Read La Bible en Sango courant – Mbeti ti Nzapa Ezekiel 39 Bible Online

Ezekiel 39 - La Bible en Sango courant – Mbeti ti Nzapa bible

Ezekiel 39

¹“Ti mo, *molenge ti zo, mo tene peko ti tënë ti yanga ti mbi na tere ti Gog. Mo tene na lo, mo tene: Tënë so Kota Gbia NZAPA atene ayeke so: Mbi yeke ga na tere ti mo, Gog, kota makonzi ti azo ti Meshek na ti Tubal.

²Fade mbi yeke gboto mo na ngangu ti hon na mo; mbi yeke sara titene mo sigigi na ya ti kodro ti mo so ayeke yongoro kâ na mbage ti Banga titene mo gue, mo tiri bira na ahoto ti Israel.

³Na pekoni, mbi yeke pika mo si ya ti kokora ti mo so ayeke na ya ti maboko ti mo ti wali ayeke fâ; mbi yeke sara titene ale ti kokora ti mo alondo na ya ti maboko ti mo ti koli ati na sese.

⁴Mo na aturugu ti mo kue nga na gba ti azo so ayeke na tere ti mo, ala yeke kui na ndö ti ahoto ti Israel. Mbi yeke mu kuâ ti mo na *angoalo na andeke kue ti nduzu nga na anyama ti ngonda titene ala te.

⁵Mo yeke kui taa na ya ti ngonda, ngbanga ti so mbi tene tënë awe. So tënë ti yanga ti Kota Gbia NZAPA laa.

⁶Mbi yeke bi wâ na ya ti kodro ti Magog nga na ndö ti azo so ayeke lango yongoro na yanga ti kota ngu-ingo si ala yeke duti na siriri so. Tongaso, fade ala yeke hinga atene, mbi laa mbi yeke *KOTA GBIA.

⁷Mbi yeke sara titene azo ti Israel so ayeke azo ti mbi ahinga so iri ti mbi ayeke nde si ayeke nzoni kue. Mbi yeke kiri ti zia lege pepe titene azo akiri abuba iri ti mbi, iri ti mbi so ayeke nde si ayeke nzoni kue so. Tongaso, fade amara nde ayeke hinga atene, mbi laa mbi yeke KOTA GBIA, Nzapa ti Israel, lo so lo yeke nde si lo yeke nzoni kue.

⁸Biani, aye so ayeke ga; aye ni asi awe! Lango so mbi tene tënë ni so laa. So tënë ti yanga ti mbi, Kota Gbia NZAPA laa.

⁹Azo ti Israel ayeke sigigi na ya ti agbata ti ala, ala yeke sara wâ, ala yeke gbi aye ti bira ti awato ti ala: akete *vala na akota vala, akokora na ale ti kokora, ayongoro zeme na alikongo; ala yeke wara aye ti sara na wâ na ya ti ngu mbarambara.

¹⁰Azo ayeke kiri ti gue ti ro akeke ti wâ na yaka pepe, wala ala yeke kiri ti fâ akeke na ya ti gbako pepe. Biani, ala yeke sara wâ gi na aye ti bira so. Ala yeke nzi ye ti azo so lani anzi ala, ala yeke gbu aye ti azo so lani agbu aye ti ala. So tënë ti yanga ti Kota Gbia NZAPA laa.

¹¹“Na lango ni so, fade mbi yeke mu na Gog mbeni ndo na Israel titene a lu kuâ ti lo daa. Ndo ni ayeke na popo-hoto ti Azo-ti-hongo-na-lege, na mbage ti To ti kota ngu ti Gba-ti-ingo. Ndo ni ayeke kanga lege na azo so ayeke hon na lege. A yeke lu kuâ ti Gog na ti gba ti azo ti lo kâ. A yeke di iri ti ndo ni ‘Popo-hoto ti Gba-ti-azo-ti-Gog’.

¹²Azo ti Israel ayeke mu nze mbarambara ti lu kuâ ti azo ni, tongaso si kodro ni aga *nzoni.

¹³Azo ti kodro kue laa ayeke lu akuâ ni; lungo akuâ ni ayeke ga ye ti pikango kate ti ala na lango so mbi yeke fa gonda ti mbi. So tënë ti yanga ti Kota Gbia NZAPA laa.

¹⁴Na peko ti nze mbarambara, ala yeke soro ambeni koli titene ala hon na ya ti akodro ni lakue ti gi akuâ so angba na ndö ti sese. Azo so ayeke hon na lege ayeke mu maboko na akoli ni ti lu akuâ ni. Tongaso, ala yeke sara titene kodro ni aga *nzoni.

¹⁵Azo so ayeke hon na lege ayeke tambula na ya ti kodro ni mbage na mbage kue. Tongana mbeni oko awara abio ti zo, lo yeke bongbi atêne na tere ni titene a hinga na ni. Tongaso, azo so ayeke zi adu ti kuâ aga amu ni si alu ni na Popo-hoto ti Gba-ti-azo-ti-Gog.

¹⁶Mbeni gbata ayeke duti daa so a yeke di iri ni Hamona, so ti tene ‘Gba-ti-azo’. Tongaso, fade a yeke sara si kodro ni aga *nzoni.”

¹⁷“Ti mo molenge ti zo”, tënë so Kota Gbia NZAPA atene ayeke so: Tene na andeke na aye so kue ayeke huru na le ti nduzu, na anyama ti ngonda, mo tene: Ala londo na ando nde nde, ala bongbi tere ti ala, ala ga na *sandaga so mbi yeke mu ndali ti ala. Sandaga ni ayeke kota sandaga so mbi yeke mu ni na ndö ti ahoto ti Israel. Fade ala yeke te kasa si ala yeke nyon mene.

¹⁸Ala yeke te kasa ti angangu zo ti bira, ala yeke nyon mene ti amakonzi ti dunia; a mu ala na sandaga na plase ti akoli-taba, akete taba, akoli-ngasa nga na akoli-bagara ti mafuta ti Bashan.

¹⁹Ala yeke te mafuta ngbii ya ti ala asi, ala yeke nyon mene ngbii asara ala tongana samba. Baa, sandaga so mbi yeke mu ndali ti ala laa.

²⁰Matanga ti tengo kobe so mbi yeke iri ala ndali ni, fade ala yeke te ambarata na azo ti kpengo na mbarata ni, aturugu na angangu zo ti bira nde nde. So tënë ti yanga ti Kota Gbia NZAPA laa.

²¹“Fade mbi yeke fa gonda ti mbi na popo ti amara nde. Ala kue ayeke baa ngbanga so mbi yeke fâ nga na maboko ti mbi so mbi yeke yoro na ndö ti ala.

²²Ti to ndani na lango ni so ti gue na ni, fade azo ti Israel ayeke hinga atene, mbi laa mbi yeke KOTA GBIA, Nzapa ti ala.”

²³“Fade amara nde ayeke hinga atene, ndali ti asioni ti azo ti Israel laa a gbu ala, a gue na ala na kodro wande, ndali ti asioni ye so ala sara ti ke mbi *KOTA GBIA. Ndani laa, mbi honde le ti mbi na ala, mbi zia ala na maboko ti awato ti ala si a fâ ala kue na ya ti bira.

²⁴Mbi honde le ti mbi na ala si mbi sara na ala alingbi na *asioni ti ala nga na ngangu li ti ala.

²⁵“Me tënë so mbi Kota Gbia NZAPA, mbi tene ayeke so: Fadeso, mbi yeke sara si gigi ti *ahale ti Jacob aga nzoni, mbi yeke baa mawa ti azo ti Israel kue, mbi yeke sara mbanda ti iri ti mbi so ayeke nde si ayeke nzoni kue so.

²⁶Tongaso, fade be ti ala ayeke girisa na gba ti kamene ti ala nga na asioni ye so kue ala sara ti ke mbi. Ala yeke kiri ti duti na siriri na ndö ti sese ti ala; zo oko ti sara titene tere ti ala ado na mbeto ayeke daa pepe.

²⁷Mbi yeke sara titene ala londo na kodro ti awato ti ala, mbi yeke bongbi ala si mbi yeke kiri na ala na ndo ti ala. Na lege ti ala, mbi yeke fa na le ti gba ti amara so mbi yeke nde si mbi yeke nzoni kue.

²⁸Tongaso, fade azo ti Israel ayeke hinga nga atene, mbi yeke KOTA GBIA, Nzapa ti ala, ngbanga ti so, na peko ti so mbi sara si a gbu ala, a gue na ala na kodro wande, mbi kiri mbi bongbi ala na ndö ti sese ti ala. Mbi yeke kiri ti zia zo oko ti ngba kâ pepe.

²⁹Mbi yeke kiri ti honde le ti mbi na ala pepe, ngbanga ti so mbi tokua yingo ti mbi na ndö ti azo ti Israel awe. So tënë ti yanga ti Kota Gbia NZAPA laa.”