Read La Bible en Sango courant – Mbeti ti Nzapa Ezekiel 41 Bible Online

Ezekiel 41 - La Bible en Sango courant – Mbeti ti Nzapa bible

Ezekiel 41

¹Koli ni ague na mbi na ya ti kota kubu ti kota da ti Nzapa. Lo haka kubu so a yeke hon daa ti li na ya ti kota kubu ni; adere ni ayo kudee omene na mbage, omene na mbeni mbage.

²Yanga ti da ni akono kudee baleoko. Tere ti yanga ti da ni kudee oku na mbage, oku na mbeni mbage. Lo haka ya ti da ni, ayo kudee baleosio na mbage, kudee baleuse na mbeni mbage.

³Koli ni ali na ya ti da si lo haka kubu so ayeke na ngbonda ni. Adere ti yanga ni ayo kudee use. Yanga ni, ya ni azi kudee omene; yanga ni ayo kudee mbarambara.

⁴Lo haka yongo ti kubu ni, ayo kudee baleuse, kudee baleuse na mbeni mbage. Lo tene na mbi, lo tene: “Ndo so ayeke nde si ayeke nzoni kue ahon atanga ni laa.”

⁵Lo haka dere ti kota da ni, ayo kudee omene. Akubu so agbu tere na kota da ni si angoro ni kue so, ayo kudee osio.

⁶Ti akubu ni, kubu oko ayeke na ndö ti mba ti lo, kubu oko na ndö ti mba ti lo; kue etaze ota. Mbage ni ayeke na akubu baleota, mbeni mbage ni ayeke na akubu baleota. A sara kubu oko oko ali na ya ti dere ti gigi, me ali na ya ti dere ti kota da ti Nzapa ti ya ni pepe.

⁷Etaze oko oko so angoro kota da ni, ti londo na gbeni ti gue na nduzu, ya ti akubu ni ayeke kono konongo, ngbanga ti so dere ti kota da ni akono na mbage ti gbeni si ayeke kete na mbage ti nduzu. Zo alingbi ti londo na kozo etaze ni ti gue na use ni, na pekoni, lo si na ota ni.

⁸Na tere ti kota da ni, mbi baa akubu angoro ni kue. Akubu ni ayo na nduzu ahon atanga ti ada na kudee omene.

⁹Konongo ti dere ti akubu ni na mbage ti gigi ayeke kudee oku. Ndo so angba senge na popo ti akubu ti tere ti kota da ni

¹⁰na atanga ti da ni, ayo kudee baleuse, angoro kota da ni kue.

¹¹Ayanga ti akubu so angoro tere ti kota da ni na mbage ti ndo so angba senge so ayeke use: mbeni ayeke na mbage ti Banga, mbeni ayeke na mbage ti Mbongo. Ndo so angba senge so, gbagba angoro ni si ayo kudee oku.

¹²Mbeni da ayeke na mbage ti Do ti kota da ni abaa le na ndo so angba senge; da ni ayo kudee balegumbaya na mbage, kudee balembarambara na mbage. Konongo ti dere ti da ni kudee oku.

¹³Koli ni ahaka kota da ti Nzapa ni, ayo kudee ngbangbo oko na mbage. Ndo so angba senge, da ti mbage ti Do nga na dere ti da ni kue, ayo kudee ngbangbo oko nga.

¹⁴Dawa ti yanga ti kota da ni nga na dawa ti ya ti gbagba ni na mbage ti To, ayo kudee ngbangbo oko.

¹⁵Koli ni ahaka da so ayeke na peko ti kota da ni; lo haka ni nga na alege ni mbage na mbage, ayo kudee ngbangbo oko. Kubu so a yeke hon daa ti li na ya ti kota da, kota da ni na kubu so ayeke na ngbonda ti da ni, a pika keke na tere ti dere ni, na mbage ti ya ni.

¹⁶Akadere ti afenetere ni, alege so ahon na tere ti a-etaze ota ni, kue a pika keke na tere ni. Ala kanga keke ni na ndo kue, ti londo na sese ngbii asi na afenetere. Ataa afenetere, a pika keke na tere ni.

¹⁷Na tere ti kota da, na gigi nga na ya ni, ti londo na yanga ti da ni ngbii asi na ngbonda ni, ala leke mbeni ndo

¹⁸ti lekengo na alimo ti *asheruben nga na amaboko ti keke ti mburu. Maboko ti keke ti mburu oko na popo ti asheruben use. Sheruben oko oko, le ti lo ayeke use:

¹⁹le oko ayeke tongana le ti zo, abaa ndo na mbage ti maboko ti keke ti mburu; le oko ayeke tongana le ti bamara, abaa ndo na mbage ti mbeni maboko ti keke ti mburu ni. A leke alimo na dere ti da ni angoro ni kue

²⁰Ti londo na sese ngbii asi na nduzu ti yanga ti da ni, na dere ti kota da ni, a leke asheruben nga na amaboko ti keke ti mburu.

²¹Ti kadere ti yanga ti kota da, keke ni oko akono mbage na mbage, alingbi tere. Na dawa ti ndo so ayeke nde si ayeke nzoni kue ahon atanga ni, mo yeke baa mbeni ye so akpa

²²gbalaka so a leke na keke. Gbalaka ni ayo na nduzu kudee ota, kudee use na mbage. Andangoro ni, agere ni nga na atere ni ayeke na keke. Koli ni atene na mbi: “Meza so a zia na dawa ti KOTA GBIA laa.”

²³Yanga ti kota da ni, na yanga ti ndo so ayeke nde si ayeke nzoni kue ahon atanga ni ayeke use.

²⁴Akeke ti yanga ti da ni oko oko ayeke use si ayeke turne turnengo na tere ti yanga ni.

²⁵Na tere ti ayanga ti kota da ni, ala leke asheruben nga na amaboko ti keke ti mburu tongana ti so ala leke na tere ti da ni. Ala pika keke na dawa ti kota kubu ni na gigi.

²⁶Afenetere so a kanga gbanda ti wen na tere ni nga na amaboko ti keke ti mburu ayeke mbage na mbage na tere ti kota kubu ni, na tere ti akubu so ayeke na tere ti kota da ni nga na tere ti yanga ti da ni.