me mbi yeke sara titene le ti kobe asigigi si ale gbani gbani.

³⁰Mbi yeke sara titene akeke ti ala na akobe ti yaka ti ala ale gbani gbani. Tongaso si kamene ayeke kiri ti sara ala pepe ndali ti nzara na popo ti amara nde.

³¹Na ndembe ni so, fade ala yeke dabe ti ala na sioni lege ti dutingo ti ala nga na asioni sarango ye ti ala; fade li ti ala ayeke ne na kamene ndali ti asiokpari ti ala nga ndali ti asioni ye so ala sara si zo alingbi ti baa na le ti lo fani use pepe so.

³²Ala azo ti Israel, alingbi ala hinga atene, ye so mbi yeke sara so, mbi sara ni ndali ti ala pepe; so tënë ti yanga ti mbi, Kota Gbia NZAPA laa. Ayeke fade nzoni titene kamene asara ala si be ti ala aso ndali ti lege ti sarango ye ti ala.

³³“Tënë so mbi Kota Gbia NZAPA, mbi tene ayeke so: Na lango so mbi yeke *sukula asioni ti ala kue, mbi yeke sara titene azo akiri asi singo na ya ti agbata; aye so lani abuba, a yeke kiri ti leke ni.

³⁴Sese so aga benyama, azo ayeke kiri ti fâ yaka daa; sese ni ayeke kiri ti ngba benyama pepe na le ti azo so ayeke hon na lege.

³⁵Fade azo ayeke tene: ‘Sese so lani abuba so, akiri aga tongana yaka ti Eden. Agbata so lani aga ndo ti gba ti atêne, abuba, a kungbi ni na sese, a kiri asara ngangu gbagba na tere ni si azo alango daa.’

³⁶Tongaso, azo ti mara nde so ayeke ngba na fini na tere ti ala ayeke hinga atene, mbi yeke KOTA GBIA; mbi yeke leke agbata so abuba awe; mbi yeke kiri ti lu ye na yaka so azo abuba ni. Mbi KOTA GBIA, mbi tene tënë awe; mbi yeke sara ye ni.

³⁷“Tënë so mbi Kota Gbia NZAPA, mbi tene ayeke so: Mbi yeke kiri ti zia lege na azo ti Israel ti gi mbi si mbi yeke sara ye ndali ti ala; mbi yeke sara titene ala kiri awu mingi tongana bongbi ti ataba.

³⁸Ando, na ngoi ti akota matanga, anyama ti mungo na *sandaga asi singo na Jérusalem; a yeke ga na ala na lege ti bongbi ti ala. Agbata so abuba ando, gba ti azo ayeke kiri ti si singo na ya ni legeoko tongana anyama ni. Tongaso, fade azo ayeke hinga atene, mbi laa mbi yeke KOTA GBIA.”