Read La Bible en Sango courant – Mbeti ti Nzapa Daniel 9 Bible Online

Daniel 9 - La Bible en Sango courant – Mbeti ti Nzapa bible

Daniel 9

¹Darius, molenge ti Zerses, zo ti mara ti Medii laa ayeke gbia na ndö ti kodro ti Babilone.

²Na kozo ngu so lo ga gbia, mbi Daniel, mbi yeke gi na ya ti Mbeti ti Nzapa titene mbi hinga wungo ti ngu so KOTA GBIA atene tënë ni na wayanga-Nzapa Jérémie. Na ya ti angu so laa gbata ti Jérusalem ayeke ngba na bubango ni; wungo ti ngu ni kue ayeke balembarambara.

³Mbi yo le ti mbi na nduzu ti baa ndo na mbage ti KOTA GBIA ti sambela lo, ti voro tere ti mbi na lo. Mbi ke kobe, mbi yu bongo ti mua si mbi tuku mburu ti wâ na li ti mbi.

⁴Mbi sambela KOTA GBIA, Nzapa ti mbi si mbi fa siokpari so na lo, mbi tene: “Ae! KOTA GBIA, mo yeke kota, azo alingbi ti kpe mbeto ti mo mingi. Mo yeke bata tënë ti *mbuki ti mo na azo so abata andia ti mo; mo yeke sara nzoni be na azo so aye mo.

⁵E sara siokpari, e sara kirikiri; e sara sioni, e sara ngangu li na mo si e zia lege ti andia ti mo na akpengba tënë ti mo.

⁶Azo ti kua ti mo so ayeke awayanga-Nzapa atene peko ti tënë ti yanga ti mo na agbia ti e, na amakonzi ti e, na akotara ti e nga na azo ti kodro kue; me e ke ti ma ala.

⁷KOTA GBIA, mo yeke ti mo mbirimbiri, me ti e, gi kamene laa ayeke na le ti e. Ye ni laa e yeke baa laso na tere ti azo ti Juda nga na tere ti azo ti Jérusalem, na azo ti Israel kue, ataa ala so ayeke nduru wala ala so ayeke na yongoro ndo. Biani, azo ti mara ti e akangbi kirikiri na ando nde nde so mo tumba ala daa ndali ti so ala sara sioni so ake mo.

⁸KOTA GBIA, kamene ayeke na le ti e, e na agbia ti e, na amakonzi ti e na akotara ti e, ngbanga ti so e sara siokpari so ake mo.

⁹KOTA GBIA Nzapa ti e, ataa so e sara ngangu li na mo, me ndali ti nzoni be ti mo, mo yeke zi siokpari na li ti e.

¹⁰Mo mu na e andia ti mo na lege ti azo ti kua ti mo so ayeke awayanga-Nzapa si mo hunda na e ti sara ye alingbi na ni. Me e ke ti ma yanga ti mo, KOTA GBIA Nzapa ti e.

¹¹Azo ti Israel kue ake ndia ti mo awe; ala gue yongoro na mo si atënë so mo tene, ala ke ti ma ni. Tongaso asioni tënë na atënë ti dengo ba so a su ni na ya ti mbeti ti ndia ti Moïse, zo ti kua ti mo, atënë ni ati na ndö ti e, ngbanga ti so e sara siokpari so ake mo.

¹²Atënë so mo tene ando na ndö ti e na amakonzi so ayeke na li ti e, mo sara si aga taa-tënë: kota sioni kpale so mo sara si ati na ndö ti e na Jérusalem, ade mara ni asi na mbeni ndo laoko pepe na dunia so.

¹³Asioni kpale so kue asi na e alingbi na tënë so a su na ya ti mbeti ti *Ndia ti Moïse. Me e de be ti mo, KOTA GBIA Nzapa ti e pepe; e zia lege ti siokpari ti e pepe si e baa taa-tënë ti mo tongana senge ye.

¹⁴Ndani laa mo leke ye kue titene sioni kpale so asi na e, ngbanga ti so KOTA GBIA Nzapa ti e ayeke mbirimbiri na ya ti asarango ye ti lo kue; me e ke ti ma yanga ti mo.

¹⁵“Kota Gbia Nzapa ti e, na lege ti ngangu ti maboko ti mo, mo sara si azo ti mo asigigi na sese ti Ezipte; nilaa iri ti mo awu ngbii asi laso. Me e ke yanga ti mo, e sara siokpari.

¹⁶Kota Gbia, mo sara ando aye ti mbirimbiri mingi. Tongaso, ayeke nzoni sioni ngonzo ti mo ahon yongoro na tere ti Jérusalem, gbata ti mo na hoto ti mo so ayeke nde si ayeke nzoni kue so. Ndali ti siokpari ti e na ti akotara ti e, amara so kue angoro e ayeke zonga Jérusalem na azo ti mo.

¹⁷Fadeso, ayeke nzoni KOTA GBIA Nzapa ti e, mo ma sambela na vorongo tere ti mbi, zo ti kua ti mo, so mbi yeke voro tere ti mbi na mo so. Ndali ti iri ti mo wani, ayeke nzoni mo baa na nzoni le ndo so a zia ni nde ndali ti mo si abuba so.

¹⁸Nzapa ti mbi, dingi mê ti mo, mo ma mbi! Zi le ti mo, mo baa bubango so gbata ti e abuba so; gbata so a di iri ti mo daa so. E voro tere ti e na mo ndali ti aye ti mbirimbiri so e sara pepe, me ndali ti kota nzoni be ti mo.

¹⁹Kota Gbia, mo ma e maa! Kota Gbia, mo zi sioni ti e na li ti e maa! Kota Gbia, dingi mê ti mo, mo ma e maa! Nzapa ti mbi, ndali ti iri ti mo wani, mo ku pepe, mo sara ye hio ndali ti gbata ti mo na azo ti mo.”

²⁰“Mbi ngba ti tene tënë, ti sambela si ti fa siokpari ti mbi na ti azo ti mbi so ayeke azo ti Israel; mbi ngba ti voro tere ti mbi na KOTA GBIA Nzapa ti mbi ndali ti hoto ti lo so ayeke nde si ayeke nzoni kue.

²¹So mbi ngba ti sambela, Gabriel, koli so mbi baa lo na ya ti kozo ye tongana bango-li so, ahuru hio na le ti nduzu si asi nduru na tere ti mbi. Lo si na tere ti mbi na ndembe so a yeke mu *sandaga ti peko ti bekombite.

²²Lo fa na mbi nda ti ye ni, lo tene: ‘Daniel, mbi ga fadeso ti sara si le ti mo azi ti hinga ye.

²³Gi so mo to nda ti voro tere ti mo na Nzapa, mbeni tënë asigigi. Nilaa mbi ga ti fa ni na mo, ngbanga ti so Nzapa aye mo. Ayeke nzoni mo ma tënë so nzoni si mo gi ti ma ya ti ye so mo baa na ya ti mbeni ye tongana bango-li so.

²⁴A diko ngoi mbarambara fani balembarambara ndali ti azo ti mo nga ndali ti gbata ti mo so ayeke nde si ayeke nzoni kue. A diko ngoi ni titene sioni sarango ye na siokpari akai, titene a zi siokpari na li ti azo si mbirimbiri ti Nzapa angba lakue lakue, titene aye so zo abaa na ya ti mbeni ye tongana bango-li na tenengo peko ti tënë ti yanga ti Nzapa aga taa-tënë, titene kota da ti Nzapa so ayeke nde si ayeke nzoni kue, azo akiri azia ni nde ndali ti lo.

²⁵Alingbi mo hinga ye so si mo ma ya ni: mbeni lâ, a mu yanga titene azo akiri na kodro ti ala na peko ti so a gbu ala, a gue na ala na kodro wande; a mu nga yanga titene azo akiri aleke gbata ti Jérusalem. Ti londo na ngoi ni so ngbii asi na ngoi so a tuku mafuta na li ti mbeni zo titene a zia lo makonzi, ngoi mbarambara ti ngu mbarambara ayeke hon. Na pekoni, na ya ti mbeni ngoi baleomene na use ti ngu mbarambara, a yeke kiri ti leke gbata ni na agbagba ti bira ti gbata ni; me ayeke duti angoi ti ngangu.

²⁶Na peko ti ngoi baleomene na use so, fade a yeke fâ zo so a tuku mafuta na li ti lo so; zo oko ayeke mu maboko na lo pepe. Na pekoni mbeni makonzi ayeke londo, lo na aturugu ti lo ayeke ga ti buba gbata ni nga na ndo so a zia ni nde ndali ti Nzapa. Me na ndani, lango ti makonzi ni ayeke hunzi na lege ti ngonzo ti Nzapa so ayeke tuku na ndö ti lo. Me lo yeke sara bira ngbii asi na lango ti kuâ ti lo si lo yeke buba ndo kue alingbi na ye so a diko ndali ti lo.

²⁷Na ya ti tanga ti ngoi ti ngu mbarambara so, makonzi ni ayeke gbu gba ti azo na ngangu titene ala sara ye so ala ye pepe. Na peko ti ngu ota na ndambo, lo yeke sara si asandaga ti nyama na asandaga ti ale ti kobe so azo ayeke mu ka na Nzapa akai. Zo ti bubango ndo so ayeke sara ande aye ti sioni mingi gi na loro, lo yeke sara ni ngbii tënë ti bubango lo so a diko ndali ti lo ati na ndö ti lo.’ ”