Read La Bible en Sango courant – Mbeti ti Nzapa Ezekiel 37 Bible Online

Ezekiel 37 - La Bible en Sango courant – Mbeti ti Nzapa bible

Ezekiel 37

¹Maboko ti *KOTA GBIA agbu mbi, yingo ti lo ague na mbi si azia mbi na ndo so ayeke na popo-hoto; abio asi singo daa.

²KOTA GBIA asara si mbi hon, mbi ngoro tere ti abio ni kue. Abio ni ayeke gbani gbani na popo-hoto ni si ala hole kasakasa.

³KOTA GBIA ahunda mbi: “*Molenge ti zo, abio so alingbi ti kiri ti duti na fini?” Mbi kiri tënë: “Kota Gbia NZAPA, mo laa mo hinga!”

⁴Lo tene na mbi: “Tene peko ti tënë ti yanga ti mbi na ndö ti abio ni, mo tene: Ala akuru bio so, ala ma tënë ti KOTA GBIA!

⁵Tënë so Kota Gbia NZAPA atene na abio ni ayeke so: Mbi yeke sara titene pupu aga na ya ti ala si ala kiri ti duti na fini.

⁶Mbi yeke zia akamba ti tere na tere ti ala, mbi yeke sara titene kasa ti tere ti ala asigigi si mbi yeke kanga tere ti ala na poro. Na pekoni, mbi yeke zia pupu na ya ti ala si ala yeke kiri ti duti na fini. Tongaso, fade ala yeke hinga atene, mbi laa mbi yeke KOTA GBIA.”

⁷Mbi tene peko ti tënë ti yanga ti KOTA GBIA so alingbi na yanga so lo mu na mbi. So mbi ngba ti tene tënë, mbi ma mbeni ye ayeke toto, aye ayeke yingi tere: bio oko oko ayeke pusu nduru nduru na tere ti mba ti lo.

⁸Mbi baa ndo, mbi baa so akamba ti tere aga na tere ti abio ni, kasa ti tere asigigi na tere ti ala si poro akanga ndö ti ala. Me pupu ade ti ga na ya ti ala pepe.

⁹Tongaso KOTA GBIA atene na mbi: “Molenge ti zo, tene peko ti tënë ti yanga ti mbi na ndö ti pupu; tene peko ti tënë ti yanga ti mbi, mo tene: Tënë so Kota Gbia NZAPA atene ayeke so: ‘Pupu, londo na andangoro osio ti sese kue, mo ya na ndö ti akuâ so si ala kiri ti duti na fini!’ ”

¹⁰Mbi tene peko ti tënë ti yanga ti KOTA GBIA alingbi na yanga so lo mu na mbi. Tongaso pupu ali na ya ti akuâ ni si ala kiri aduti na fini; ala luti na nduzu. Ala yeke gbani gbani tongana kota bongbi ti aturugu.

¹¹Na pekoni, KOTA GBIA atene na mbi: “Molenge ti zo, abio so ayeke limo ti azo ti Israel kue laa. Azo ti Israel atene: ‘E yeke tongana akuru bio, mbeni ye titene e zia be ti e ti ku ayeke daa pepe; ti e ahunzi awe!’

¹²Ndani laa, tene peko ti tënë ti yanga ti mbi, mo tene na ala: Tënë so Kota Gbia NZAPA atene ayeke so: Mbi yeke zi yanga ti adu ti kuâ ti ala, mbi yeke sara titene ala sigigi na ya ti adu ti kuâ ni, ala azo ti mbi. Mbi yeke kiri na ala na sese ti Israel.

¹³Tongana mbi zi yanga ti adu ti kuâ ti ala, tongana mbi sara si ala sigigi na ya ti adu ti kuâ ni, ala azo ti mbi, fade ala yeke hinga atene, mbi laa mbi yeke KOTA GBIA.

¹⁴Mbi yeke zia yingo ti mbi na ya ti ala si ala kiri ti duti na fini. Mbi yeke zia ala na sese ti ala. Tongaso, fade ala yeke hinga atene, mbi laa mbi yeke KOTA GBIA; mbi tene tënë awe, mbi yeke sara ye ni. So tënë ti yanga ti mbi KOTA GBIA laa.”

¹⁵Tënë ti *KOTA GBIA asi na mbi, atene:

¹⁶“Mo, *molenge ti zo, mu mbeni nduru keke, mo su tënë so na ndö ni: ‘Juda na azo ti Israel ti kodro-gbia so’. Na pekoni, mu mbeni nduru keke nde, mo su tënë so na ndö ni: ‘Joseph wala Efraim na azo ti Israel ti kodro-gbia so’.

¹⁷Mo tengbi anduru keke ni titene ala gbu tere si aga keke oko na ya ti maboko ti mo.

¹⁸Fade azo ti mara ti mo ayeke hunda mo, atene: ‘Mo lingbi ti fa na e nda ti ye so mo sara so pepe?’

¹⁹Fade mo yeke kiri tënë na ala: Tënë so Kota Gbia NZAPA atene ayeke so: Mbi yeke mu nduru keke so ayeke limo ti Joseph na azo ti Israel ti kodro-gbia so ti tengbi ni na nduru keke so ayeke limo ti Juda na azo ti kodro-gbia so; mbi yeke sara titene aga gi keke oko na ya ti maboko ti mbi.”

²⁰“Akeke so fade mo su mbeti na ndö ni so ayeke ngba na ya ti maboko ti mo, na le ti azo kue.

²¹Na pekoni, mo tene na ala: Tënë so Kota Gbia NZAPA atene ayeke so: Ala azo ti Israel, mbi yeke zi ala na popo ti amara nde so ala gue na ndo ti ala nga na ando nde nde, mbi yeke bongbi ala si mbi yeke kiri na ala na sese ti ala.

²²Mbi yeke sara titene ala ga gi mara oko na sese ni, na ndö ti ahoto ti Israel; ala kue, gbia ti ala ayeke duti gi oko; ala yeke kiri ti duti amara use pepe, ya ti kodro-gbia ni ayeke kiri ti kangbi use pepe.

²³Ala yeke kiri ti ga *sioni pepe na lege ti vorongo afungo yanda, na lege ti sarango asioni ye so zo alingbi ti baa na le ti lo fani use pepe nga na lege ti asioni nde nde so ala sara. Mbi yeke zi ala na ando so kue ala duti daa si ala sara siokpari so; mbi yeke sara si ala ga *nzoni. Ala yeke duti azo ti mbi si mbi yeke duti Nzapa ti ala.

²⁴Zo ti kua ti mbi David laa ayeke le-gbia na ndö ti ala si wabatango ala kue ayeke duti gi oko. Fade ala yeke sara ye alingbi na aye so mbi fa nga na lege ti atënë ti ndia ti mbi si ala yeke sara ye alingbi na ni.

²⁵Ala yeke duti na sese so mbi mu na zo ti kua ti mbi Jacob, sese so akotara ti ala aduti ando daa. Ala yeke duti daa kpu na kpu, ala na amolenge ti ala, na amolenge ti amolenge ti ala. Fade David, zo ti kua ti mbi ayeke duti makonzi ti ala lakue lakue.

²⁶Mbi yeke sara *mbuki ti siriri na ala; mbuki ni ayeke ngba lakue lakue na popo ti mbi na ala. Mbi yeke zia ala na ndö ti sese so, mbi yeke sara si ala wu mingi. Mbi yeke zia da ti mbi so ayeke nde si ayeke nzoni kue na popo ti ala kpu na kpu.

²⁷Ndo ti dutingo ti mbi ayeke na popo ti ala; mbi yeke duti Nzapa ti ala si ala yeke duti azo ti mbi.

²⁸Na ndembe so mbi yeke zia da ti mbi na popo ti ala kpu na kpu, fade amara nde ayeke hinga atene, mbi laa mbi yeke KOTA GBIA, mbi laa mbi zia Israel nde ndali ti mbi.”