Read La Bible en Sango courant – Mbeti ti Nzapa Ezekiel 4 Bible Online

Ezekiel 4 - La Bible en Sango courant – Mbeti ti Nzapa bible

Ezekiel 4

¹*KOTA GBIA akiri atene na mbi: “Ti mo, *molenge ti zo, mo mu mbeni biriki oko, mo zia na sese na dawa ti mo; mo kpaka limo ti mbeni gbata na ndö ni, so ti tene Jérusalem.

²Na pekoni, mo leke ambeni ye so afa atene, awato angoro gbata ni ti mu na bira; mo koro du na gbe ti sese na tere ni kue, mo bongbi sese aga *koto na tere ni, mo zia abâbâ ti aturugu nga na amasini ti bira angoro ni kue.

³Mo mu mbeni kota le ti wen, mo zia ni aluti na popo ti mo na gbata ni. Mo baa ndo na mbage ti gbata ni si le ti mo angba gi na ndö ni: mo laa mo yeke sara bira na gbata ni. Aye so kue aye ti fa mbeni ye ti gbotongo mê ti azo ti Israel.

⁴“Na pekoni, mo lango na sese na mbage ti maboko ti mo ti wali. Na ya ti alango so kue mo ngba ti lango na sese tongaso, fade mo yeke yo sioni ti azo ti Israel na ndö ti mo.

⁵Mbi diko na li ti mo ti sara so na ya ti alango so wungo ni alingbi na wungo ti ngu so azo ti Israel asara sioni. Tongaso, na ya ti lango ngbangbo ota na balegumbaya, fade mo yeke yo sioni ti azo ti Israel.

⁶Tongana lango ni so ahunzi awe, fade mo kiri mo lango na sese na mbage ti maboko ti mo ti koli; mo yeke yo sioni ti azo ti Juda na ndö ti mo na ya ti lango baleosio. Mbi diko na li ti mo lango oko ndali ti ngu oko so ala sara na sioni ni.

⁷Na pekoni, mo yeke baa ndo na mbage ti Jérusalem so awato angoro ni na bira; le ti mo ayeke ngba gi na ndö ni. Maboko ti mo so bongo ayeke na tere ni pepe so, mo yeke yoro ni na nduzu na mbage ti gbata ni si mo yeke tene atënë ti peko ti yanga ti mbi na ndö ni.

⁸Ti mbi, mbi yeke kanga mo na kamba si mo turne tere ti mo mbage na mbage pepe, ngbii alango so mo sara bira na gbata ni ahunzi si.

⁹“Mo mu fadeso farini ti *ble, ti *orze, ti ariko, ti lantii, ti bondo na ti kpengbango ble; mo bongbi ni kue na ya ti sembe oko, mo sara na mapa. Mo yeke te gi mapa so na ya ti lango ngbangbo ota na balegumbaya so mo yeke lango na sese na mbage ti maboko ti mo oko.

¹⁰Mo yeke haka kobe ti mo ti lango oko, nengo ni alingbi nduru na grame ngbangbo use. So ayeke kobe ti mo na ya ti lango oko oko laa.

¹¹Mo yeke haka ngu hakango si mo nyon ni: litere ti ngu oko na ya ti lango oko.

¹²Kobe ti mo ti tengo ni ayeke kpa mapa so a sara na farini ti orze. Mo yeke zö mapa ni na le ti azo kue na ndö ti wâ so a tingo ni na puru ti zo.”

¹³KOTA GBIA akiri atene: “Gi tongaso laa azo ti Israel ayeke te *asioni kobe na popo ti amara nde so mbi yeke tumba ala ti gue daa.”

¹⁴Mbi kiri tënë, mbi tene: “Ae! Kota Gbia NZAPA, laoko mbi buba tere ti mbi pepe. So mbi de molenge ngbii asi laso, laoko mbi te kuâ ti nyama pepe, wala nyama so mbeni sioni nyama asuru ya ti lo. *Sioni kasa ti nyama ade ti li na yanga ti mbi laoko pepe.”

¹⁵KOTA GBIA atene na mbi: “Tongaso, mbi mu na mo puru ti bagara titene mo tingo na wâ ti zö mapa ti mo na ndö ni, ahon titene mo mu puru ti zo.”

¹⁶Lo kiri lo tene: “Molenge ti zo, fade mbi yeke buba kobe so azo abata na Jérusalem. A yeke haka kobe nga na ngu si a yeke mu na ala. Ala yeke te kobe gi na vundu, ala yeke nyon ngu gi na kota mbeto na be.

¹⁷Kobe na ngu ayeke tia ala; ndani laa be ti azo kue ayeke fun si ala yeke nge gi ngengo na nduzu ndali ti sioni ti ala.”