Read La Bible en Sango courant – Mbeti ti Nzapa Daniel 10 Bible Online

Daniel 10 - La Bible en Sango courant – Mbeti ti Nzapa bible

Daniel 10

¹Na ngu ota ni so Sirus ayeke gbia ti Perse, a fa na Daniel, lo so a di iri ti lo Beltasar, mbeni tënë so alondo na Nzapa. Tënë ni ayeke taa-tënë si afa tënë ti kota ye ti mawa so ayeke si. Daniel agbu li ti lo daa mingi si lo hinga nda ti tënë ni na lege ti ye so lo baa na ya ti mbeni ye tongana bango-li.

²“Na ngoi ni so, mbi Daniel, mbi sara mua na ya ti yenga ota.

³Mbi ke ti te apendere kobe; ataa nyama wala vin ali yanga ti mbi pepe. Mbi sara mafuta na tere ti mbi pepe ngbii yenga ota so ahunzi.

⁴Na lango baleuse na osio ti kozo nze, mbi yeke na yanga ti kota *bale ti Tigre.

⁵So mbi yo le ti mbi na nduzu, mbi baa mbeni zo aluti, lo yu bongo ti *len si kamba ti ndö ti bongo ti lo ayeke na lôro ti nzoni ni.

⁶Tere ti lo ayeke tongana têne ti ngere ngangu so a iri ni krizolite; le ti lo aza tongana wâ ti bekpa; le so lo yeke baa na ndo ayeke tongana *tanda so aza wâ; maboko ti lo na gere ti lo aza mingi tongana bengba wen so akpaka tere ni. Tongana lo tene tënë, mo baa mo tene gba ti azo laa ayeke tene tënë.

⁷Mbi Daniel, mbi oko laa mbi baa ye so aga na le ti mbi so. Azo so ayeke na tere ti mbi abaa ni pepe. Me kota mbeto agbu ala si ala kpe, ala honde tere ti ala.

⁸Tongaso mbi ngba gi mbi oko si mbi yeke baa kota ye so aga na le ti mbi so. Ngangu ti mbi kue ahunzi; mbeto agbu mbi si mbi ga tongana zo so ayeke kui; mbi woko kue.

⁹Mbi ma zo ni, lo yeke tene tënë. Gi so mbi ma lo, mbi hon na ndö ti yingo ti mbi si mbi ti mbi kpo li ti mbi na sese.

¹⁰Tongaso, mbeni maboko andu mbi si ayo mbi, mbi luti na ndö ti likunu ti mbi nga na ndö ti maboko ti mbi; tere ti mbi ayeke do.

¹¹Zo ni atene na mbi, atene: ‘Daniel, mo so Nzapa aye mo mingi: mo ma ya ti tënë so nzoni. Mo luti na nduzu mbirimbiri, ngbanga ti so a tokua mbi fadeso na mo.’ Gi so lo tene tënë so na mbi, mbi luti na nduzu, tere ti mbi ayeke do.

¹²Lo kiri lo tene: ‘Daniel, sara mbeto pepe. Ti londo na kozo lango so lani mo mu be ti mo titene mo hinga ye so asi si mo sara tere ti mo kete so, Nzapa ama sambela ti mo awe. Nilaa mbi ga na mbage ti mo ti kiri tënë na mo.

¹³Me *ange so ayeke bata kodro ti Perse agbanzi lege na mbi na ya ti lango baleuse na oko. Na pekoni, Michel, oko ti akota makonzi ti a-ange aga ti mu maboko na mbi. Tongaso mbi ngba kâ na tere ti agbia ti Perse.

¹⁴Fadeso mbi ga ti sara si mo hinga ye so ayeke si gbanda na azo ti mo. Baa, ye so mo baa tongana bango-li so ayeke kiri ti duti daa ndali ti alango so.’

¹⁵“So lo ngba ti tene atënë so na mbi, le ti mbi angba lakue ti baa ndo na sese si yanga ti mbi akanga.

¹⁶Me mbeni ye so akpa zo andu poro ti yanga ti mbi; yanga ti mbi azi si mbi to nda ti tene tënë. Mbi tene na zo so aluti na dawa ti mbi so, mbi tene: ‘Babâ, ye so mbi baa tongana bango-li so asara si be ti mbi ayeke na siriri pepe; mbi woko kue awe.

¹⁷Mbi yeke gi senge zo ti kua ti babâ. Mbi lingbi ti tene tënë na zo tongana mo so tongana nyen? Baa fadeso, mbi yeke na ngangu pepe si pupu ti ya ti mbi ayeke nga daa pepe!’

¹⁸Biaku, ye so akpa zo so akiri andu mbi si mbi kiri mbi wara ngangu.

¹⁹Na pekoni, lo tene na mbi, lo tene: ‘Mo koli so Nzapa aye lo mingi so, mo sara mbeto pepe! Ayeke nzoni mo duti na siriri! Wara ngangu, kpengba tere ti mo!’ So lo yeke tene tënë na mbi, ngangu ti mbi ato nda ti ga daa si mbi tene na lo, mbi tene: ‘Babâ, mo lingbi ti tene tënë senge, ngbanga ti so mo mu na mbi ngangu awe.’

²⁰Lo hunda mbi, lo tene: ‘Mo hinga nda ni so mbi ga na mbage ti mo? Fadeso mbi yeke kiri ti tiri bira na ange so ayeke bata kodro ti Perse. Gi so mbi sigigi ti gue, ange so ayeke bata kodro ti Grese asi.

²¹Me mbi yeke fa na mo ye so a su na ya ti mbeti ti taa-tënë. Zo oko ti mu maboko na mbi titene mbi tiri na awato so ayeke daa pepe, gi Michel oko so ayeke ange so ayeke bata azo ti Israel.