Read La Bible en Sango courant – Mbeti ti Nzapa Ezekiel 40 Bible Online

Ezekiel 40 - La Bible en Sango courant – Mbeti ti Nzapa bible

Ezekiel 40

¹Na ngu baleuse na oku ni, na peko ti so a gbu azo, a gue na ala na kodro wande, na tongo nda ti ngu ni, na lango baleoko ti nze ni; na ngu baleoko na osio na peko ti so gbata ti Jérusalem ati awe, taa gi na lango ni so, maboko ti *KOTA GBIA agbu mbi si ague na mbi kâ.

²Na ya ti mbeni ye tongana bango-li, Nzapa amu mbi, ague na mbi na sese ti Israel. Lo zia mbi na ndö ti mbeni hoto so ayo na nduzu mingi. Gba ti ada so akpa ada ti mbeni gbata ayeke na ndö ti hoto ni, na mbage ti Mbongo.

³KOTA GBIA amu mbi, ague na mbi kâ si mbi baa mbeni koli so tere ti lo ayeke tongana bengba wen, lo luti lutingo na tere ti yanga ti gbagba. Lo gbu na maboko ti lo aye use ti hakango na ye: mbeni kamba so a sara na *len nga na mbeni keke.

⁴Koli ni atene na mbi: “*Molenge ti zo, zi le ti mo, mo baa ndo nzoni, zi mê ti mo, mo ma tënë nzoni; le ti mo angba na ndö ti ye so mbi yeke fa na mo. Biani, a ga na mo ge titene mo baa ye ni. Aye so kue mo baa so, fade mo yeke fa peko ni na azo ti Israel.”

⁵Mbi baa mbeni gbagba angoro kota da ti Nzapa kue. Koli ni agbu keke ti hakango na ye so ayo kudee omene. Kudee oko oko ayo ahon asenge kudee na konongo ti le ti maboko oko. Lo mu ni si lo haka na gbagba ni. Gbagba ni *amï si ayo na nduzu alingbi tere na keke oko ti hakango na ye.

⁶Lo gue na mbage ti yanga ti gbagba ni so abaa ndo na mbage ti To. Lo mondee eskalie si lo haka ndo so ayeke na gbe ti yanga ti da ni; yongo ti gbe ti yanga ni kue alingbi na keke oko ti hakango na ye.

⁷Akubu oko oko ti asanziri, yongo ni alingbi tere mbage na mbage, ayo kudee omene. Adere so ayeke na popo ti akubu ni ayo kudee oku. Gbe ti yanga ti da ni, nduru na yangbo na mbage ti ya ni ayo keke oko ti hakango na ye.

⁸Koli ni ahaka kota kubu ti yanga ni na mbage ti ya ni.

⁹Kota kubu ni ayo kudee miombe; adere ti da ni ayo kudee use. Kota kubu ti yanga ti gbagba ni ayeke na mbage ti ya ni.

¹⁰Akubu omene ti asanziri ti yanga ni so ayeke na mbage ti To ti kota da ni, yongo ti ala kue alingbi tere; ota na mbage ti lege ti ya ti yanga ti gbagba ni, ota na mbeni mbage. Adere so ayeke na popo ti akubu ti asanziri ni mbage na mbage, amï alingbi tere.

¹¹Koli ni ahaka yongo ti lege so ayeke na yanga ni, na mbage ti ya ni, ayo kudee baleoko na ota; ndo so lege ni asigigi na ya ti yanga ni akono gi kudee baleoko.

¹²Mbeni kete dere ayeke na dawa ti akubu ti asanziri oko oko; dere ni so ayo kudee oko mbage na mbage. Akubu ti asanziri ni ayo kudee omene mbage na mbage.

¹³Koli ni ahaka yanga ni, ti londo na nda ti mbeni kubu ti sanziri ngbii asi na nda ti mbeni kubu ni; ayo kudee baleuse na oku. Ayanga ti akubu ni abaa le ti tere.

¹⁴Lo haka nga kota kubu ni; ayo kudee baleomene. Gbagba ti kota da ni angoro kota kubu ni mbage na mbage.

¹⁵Ti londo na lege so ayeke na dawa ti yanga ti gbagba ni asi na yanga ti kota kubu ni na mbeni mbage ni, ayo kudee baleoku.

¹⁶Afenetere so a sara gbanda ti wen na tere ni ayeke na tere ti akubu ti asanziri angoro ada ni kue nga na tere ti adere ti da ni na mbage ti ya ni. Afenetere ni angoro nga kota kubu kue na mbage ti ya ni. A leke limo ti amaboko ti keke ti mburu na tere ti adere ti ada ni.

¹⁷Koli ni amu mbi, ague na mbi na ya ti gbagba ti gigi ni. A leke ada baleota na tere ti gbagba ni, angoro ni kue; a leke ndö ti sese ti ya ti gbagba ni na têne, angoro ni kue.

¹⁸A leke ndö ti sese ti dawa ti ayanga ti ada ni na têne alingbi na yongo ti ayanga ti ada ni nde nde; ndö ti sese so a leke na têne na mbage ti gbeni laa.

¹⁹Lo haka yongo ti popo ti yanga ti gbagba ti gigi ni ngbii asi na yanga ti gbagba ti ya ni. Yongo ni kue kudee ngbangbo oko. So ti mbage ti To na ti mbage ti Banga laa.

²⁰Lo haka yanga ti gbagba ni so ayeke na mbage ti Banga ti ya ti gbagba ti gigi ni; lo haka ni mbage na mbage.

²¹Akubu ti asanziri ti ya ti gbagba ni, ota na mbage, ota na mbeni mbage, adere ti akubu ni nga na kota kubu ni kue ayo alingbi tere na yanga ni so ayeke na mbage ti To; ayo kudee baleoku na mbage, kudee baleuse na oku na mbeni mbage.

²²Afenetere ni, kota kubu ni nga na amaboko ti keke ti mburu so a leke na tere ni ayo alingbi na yanga ni so ayeke na mbage ti To. Titene zo ague kâ, alingbi lo mondee eskalie, lo bi gere fani mbarambara. Eskalie ni ayeke na dawa ti kota kubu ni.

²³Mbeni yanga ti gbagba ni na mbage ti ya ni abaa le na yanga ti gbagba ti gigi ni so ayeke na mbage ti Banga, tongana ti yanga ti mbage ti To. Koli ni ahaka lege, ti londo na yanga ni ti ya ni asi na yanga ni ti gigi ni; ayo kudee ngbangbo oko.

²⁴Na pekoni, lo mu mbi, lo gue na mbi na mbage ti Mbongo. Mbeni yanga ti gbagba ni nga ayeke kâ. Lo haka akubu ni nga na adere ni. Yongo ni kue alingbi tere na akozo yanga ni use.

²⁵Yanga ni na kota kubu ni ayeke na afenetere so angoro ni kue. Afenetere ni akpa tere na ti kozo yanga ni. Yanga ni ayo kudee baleoku na mbage, kudee baleuse na oku na mbeni mbage.

²⁶Titene zo ague na yanga ni so ayeke na mbage ti Mbongo, lo yeke mondee eskalie, lo bi gere ti lo lege mbarambara. Eskalie ayeke na dawa ti kota kubu ni. A leke amaboko ti keke ti mburu na tere ti adere ni mbage na mbage.

²⁷Mbeni yanga ti gbagba ni ti ya ni ayeke na mbage ti Mbongo. Koli ni ahaka lege, ti londo na mbage ti yanga ti gbagba ti ya ni asi na yanga ni ti mbage ti gigi; ayo kudee ngbangbo oko.

²⁸Koli ni amu mbi, e li na ya ti gbagba ti ya ni, e mu lege ti yanga ni so ayeke na mbage ti Mbongo. Lo haka yanga ni so; ayo alingbi tere na atanga ni.

²⁹Akubu ti asanziri, adere ni nga na kota kubu ni, yongo ti ala kue alingbi tere na atanga ni. Yanga ti gbagba ni nga na kota kubu ni ayeke na afenetere so angoro ni kue; ayo kudee baleoku na mbage, kudee baleuse na oku na mbeni mbage.

³⁰Akota kubu angoro tere ti gbagba ni kue, ayo kudee baleuse na oku na mbage, kudee oku na mbeni mbage.

³¹Kota kubu ti yanga ni ayeke na mbage ti gbagba ti gigi. A leke amaboko ti keke ti mburu na tere ti adere ni. Titene zo ague kâ, lo yeke mondee eskalie, lo bi gere ti lo lege miombe.

³²Koli ni amu mbi, ague na mbi na ya ti gbagba ni na mbage ti To. Lo haka yanga ni; ayo alingbi tere na atanga ni.

³³Akubu ti asanziri ni, adere ni nga na kota kubu ni, yongo ti ala kue alingbi tere na atanga ni. Yanga ni nga na kota kubu ni ayeke na afenetere so angoro ni kue; ayo kudee baleoku na mbage, kudee baleuse na oku na mbeni mbage.

³⁴Kota kubu ni ayeke na mbage ti gbagba ti gigi. A leke amaboko ti keke ti mburu na tere ti adere ni mbage na mbage kue. Titene zo ague kâ, lo yeke mondee eskalie, lo bi gere ti lo lege miombe.

³⁵Koli ni ague na mbi na yanga ni so ayeke na mbage ti Banga. Lo haka yanga ni; yongo ni alingbi tere na atanga ni.

³⁶Akubu ti asanziri, adere ni nga na kota kubu ti yanga ni ayeke daa, afenetere angoro ni kue; ayo kudee baleoku na mbage, kudee baleuse na oku na mbeni mbage.

³⁷Kota kubu ni ayeke na mbage ti gbagba ti gigi. A leke amaboko ti keke ti mburu na tere ti adere ni mbage na mbage. Titene zo ague kâ, lo yeke mondee eskalie, lo bi gere ti lo lege miombe.

³⁸Na ya ti kota kubu, lege ayeke daa ti li na ya ti mbeni kete da so ayeke na tere ti kota kubu ni. Na ya ti kete da so laa a yeke sukula anyama so a yeke gbi ni kue na wâ.

³⁹Na gbe ti kota kubu ti yanga ti da ni, ameza ayeke daa; use na mbage, use na mbage. Na ndö ti ameza ni so laa a yeke fâ go ti anyama so a yeke mu na *sandaga, so ti tene anyama so a yeke gbi ni kue na wâ nga na anyama so azo amu na sandaga titene Nzapa azi sioni na li ti ala.

⁴⁰Na gigi ti da ni so, ameza osio ayeke nga daa. Tongana mo gue na yanga ni so ayeke na mbage ti Banga, mo yeke baa ameza ni, use na mbage, use na mbage.

⁴¹Tongaso, na yanga ti da ni, ameza kue ayeke miombe so a yeke fâ go ti anyama ti mungo na sandaga na ndö ni, osio na mbage, osio na mbage.

⁴²Ameza osio ndali ti sandaga so a yeke gbi ni kue na wâ, a leke ni na têne so a de tere ni dengo; ayo kudee oko na ndambo na mbage; kudee oko na ndambo na mbeni mbage; yongo ni na nduzu kudee oko. Na ndö ti ameza ni so, ala zia aye ti fango na go ti anyama so a yeke mu na sandaga ti gbingo ni kue na wâ nga na tanga ti sandaga ni.

⁴³Na yanga ti ameza ni, ala leke du angoro ni kue; du ni ayo alingbi na maboko oko. Na ndö ti ameza ni, ala zia akasa ti mungo na asandaga.

⁴⁴Na ya ti gbagba ni, na tere ti yanga ti gbagba ni, ada ayeke daa ndali ti azo ti hengo bia. Oko ayeke na tere ti yanga ni so ayeke na mbage ti Banga, yanga ni abaa ndo na mbage ti Mbongo; mbeni ayeke na tere ti yanga ni so ayeke na mbage ti Mbongo, yanga ni abaa ndo na mbage ti Banga.

⁴⁵Koli ni atene na mbi: “Da so yanga ni abaa ndo na mbage ti Mbongo ayeke ndali ti awayango-sandaga so ayeke sara kua na ya ti kota da ni.

⁴⁶Da so yanga ni abaa ndo na mbage ti Banga ayeke ndali ti awayango-sandaga so ayeke sara kua na tere ti gbalaka. Na popo ti *ahale ti Lévi, gi ahale ti Sadok laa ayeke ga nduru na KOTA GBIA ti sara kua ti lo.”

⁴⁷Koli ni ahaka ya ti gbagba ni na mbage ti ya ni; ayo kudee ngbangbo oko na mbage; kudee ngbangbo oko na mbeni mbage. Mbage na mbage kue, yongo ni alingbi tere. Gbalaka ayeke na dawa ti kota da ni.

⁴⁸Koli ni ague na mbi na ya ti kubu so a yeke hon daa ti li na kota da ni. Lo haka adere ni, ayo kudee oku na mbage, kudee oku na mbeni mbage. Yanga ni ayo kudee ota na mbage, kudee ota na mbeni mbage.

⁴⁹Kubu ni ayo kudee baleuse na mbage, kudee baleoko na use na mbeni mbage. Titene zo ague kâ, lo yeke mondee eskalie. Na tere ti adere ni, akota ngbongboro gere ni ayeke daa mbage na mbage.