Read La Bible en Sango courant – Mbeti ti Nzapa Daniel 12 Bible Online

Daniel 12 - La Bible en Sango courant – Mbeti ti Nzapa bible

Daniel 12

¹“*Ange ni akiri atene na mbi: ‘Na ngoi ni kâ, Michel, kota makonzi ti a-ange so ayeke bata azo ti mara ti mo ayeke si. Fade ngoi ni ayeke duti ngoi ti ngangu. Ti londo na ngoi so amara nde abaa gigi ngbii asi na lâ ni kâ, mara ti ngoi so ade ti duti daa laoko pepe. Na ngoi ni so, fade azo ti mara ti mo, ala so a su iri ti ala na mbeti ti fini, ayeke soo kuâ.

²Azo mingi so alango na ndo ti akuâ ayeke zingo: ambeni ayeke zingo ti duti na fini so angba lakue lakue si ambeni ayeke zingo ti wara kamene nga ti baa pasi so ayeke sioni mingi lakue lakue.

³Azo so le ti ala ahan, fade ala yeke za tongana lumiere ti le ti nduzu. Azo so amu maboko na ambeni zo mingi ti ga azo ti mbirimbiri, fade ala yeke su lakue lakue tongana atongoro.

⁴‘Me ti mo Daniel, mo honde tënë so hondengo. Kozo si lango ti ndani alingbi, tënë so a su na ya ti mbeti so, mo fa ni na gigi pepe. Fade gba ti azo ayeke diko mbeti ni si hingango ndo ti ala ayeke kono.’ ”

⁵“Mbi Daniel, mbi yeke baa ndo si mbi baa azo use so ayeke luti na yanga ti ngu, oko na mbage ge, oko na mbage kâ.

⁶Mbeni oko atene na lo so ayu bongo ti *len si lo luti na ndö ti ngu so, atene: ‘Aye ti kpene so ayeke hunzi lawa?’

⁷Lo so ayu bongo ti len si ayeke luti na ndö ti ngu so ayoro maboko ti lo use kue na nduzu. Lo deba yanga ti lo, lo tene: ‘Na iri ti KOTA GBIA so ayeke na fini lakue lakue, mbi deba yanga ti mbi, mbi tene: aye so ayeke ninga ande ngu ota na ndambo. Tongana a zi ngangu kue ti azo ti Nzapa awe si fade aye ni so ayeke hunzi.’

⁸“Mbi Daniel, mbi ma tënë so, me mbi hinga nda ni pepe. Ndani laa mbi hunda ndo, mbi tene: ‘Babâ, aye so kue ayeke hunzi ande tongana nyen?’

⁹Lo kiri tënë na mbi, lo tene: ‘Daniel, mo gue! Tënë so ayeke ngba na hondengo ni, a yeke kpo nzoroko daa, angba tongaso ngbii asi na lango ti ndani.

¹⁰Fade a yeke *sukula sioni ti azo mingi, ala yeke vuru si ala ga *nzoni. Azo ti sioni so ahinga nda ti ye pepe ayeke ngba ti sara asioni ye. Me azo so le ti ala ahan laa ayeke hinga nda ti ye so ayeke si.

¹¹Ti londo na ngoi so a yeke kanga lege ti mungo asandaga ti lango oko oko na Nzapa nga na ngoi so ala yeke zia na ndö ti gbalaka Sioni-kpale-ti-bubango-ndo-kue, lango saki oko ngbangbo use na balegumbaya ayeke hon.

¹²Ti lo nzoni, zo so ayeke ku ngbii lango saki oko ngbangbo ota na baleota na oku alingbi!

¹³Ti mo Daniel, mo gbu ngangu ngbii asi na ndani. Na pekoni, fade mo yeke wu tere ti mo si mo yeke londo titene mo wara aye ti peko ti kua ti mo na lango ti ndani.’ ”