Read La Bible en Sango courant – Mbeti ti Nzapa Osée 1 Bible Online

Osée 1 - La Bible en Sango courant – Mbeti ti Nzapa bible

Osée 1

¹Tënë ti *KOTA GBIA asi na Osée, molenge ti Beeri na ngoi so Ozias, Yotam, Ahaz na Ezekias ayeke agbia ti Juda. Gi na oko ngoi so Yeroboam, molenge ti Yoas ayeke gbia ti Israel.

²So ayeke tongo nda ti atënë so *KOTA GBIA azia na yanga ti Osée ti tene na azo ti lo laa. Lo tene na Osée: “Gue, mo mu mbeni wali-ndumba titene lo ga wali ti mo si lo du na mo amolenge ti ndumba. Biani, azo ti kodro ni ake KOTA GBIA; so sarango aye ti ndumba ti ala laa.”

³Tongaso Osée ague, amu Gomer, molenge ti Diblaim titene Gomer aga wali ti lo. Gomer amu ngo si lo du na Osée molenge-koli.

⁴KOTA GBIA atene na Osée: “Mo di iri ti molenge ni Yizreel, ngbanga ti so na ya ti kete ngoi, fade mbi yeke ga ti kiri peko ti sioni na *ahale ti Yehu ndali ti mene so ala tuku na Yizreel so. Fade mbi yeke sara titene lengo-gbia ahunzi na Israel.

⁵Na lango ni so, mbi yeke hunzi ngangu ti aturugu ti Israel na popo-hoto ti Yizreel.”

⁶Gomer akiri amu ngo si lo du molenge-wali. KOTA GBIA atene na Osée: “Mo di iri ti molenge ni Lo-Ruhama, ngbanga ti so, mbi yeke ngba ti ye azo ti Israel pepe, mbi yeke zi ndoye ti mbi kue na ala.

⁷Me ti azo ti Juda, fade mbi yeke ngba ti ye ala. Mbi wani, KOTA GBIA Nzapa ti ala, mbi yeke soo ala; mbi yeke soo ala na lege ti kokora pepe, wala na lege ti yongoro zeme pepe, wala na lege ti bira pepe, wala na lege ti ambarata pepe, wala na lege ti azo ti kpengo na mbarata pepe.”

⁸Gomer azi Lo-Ruhama na yanga ti me. Na pekoni, lo kiri lo mu ngo si lo du molenge-koli.

⁹KOTA GBIA atene na Osée: “Mo di iri ti molenge ni Lo-Ami, ngbanga ti so ala, azo ti Israel, ala yeke mara ti mbi pepe si mbi, mbi yeke na ndo so ndali ti ala pepe.”