Read La Bible en Sango courant – Mbeti ti Nzapa Ezekiel 44 Bible Online

Ezekiel 44 - La Bible en Sango courant – Mbeti ti Nzapa bible

Ezekiel 44

¹Koli ni amu mbi, akiri na mbi na mbage ti yanga ti gbagba ni ti gigi so ayeke na mbage ti To ti da so ayeke nde si ayeke nzoni kue. Yanga ni akanga kangango.

²*KOTA GBIA atene na mbi: “Yanga ni so ayeke ngba na kangango ni; zo oko ayeke zi ni pepe. Zo oko ayeke hon daa pepe, ngbanga ti so mbi KOTA GBIA, Nzapa ti Israel, mbi li na ndo so awe. Fade ayeke ngba na kangango ni.

³Me makonzi ti kodro alingbi ti duti na ndo so ti te kobe na dawa ti mbi KOTA GBIA. Lo yeke li na ya ti kota kubu ti yanga ni si lo sigigi gi na oko lege ni so.”

⁴Koli ni amu mbi, ague na mbi na yanga ti gbagba ni ti mbage ti Banga, na dawa ti kota da ni. Mbi baa ndo si mbi baa gonda ti KOTA GBIA asi singo na ya ti kota da ni. Mbi kuku, mbi kpo li ti mbi na sese.

⁵KOTA GBIA atene na mbi: “*Molenge ti zo, le ti mo akpengba ngangu; zi le ti mo, mo baa ndo nzoni, zi mê ti mo, mo ma tënë so kue mbi ga ti tene na mo na ndö ti andia nga na akpengba tënë ndali ti kota da ni. Le ti mo akpengba ngangu na ndö ti andia so ayeke ndali ti lingo ti azo na ya ti kota da ni nga na sigingo ti ala na ndo so a zia ni nde ndali ti mbi.

⁶“Fade mo yeke tene na azo ti Israel, azo ti ngangu li so, mo tene: Tënë so Kota Gbia NZAPA atene ayeke so: Ala azo ti Israel, asioni sarango ye ti ala kue so zo alingbi ti baa na le ti lo fani use pepe so, ahon ndoni awe!

⁷Na ndembe so ala ga ti mu na mbi kobe so ayeke ti mbi, mafuta nga na mene ti anyama so a mu na *sandaga, ala mu lege na awande so afâ *ganza pepe si ala fâ ganza ti be pepe ti li na ndo so a zia ni nde ndali ti mbi. Na sarango ye tongaso, ala sara si kota da ti mbi aga *sioni. Na lege ti asarango ye ti ala so zo alingbi ti baa na le ti lo fani use pepe so, ala buba ya ti *mbuki so abongbi mbi na ala.

⁸Ala wani asara kua pepe na ndo so a zia ni nde ndali ti mbi, me ala mu kua ni na awande titene ala sara ni na plase ti ala.

⁹Tënë so mbi Kota Gbia NZAPA, mbi tene ayeke so: Wande oko so afâ ganza pepe si afâ ganza ti be pepe, lo yeke kiri ti li pepe na ndo so a zia ni nde ndali ti mbi; ataa wande ni ayeke lango na popo ti azo ti Israel.”

¹⁰“Azo ti mara ti Lévi so ahon yongoro na tere ti mbi na ngoi so azo ti Israel amu lege ti kirikiri, ala do mbi azia si ala gue na peko ti ayanda. Ti azo ti mara ti Lévi ni so, fade sioni ti ala ayeke ngba na li ti ala.

¹¹Na ndo so a zia ni nde ndali ti mbi, ala yeke duti tongana asenge zo ti kua ti bata yanga ti da, ti sara ambeni kua nde nde. Ala yeke fâ go ti anyama so a mu ndali ti asandaga so a gbi ni kue na wâ nga ndali ti tanga ti asandaga nde nde. Ala yeke sara kua ndali ti azo ti kodro.

¹²Ndali ti so ala sara kua na azo ni na ngoi so ala mu peko ti ayanda, ala sara si azo ti Israel ati na ya ti siokpari. Ndani laa mbi yeke ga na tere ti ala; fade sioni ti ala ayeke ngba na li ti ala. So tënë ti yanga ti Kota Gbia NZAPA laa.

¹³Fade ala yeke ga nduru na mbi pepe titene ala sara kua ti yango *sandaga na mbi. Ala yeke ga nduru pepe na tere ti aye so a bata ni nde ndali ti mbi, wala na tere ti ndo so ayeke nde si ayeke nzoni kue ahon atanga ni. Ye ti kamene so ala sara nga na asioni sarango ye ti ala so zo alingbi ti baa na le ti lo fani use pepe so, fade aye ni ayeke ngba na li ti ala.

¹⁴Mbi yeke zia ala ti sara gi asenge kua na ya ti kota da ni. Ala yeke sara akua kue so a yeke sara na ya ti da ni.”

¹⁵“Awayango-sandaga so ayeke azo ti mara ti Lévi, *ahale ti Sadok so asara kua na ndo so a zia ni nde ndali ti mbi na ngoi so azo ti Israel ahon kirikiri yongoro na tere ti mbi, awayango-sandaga so laa ayeke ga nduru na mbi ti sara kua na mbi. Ala yeke luti na dawa ti mbi ti mu na mbi mafuta ti anyama nga na mene ti anyama so a mu na *sandaga. So tënë ti yanga ti Kota Gbia NZAPA laa.

¹⁶Ala laa ala yeke li na ndo so a zia ni nde ndali mbi, ala yeke ga nduru na tere ti meza ti mbi ti sara kua na mbi. Ala yeke bata lege ti kua ni.

¹⁷Tongana ala li na ya ti gbagba ti ya ni, fade ala yu abongo so a sara na *len. Tongana ala yeke sara kua na yanga ti gbagba ti ya ni nga na ya ti kota da ni, ala yeke yu abongo so a sara na kua ti tere ti taba pepe.

¹⁸Ala yeke yu na li ti ala kpoto so a sara na len, ala yeke yu na ngbonda ti ala kilote so a sara na len. Ala yeke kanga kamba na ndö ti bongo pepe titene gbiki amu ala mingi pepe.

¹⁹Tongana ala sigigi ti gue na ya ti gbagba ti gigi, na ndo so azo ayeke duti daa, fade ala yeke zi abongo so ala yeke yu ti sara na kua, ala zia ni na ya ti akubu ti tere ti kota da ni si ala yeke yu ambeni bongo nde. Tongaso si azo aga nduru pepe na abongo so a zia nde ti sara na kua na dawa ti *KOTA GBIA.

²⁰“Awayango-sandaga ayeke kio kua ti li ti ala pepe; ala yeke zia kua ti li ti ala ayo mingi pepe, me ala yeke fâ kua ti li ti ala ni nzoni.

²¹Tongana mbeni wayango-sandaga aye ti li na ya ti gbagba ti ya ni, lo lingbi ti nyon vin pepe.

²²Wayango-sandaga alingbi ti mu wali-mua pepe, wala wali so koli ti lo atumba lo. Me lo lingbi ti mu mbeni maseka-wali na popo ti azo ti Israel ti ga wali ti lo, wala mbeni wali ti wayango-sandaga so akui awe.

²³“Awayango-sandaga ayeke fa na azo ti mbi ti hinga popo ti ye so ayeke nde si ayeke nzoni kue nga na ye so ayeke senge ye. Ala yeke fa nga na azo ni ti hinga popo ti ye so ayeke *sioni na ye so ayeke *nzoni.

²⁴Tongana mbeni tënë alondo, ala laa ayeke fâ ngbanga ni; ala yeke fâ ngbanga ni alingbi na andia ti mbi. Ala yeke sara ye alingbi na akpengba tënë ti mbi nga na ambela ti mbi so mbi mu ndali ti amatanga ti mbi. Ala yeke sara titene azo abata *lango ti wungo tere nde ndali ti mbi.

²⁵“Wayango-sandaga alingbi ti ga nduru na tere ti mbeni kuâ pepe, tongaso pepe, lo yeke ga *sioni. Me lo lingbi ti ga *sioni na gango nduru na tere ti kuâ ti babâ ti lo, ti mama ti lo, ti molenge ti lo ti koli, ti molenge ti lo ti wali, ti ita ti lo ti koli wala ti ita ti lo ti wali so ade ti mu koli pepe.

²⁶Tongana lo *sukula sioni ni ti lo awe, na pekoni lo ku lango mbarambara si lo gue na ya ti kota da ti Nzapa.

²⁷Lango so lo yeke li na ya ti gbagba ti ya ni, ti gue na da so ayeke nde si ayeke nzoni kue, fade lo yeke mu sandaga ndali ti siokpari ti lo; so tënë ti yanga ti Kota Gbia NZAPA laa.

²⁸Awayango-sandaga ayeke sara kua na mbi. Fade a yeke mu na ala mbeni sese na sese ti Israel ti ga ti ala pepe. Mbi laa mbi ga ye ti ala ni.

²⁹Ala laa ayeke te akobe so kue azo ayeke mu na Nzapa, anyama so a yeke mu na sandaga ndali ti siokpari nga na sandaga ti lekengo tënë. Na Israel, aye so kue azo azia nde biani biani ndali ti mbi ayeke ti ala.

³⁰Akozo pendere kobe ti ayaka ti ala, nga na anzoni ye so kue ala ya na Nzapa ayeke ga ye ti awayango-sandaga. Anzoni farini ti ala, fade ala yeke mu ni na awayango-sandaga. Tongaso si tufa aga na ya ti da ti ala.

³¹Me mbeni nyama so akui kuingo, wala nyama so mbeni mba ti lo asuru ya ti lo surungo, ataa andeke wala ambeni nyama nde, fade awayango-sandaga ayeke te ni pepe.”