Read La Bible en Sango courant – Mbeti ti Nzapa Daniel 6 Bible Online

Daniel 6 - La Bible en Sango courant – Mbeti ti Nzapa bible

Daniel 6

¹Na pekoni Darius, zo ti Medii amu mbata ti gbia na ndembe so lo yeke na ngu baleomene na use.

²Darius abaa nzoni titene lo zia amakonzi ngbangbo oko na baleuse titene ala mu maboko na lo ti sara komandema na ndö ti kodro ni.

³Lo zia na li ti ala agbenyogbia ota; oko ti agbenyogbia ni ayeke Daniel. Amakonzi ni ayeke fa peko ti akua ti ala na agbenyogbia ota so, tongaso si iri ti gbia alingbi ti buba pepe.

⁴Daniel ahon tanga ti agbenyogbia use so na amakonzi ni kue, ngbanga ti so hingango ndo ti lo ahon ti azo kue. Nilaa gbia aleke na be ti lo ti zia lo titene lo baa ndo na ndö ti kodro ni kue.

⁵Tongaso, tanga ti agbenyogbia use na amakonzi ni agi lege ti hinga sioni so Daniel asara na kodro ni si ala lingbi ti bi tënë na li ti lo. Me ala wara tënë na li ti lo oko pepe, ngbanga ti so Daniel ayeke sara aye ti lo kue na legeni: azo abaa mbeni sioni ye oko so lo sara pepe.

⁶Tongaso azo so atene na popo ti ala, atene: “E yeke wara ande sioni oko ti Daniel pepe si fade e bi tënë na li ti lo ndali ni. E hinga pepe, fade e yeke wara ni na lege ti ndia ti Nzapa ti lo.”

⁷Agbenyogbia use so na amakonzi alondo na loro, ala gue na ndo ti gbia si ala tene na lo, atene: “Gbia Darius, na nduzu!

⁸Agbenyogbia kue ti kodro ni, akota komanda na amakonzi, awamungo-wango na agovoronere ama tere. Gbia, tongana mo yeda, fade mo mu mbeni kota mbela ti kanga lege na mbeni sarango ye ti azo. Tënë ti ya ni ayeke duti tongaso: na ya ti lango baleota, fade zo avoro mbeni nzapa nde pepe, wala lo voro mbeni zo nde pepe, gi mo oko. Tongana zo ni ake, o gbia, mo bi lo na ya ti du ti abamara.

⁹Gbia, fadeso mo mu mbela ni, mo su maboko ti mo na gbe ni si mbeni zo akiri agbian ya ni pepe, ngbanga ti so zo alingbi ti mingo ngangu ti mbela ti azo ti Medii na ti Perse pepe.”

¹⁰Tongaso, gbia Darius asu maboko ti lo na gbe ti kota mbela ni.

¹¹So Daniel ama a tene, gbia asu maboko ti lo na gbe ti mbela ni awe, lo li na ya ti da ti lo. Mbeni kubu ti da ni ayeke na nduzu, afenetere ni ayeke baa ndo na mbage ti Jérusalem. Na ya ti kubu so laa, fani ota na ya ti lango oko, lo yeke kuku, lo yeke sambela si lo yeke gonda Nzapa ti lo. Lo sara legeoko na lango ni so tongana ti so lo yeke sara ka lakue.

¹²Awato ti Daniel aga na loro na ndo ti lo, ala wara lo, lo ngba ti sambela si lo yeke voro tere ti lo na Nzapa ti lo.

¹³Tongaso ala kiri na ndo ti gbia si ala tene na lo, atene: “Gbia, mo su maboko ti mo na gbe ti mbeni kota mbela pepe? Mo tene: na ya ti lango baleota, alingbi zo asambela mbeni nzapa nde pepe, wala lo voro mbeni zo nde pepe, gi mo oko. Zo so ake, fade a yeke bi lo na ya ti du ti abamara; tënë ni laa pepe, gbia?” Gbia akiri tënë, atene: “Tënë ni laa biani. Tënë ni alingbi na ndia ti azo ti Medii na ti Perse so zo alingbi ti mingo ngangu ni pepe.”

¹⁴Awato ti Daniel akiri atene na gbia: “Gbia, Daniel, oko ti azo ti Juda so a gbu ala si a ga na ala so, lo baa mo tongana senge ye. Lo baa nga mbela so mo su maboko ti mo na gbe ni tongana senge ye: na ya ti lango oko, lo yeke sambela Nzapa ti lo fani ota.”

¹⁵So gbia ama tënë so, vundu agbu be ti lo mingi. Nilaa lo yeke gi lege ti soo Daniel na kuâ. Lo gi lege ti soo Daniel ngbii asi na lakui.

¹⁶Me awato ti Daniel akiri aga na loro na ndo ti gbia si ala tene na lo, atene: “Gbia, ayeke nzoni mo hinga, mo tene, na lege ti ndia ti azo ti Medii na ti Perse, tongana gbia asu maboko na gbe ti mbela wala na gbe ti ndia awe, zo alingbi ti mingo ngangu ni pepe.”

¹⁷Tongaso, gbia amu yanga titene a ga na Daniel si a bi lo na ya ti du ti abamara. Gbia atene na Daniel, atene: “Nzapa ti mo oko, lo so mo ngba ti sara na lo lakue so, lo laa lo yeke soo mo.”

¹⁸Azo aga na têne si ala zia ni na ndö ti yanga ti du ni. Gbia akpo nzoroko ti lo wani na ndö ni nga na ti akota zo ti lo, tongaso si mbeni zo aga ti sara ye nde na Daniel pepe.

¹⁹Na pekoni, gbia akiri na yangbo ti lo na bi ni so. Lo ke ti te kobe. Lo hunda titene a ga na awali ti lo na tere ti lo pepe; lango agbu le ti lo nga pepe.

²⁰Na ndaperere, so ndo angba kâ, gbia alondo si lo gue hio na du ti abamara ni.

²¹So lo yeke ga nduru na du ni, na vundu na be ti lo, lo dekongo ti iri Daniel, lo tene: “Daniel, zo ti kua ti Nzapa so ayeke na fini! Nzapa ti mo so mo ngba ti sara na lo lakue so azi mo na yanga ti abamara ni awe?”

²²Daniel akiri tënë na gbia, atene: “Gbia na nduzu!

²³Nzapa ti mbi atokua *ange ti lo si ange ni akanga yanga ti abamara ni, ala sara sioni na mbi oko pepe, ngbanga ti so Nzapa abaa so tënë ayeke na li ti mbi pepe, lo baa so mbi sara nga sioni ye oko na mo pepe, gbia ti mbi.”

²⁴Ngia asi be ti gbia si lo mu yanga titene a sigigi na Daniel na ya ti du ni. Gi so a sigigi na Daniel na ya ti du ni awe, azo abaa so ka oko ayeke na tere ti lo pepe, ngbanga ti so lo zia be ti lo na ndö ti Nzapa ti lo.

²⁵Gbia amu yanga titene a ga na akoli so a bi tënë na li ti Daniel so. A mu ala si a bi ala na ya ti du ti abamara, ala na awali ti ala nga na amolenge ti ala. Kozo titene azo ni ati na ngbonda ti du ni kâ, abamara ni agbu ala gi na le ti nduzu si afâ ya ti abio ti ala nduru nduru.

²⁶Na pekoni gbia Darius asara mbeti si lo tokua na azo nde nde kue, azo ti amara nde nde kue na azo ti ayanga ti kodro nde nde kue so asara kodro na ndö ti sese kue; lo tene: “Ayeke nzoni siriri asi ala singo!

²⁷“Mbi mu yanga na ala kue, mbi tene: Na ya ti kodro so kue ayeke na gbe ti komandema ti mbi, alingbi azo kue akpe mbeto ti Nzapa ti Daniel si ane lo. Biani, lo yeke Nzapa so ayeke na fini, lo ngba lakue lakue. Lengo-gbia ti lo ayeke ngba kpu na kpu, fade ngoi ti lo ti duti gbia ayeke hunzi laoko pepe.

²⁸Lo yeke zi azo si lo yeke soo azo na kuâ; lo yeke sara aye ti dongo be na aye ti kpene, lo yeke sara ni na yayu nga na sese. Lo laa lo zi Daniel na yanga ti abamara.”

²⁹Ti Daniel, lo kiri lo ga kota zo mingi na ngoi so Darius ayeke gbia nga na ngoi so Sirus, zo ti Perse ayeke gbia.