Read La Bible en Sango courant – Mbeti ti Nzapa Ezekiel 45 Bible Online

Ezekiel 45 - La Bible en Sango courant – Mbeti ti Nzapa bible

Ezekiel 45

¹“Tongana ala yeke kangbi ande sese ni, ala bata mbeni ndali ti *KOTA GBIA, ala zia ni nde ndali ti lo. Fade ayo kudee 25 000 na mbage, kudee 20 000 na mbeni mbage; sese ni kue ayeke nde si ayeke nzoni kue.

²Na ndo ni so, ala bata mbeni sese ndali ti da so ayeke nde si ayeke nzoni kue; sese ni ayo kudee 500 mbage na mbage osio kue. Mbeni ndo so angba senge angoro sese ni kue, ayo kudee 50.

³Ndo so ala bata ndali ti KOTA GBIA so, mo haka ni kudee 25 000 na mbage, kudee 10 000 na mbeni mbage titene ala sara da so ayeke nde si ayeke nzoni kue daa, so ti tene da so ayeke nde si ayeke nzoni kue ahon atanga ni.

⁴So ayeke mbage ti sese so ayeke nde si ayeke nzoni kue. A zia ni nde ndali ti awayango-sandaga so ayeke ga nduru na KOTA GBIA ti sara kua na lo na ya ti da so ayeke nde si ayeke nzoni kue. Na ndo so laa a yeke sara ada ti lango ti awayango-sandaga daa. Ndo ni so, a zia ni nde nga ndali ti da so ayeke nde si ayeke nzoni kue.

⁵Mbeni sese ni ayo kudee 25 000 na mbage, kudee 10 000 na mbeni mbage, sese ni ayeke ndali ti azo ti mara ti Lévi, ala so ayeke sara kua na ya ti kota da ni. Fade a yeke leke agbata ti ala daa titene ala lango daa.

⁶Na tere ti sese so ala bata ndali ti KOTA GBIA so, fade ala haka kudee 5 000 na mbage, kudee 25 000 na mbeni mbage titene a sara gbata daa ndali ti azo ti Israel kue.

⁷Ti makonzi, fade ala yeke mu na lo sese na tere ti da so ayeke nde si ayeke nzoni kue, na tere ti gbata ni. Ndo ni ayeke londo na mbage ti Do ngbii asi na kota ngu-ingo ti Mediterane; akiri alondo na mbage ti To ngbii asi na yanga ti sese ti Israel. Yongo ti sese ni alingbi na ti amara oko oko nga.

⁸Sese ni ayeke ga ye ti amakonzi na sese ti Israel. Tongaso si ala kiri ti te azo ti mbi na mbana pepe. Fade ala yeke zia sese angba na azo ti Israel, na lege ti amara oko oko.”

⁹Tënë so Kota Gbia NZAPA atene ayeke so: “Ala amakonzi ti Israel, ala sara ye ni ahon ndoni awe! Ala zia ti sara ngangu na azo, ti nzi aye ti azo. Ala sara ye na legeni; ala fâ ngbanga mbirimbiri; ala zia ti mu ye ti azo ti mbi na ngangu. So tënë ti yanga ti Kota Gbia NZAPA laa.

¹⁰“Alingbi kilo ti ala ayeke na legeni si ye ti hakango na ye ayeke nga na legeni.

¹¹Alingbi sembe ti hakango na le ti kobe so a iri ni efa, na kota ta ti hakango na vin so a iri ni bat, akono alingbi tere. A yeke haka efa wala bat baleoko si alingbi na homer oko. Titene efa na bat ayeke na legeni, alingbi a haka ni na homer.

¹²Kota le ti nginza oko alingbi akete le ni baleuse. A mu akota le ti nginza baleomene si alingbi na ngbongboro ni oko.

¹³“Ala yeke zi mbeni mbage ti akobe ti mu na *sandaga tongaso: na popo ti asembe ti *ble na ti *orze baleomene, ala zi sembe oko.

¹⁴Ala yeke zi mbage ti mafuta ti mu na sandaga. Na popo ti ta ti mafuta 100, ala yeke zi ta oko. Ala yeke haka mafuta na bat; bat baleoko laa alingbi na homer oko, bat baleoko alingbi nga na kor oko.

¹⁵Na popo ti ataba wala angasa so ayeke na Israel, ala zi nyama oko na popo ti anyama 200. Aye so kue ala zi ayeke ndali ti sandaga, ndali ti sandaga so ayeke gbi ni kue na wâ, nga na sandaga ti beoko, titene Nzapa azi sioni na li ti ala. So tënë ti yanga ti Kota Gbia NZAPA laa.

¹⁶“Fade azo ti kodro kue ayeke mu na makonzi ti Israel aye so ala zi na popo ti aye ti ala.

¹⁷Kua ti makonzi ni ayeke titene lo mu sandaga so a yeke gbi ni kue na wâ, asandaga ti ale ti kobe nga na sandaga ti samba na ngoi ti amatanga; na lango ti matanga ti fini nze, na *lango ti wungo tere nga na amatanga kue ti azo ti Israel. Fade makonzi ayeke mu sandaga titene Nzapa azi sioni na li ti azo, asandaga nde nde, sandaga so a yeke gbi ni kue na wâ nga na asandaga ti beoko titene Nzapa azi sioni na li ti azo ti Israel.”

¹⁸Tongaso, tënë so Kota Gbia NZAPA atene ayeke so: “Na kozo lango ti kozo nze, fade mo yeke mu koli-bagara so mbeni mbage ti tere ti lo abuba pepe ti zi sioni na tere ti da so ayeke nde si ayeke nzoni kue.

¹⁹Wayango-sandaga ayeke mu mene ti nyama ti sandaga so, lo sara na tere ti kadere ti yanga ti da ni, na tere ti andangoro osio ti ngbongboro gere ti gbalaka ni nga na tere ti kadere ti yanga ti gbagba ti ya ni.

²⁰Na lango mbarambara ti nze ni, fade mo sara gi oko ye so ndali ti azo so aleke fade na be ti ala ti sara sioni pepe si ala sara ni so. Tongaso si mo zi sioni ti da ni.

²¹“Na lango baleoko na osio ti kozo nze ni, fade ala yeke to nda ti sarango *matanga ti Pake. Matanga ni ayeke sara lango mbarambara; na matanga ni ala yeke te mapa so a sara na mama ni pepe.

²²Na kozo lango ti Pake ni, makonzi ni ayeke mu koli-bagara na sandaga titene Nzapa azi sioni na li ti lo nga na li ti azo ti Israel kue.

²³Na ya ti alango mbarambara ti matanga ni, na ya ti lango oko oko, makonzi ni ayeke mu akoli-bagara mbarambara, akoli-taba mbarambara so mbeni mbage ti tere ti ala abuba pepe ti mu na sandaga so a yeke gbi ni kue na wâ; lo yeke mu nga koli-ngasa oko ti mu na sandaga titene Nzapa azi sioni na li ti azo.

²⁴Lo yeke mu kilo ti ble baleota na litere ti mafuta omene ndali ti koli-bagara oko oko nga ndali ti koli-taba oko oko.

²⁵“Ti matanga so ayeke to nda ni na lango baleoko na oku ti nze mbarambara ni, makonzi ni ayeke mu gi a-oko sandaga tongana ti matanga ti Pake; na ya ti lango mbarambara, lo yeke mu gi oko sandaga ni titene Nzapa azi sioni na li ti azo; lo yeke mu gi oko sandaga so a yeke gbi ni kue na wâ; lo yeke mu gi oko ble na mafuta ni.”