Read La Bible en Sango courant – Mbeti ti Nzapa Daniel 2 Bible Online

Daniel 2 - La Bible en Sango courant – Mbeti ti Nzapa bible

Daniel 2

¹Na ngu use ni so Nabukodonosor ayeke le-gbia, lo baa li ti lo. Li ti lo kue akpe si lo kiri lo lango pepe.

²Tongaso lo mu yanga titene a iri azo ti nganga, azo ti mazi, azo ti yoro na azo nde nde so ayeke baa nda ti aye. Lo iri ala titene ala fa na lo bango-li so lo baa so. So ala si awe, ala gue na dawa ti gbia

³si lo tene na ala, lo tene: “Mbi baa li ti mbi; li ti mbi kue akpe na bango-li ni. Nilaa mbi ye ti hinga nda ti bango-li ni.”

⁴Ala kiri tënë na lo na yanga ti *arameen, atene: “Gbia na nduzu! Mo fa na e, azo ti kua ti mo, bango-li ni si e fa nda ni na mo.”

⁵Gbia akiri tënë na ala, atene: “Mbi mu yanga awe, mbi tene: Tongana ala fa na mbi bango-li ni pepe si ala fa na mbi nda ni pepe, fade a yeke fâ ya ti ala nduru nduru si ada ti ala aga ndo ti azende.

⁶Me tongana ala fa na mbi bango-li ni si ala fa na mbi nda ni, fade mbi yeke mu na ala gba ti amatabisi, mbi yeke futa ala si mbi yeke sara titene azo agonda ala mingi. Tongaso, ayeke nzoni ala fa na mbi bango-li ni si ala fa nda ni na mbi.”

⁷Ti fani use ni, azo ti nganga ni atene na gbia, atene: “Gbia, mo fa na e, azo ti kua ti mo, bango-li ni si e lingbi ti fa nda ni na mo.”

⁸Gbia akiri tënë na ala, atene: “Mbi hinga biani mbi tene, ala yeke gi lege ti wara ngoi, ngbanga ti so ala baa atene, tënë so mbi tene so, mbi luti na ndö ni biani awe.

⁹Tongana ala fa na mbi bango-li ni pepe, fade a yeke fâ gi oko ngbanga na li ti ala kue. Ala ma tere ti tene na mbi gi atënë ti mvene na atënë ti handa ti sara si ye ni aga nde. Mbi ye titene ala fa na mbi gi bango-li ni. Tongaso si mbi hinga, mbi tene, ala yeke na ngangu ti fa nda ni na mbi.”

¹⁰Azo ti nganga ni atene na gbia, atene: “Gbia, ye so mo hunda so, zo oko na ndö ti sese so alingbi ti sara ni pepe. Mbeni gbia oko, ataa lo yeke kota wala lo yeke ngangu tongana nyen, lo de ti hunda mara ti ye tongaso laoko pepe na mbeni zo ti nganga, wala na mbeni zo ti bango nda ti aye.

¹¹Ye so mo hunda so ayeke ngangu mingi. Zo oko ti fa tënë ni na gbia ayeke daa pepe. Gi anzapa si alingbi ti fa ni; me ndo ti lango ti ala ayeke na popo ti azo ti sese pepe.”

¹²Gi so gbia ama tënë so, ngonzo alondo na be ti lo tongana wâ. Lo mu yanga titene a fâ azo ti nganga so kue ayeke na Babilone.

¹³Gbia asigigi na mbela ti fango azo ti nganga ni. Tongaso azo ague, amu Daniel na amba ti lo si aga na ala titene a fâ nga ala.

¹⁴Daniel atene tënë na lege ti ndara nga na hange na Ariok, makonzi ti aturugu so ayeke bata gbia. Andaa Ariok amu fade lege ti gue ti fâ azo ti nganga so ayeke na Babilone.

¹⁵Daniel ahunda lo, atene: “Gbia amu kpengba mbela tongaso ngbanga ti nyen?” Ariok atene peko ti tënë ni na Daniel.

¹⁶Daniel ague hio ti baa gbia; lo gue, lo gbu gere ti gbia si gbia alingbi ti zia mbeni ngoi na lo titene lo fa na gbia ni nda ti bango-li ni.

¹⁷So Daniel akiri na da ti lo awe, lo tene peko ti tënë ni na amba ti lo Hanania, Mishael na Azaria.

¹⁸Lo hunda na ala titene ala voro tere ti ala na Nzapa so ayeke na yayu titene, na lege ti nzoni be ti lo, lo fa na ala nda ti ye ti ndima so. Tongaso si a bongbi ala na tanga ti azo ti nganga so ayeke na Babilone ti fâ ala pepe.

¹⁹Na bi, na ya ti mbeni ye tongana bango-li, Nzapa afa na Daniel nda ti ye ti ndima ni. Tongaso Daniel alondo ti gonda Nzapa so ayeke na yayu;

²⁰lo tene: “E mu singila na Nzapa; e mu singila na lo ngbene ye kpu na kpu, lakue lakue! Biani, ndara na ngangu ayeke ti lo.

²¹Lo laa lo yeke leke angoi nde nde; lo yeke leke akapa ti aye nde nde; lo yeke tumba agbia na ndö ti mbata si lo yeke zia ala na ndö ti mbata. Lo laa lo yeke mu ndara na azo ti ndara si lo yeke sara titene zo ahinga ndo.

²²Lo laa lo yeke fa nda ti ye so ali si ahonde. Lo hinga ye so ayeke na vukongo ndo si lumiere akanga tere ti lo kue.

²³Mo, Nzapa ti akotara ti mbi, mbi mu singila na mo, mbi gonda mo! Mo mu na mbi ndara na ngangu. Biani, mo fa na mbi nda ti ye so e hunda na mo. Mo fa na e tënë ti ye so aso be ti gbia so.”

²⁴Na pekoni, Daniel alondo ague na ndo ti Ariok, lo so gbia amu yanga na lo titene lo fâ azo ti nganga ti Babilone so. So Daniel asi awe, lo tene na Ariok, lo tene: “Mo fâ azo ti nganga so ayeke na Babilone pepe! Mo gue na mbi na gbe ti gbia, fade mbi yeke fa na lo nda ti bango-li ti lo ni.”

²⁵Ariok amu Daniel hio si ague na lo na gbe ti gbia. Ariok atene na gbia, atene: “Gbia, mbi wara mbeni koli so alingbi ti fa nda ti bango-li ti mo ni; lo yeke na popo ti azo ti Juda so a gbu ala kâ si a ga na ala so.”

²⁶Gbia atene na Daniel, so mbeni iri ti lo ayeke Beltasar, atene: “Mo lingbi ti fa na mbi bango-li ni si mo fa nga na mbi nda ni?”

²⁷Daniel akiri tënë na lo, atene: “Ye ti ndima so gbia ayeke tene tënë ni so, ataa azo ti nganga, ataa azo ti mazi, ataa azo ti yoro, azo ti bango nda ti aye, ala lingbi ti fa ni pepe.

²⁸Me na yayu kâ, mbeni Nzapa ayeke daa so ayeke fa nda ti aye ti ndima. Gbia Nabukodonosor, lo laa lo yeke fa na mo ye so ayeke si gbanda. Baa, ye so mo baa na ya ti bango-li na ndembe so mo yeke na ndö ti gbogbo ti mo so ayeke tongaso:

²⁹Gbia, na ndembe so mo yeke na ndö ti gbogbo ti mo, mo gbu li ti mo na ndö ti aye so ayeke si gbanda. Lo so lo yeke fa nda ti aye ti ndima afa na mo awe ye so ayeke si gbanda.

³⁰Ti mbi, a fa na mbi nda ti ye ti ndima ni fango; me ayeke ngbanga ti so mbi yeke na ndara mbi hon azo kue pepe. A fa ni na mbi, tongaso si a lingbi ti fa na mo gbia, nda ti bango-li ti mo si mo lingbi ti hinga nda ti ye so mo yeke gi be ti mo daa.

³¹Gbia, ye so mo baa ayeke tongaso: mo baa mbeni kota yanda so aluti na nduzu na dawa ti mo; yanda ni akono ahon ndoni, tere ni ayeke za zango si ayeke zia kota mbeto na be ti azo.

³²Li ti yanda ni ayeke na nzoni lôro; kate ni na amaboko ni ayeke na wen ti nginza; ya ni na ngbonda ni ayeke na bengba wen.

³³Agere ni ayeke na wen; agere ni so ayeke do na sese, mbeni mbage ni ayeke na wen si mbeni mbage ni ayeke na sese ti sarango na ta.

³⁴So mo ngba ti baa ye ni, mbeni têne so maboko ti zo andu ni pepe, alondo na ndö ti hoto, abo agere ti yanda ni; agere ni so ayeke na wen na ti so ayeke na sese ti sarango na ta so, ya ni afâ kue, aga fuku ti sese.

³⁵Tongaso wen, sese ti sarango na ta, bengba wen, na wen ti nginza na lôro ni kue afâ si aga tongana poro ti ale ti kobe so ayeke na ndö ti lakere na ngoi ti buru: a pe ya ni, pupu amu ahon na ni si zo ahinga ndo so ayeke daa pepe. Ti têne so abo yanda so, têne ni akono aga kota hoto so asi ndö ti sese kue.

³⁶“Bango-li ni laa. Fadeso mbi yeke fa nda ni na mo, gbia.

³⁷O gbia! Mo yeke gbia ti agbia. Nzapa so ayeke na yayu laa azia mo gbia; lo mu na mo komandema, ngangu na gonda.

³⁸Lo zia na gbe ti komandema ti mo azo, anyama ti ngonda na andeke ti nduzu na ndo so kue ala yeke daa. Lo zia mo na li ti ala kue. Mo laa mo yeke li ni so ayeke na lôro so!

³⁹Na peko ti mo, fade mbeni kodro ayeke londo; kodro ni ayeke duti na ngangu tongana ti mo pepe. Na pekoni, fade mbeni ota kodro ayeke londo; kodro ni laa ayeke na bengba wen so. Lo yeke sara komandema na ndö ti sese kue.

⁴⁰Na pekoni, fade mbeni osio kodro so akpengba tongana wen ayeke londo. Tongana ti so wen ayeke fâ ya ti aye kue si ayeke nika aye kue si aga fuku ti sese, fade kodro ni ayeke fâ si ayeke nika akodro so kue ayeke kozo ti lo.

⁴¹Mo baa agere ti yanda ni na ali ti gere ni: mbeni mbage ni ayeke na sese ti sarango na ta si mbeni mbage ni ayeke na wen. So aye ti fa atene, fade ya ti kodro ni ayeke kangbi. Fade kodro ni ayeke kpengba kete tongana ti so wen akpengba, ngbanga ti so a bongbi wen na sese ti sarango na ta tongana ti so mo baa.

⁴²Me ti ali ti gere ni so mbeni mbage ni ayeke na wen si mbeni mbage ni ayeke na sese ti sarango na ta, so aye ti fa atene, fade mbeni mbage ti kodro ni ayeke kpengba si mbeni mbage ni ayeke kpengba pepe.

⁴³Mo baa wen so a bongbi ni na sese ti sarango na ta: so aye ti fa atene, fade agbia ni ayeke ga ambuki na lege so mbeni gbia amu molenge ti lo ti wali na molenge-koli ti mbeni gbia ni. Me fade gango ambuki ti ala ni ayeke kpengba pepe, legeoko tongana ti so a lingbi ti bongbi wen na sese ti sarango na ta biani pepe so.

⁴⁴Na ngoi ti agbia ni, fade Nzapa so ayeke na yayu ayeke sara mbeni kodro so ayeke buba laoko pepe; kodro ni ayeke ti na gbe ti azo ti ambeni mara nde pepe. Fade kodro ni ayeke fâ si ayeke nika ambeni kodro ni kue; gi kodro oko so laa ayeke ngba ti lo lakue lakue.

⁴⁵Mo baa nga têne so zo andu ni oko pepe, alondo na ndö ti hoto abo wen, bengba wen, sese ti sarango na ta, wen ti nginza na lôro ti yanda ni si afâ ya ni kue. Kota Nzapa afa na mo, gbia, ye so ayeke si gbanda. Bango-li ni ayeke taa-tënë biani; nda ni so mbi fa ayeke nga ye so mo lingbi ti zia be ti mo na ndö ni.”

⁴⁶Tongaso gbia Nabukodonosor ati akpo li ti lo na sese, lo voro Daniel si lo mu yanga titene a mu *sandaga si a zö dukani na Daniel.

⁴⁷Gbia atene na Daniel, atene: “Taa-tënë, Nzapa ti ala ayeke Nzapa so ahon anzapa kue; lo yeke Gbia ti agbia. Lo laa lo yeke fa nda ti aye ti ndima, ngbanga ti so mo fa na mbi nda ti ye ti ndima so awe.”

⁴⁸Na pekoni, gbia asara si Daniel aga kota zo mingi. Lo mu na lo gba ti anzoni ye, lo zia lo ti sara komandema na ndö ti kodro ti Babilone kue. Lo zia nga lo makonzi na li ti azo ti nganga so kue ayeke na Babilone.

⁴⁹Daniel ahunda mbeni ye na gbia. Nilaa gbia azia Shadrak, Meshak na Abed-Nego ti sara komandema na ndö ti kodro ti Babilone kue. Me ti Daniel, lo ngba ti lo na yangbo ti gbia.