Read La Bible en Sango courant – Mbeti ti Nzapa Osée 10 Bible Online

Osée 10 - La Bible en Sango courant – Mbeti ti Nzapa bible

Osée 10

¹Israel ayeke tongana keke ti *vinye so ayeke le ando mingi. So ale ti keke ti lo ayeke wu mingi, lo yeke sara si agbalaka akiri awu mingi; so sese ti lo ayeke pendere mingi, lo yeke sara si angbongboro têne so a leke si aluti na nduzu akiri aga pendere mingi.

²Be ti azo ti Israel ayeke use use. Fadeso ala yeke wara ye ti peko ti sioni ti ala: *KOTA GBIA wani ayeke kinda agbalaka ti ala si lo yeke kungbi angbongboro têne ti ala so ala leke aluti na nduzu so.

³Ti fadeso ala yeke tene: “E yeke na gbia pepe, ngbanga ti so e yeke kpe mbeto ti KOTA GBIA pepe. Ataa e yeke fade na gbia ni, nyen laa lo lingbi ti sara ndali ti e, nyen?”

⁴Ala yeke diko gba ti atënë, ala yeke deba ti mvene, ala yeke leke atënë ti *mbuki; me ti ala, tënë ti fango ngbanga ayeke tongana sioni pere ti fango zo so asigigi na ya ti yaka.

⁵Azo so alango na Samarii, fade ala yeke sara mbeto titene kete bagara so a sara na lôro si ayeke na kodro ti Bet-Aven so, azo amu ni ahon na ni. Awayango-sandaga ti mvene ayeke sara mua ndali ti bagara ni. Ayeke nzoni ala sara ngia fadeso ma, ngbanga ti so a zi gonda ti lo na popo ti ala, a hon na ni yongoro awe.

⁶Fade a yeke mu nga kete bagara ni, a hon na lo na sese ti Asirii ti mu na kadoo na ne-ne gbia. Fade kamene ayeke gbu azo ti Efraim si kamene ayeke sara azo ti Israel ndali ti ye so ala leke na be ti ala ti sarango ni so.

⁷Ti Samarii na gbia ti lo ahunzi awe: gbia ti lo aga tongana nduru keke so ayeke sua na le ti ngu.

⁸Ando so azo aleke na nduzu ti voro anzapa ti mvene daa so, fade a yeke buba ni kue; ando ni so laa ayeke siokpari ti azo ti Israel. Fade akamba ti ki na aki ayeke kanga ndö ti agbalaka ti ala. Fade azo ti Samarii ayeke tene na akota hoto: “Ala kanga ndö ti e!” Ala yeke tene na akete hoto: “Ala ti na ndö ti e!”

⁹Ti londo na sioni ye so mo sara na Gibea ngbii asi fadeso, mo Israel, mo sara siokpari awe; ni laa mo ngba gi ngbango daa so! Ayeke na legeni titene bira alondo na tere ti azo ti sioni so gi na Gibea pepe?

¹⁰KOTA GBIA atene: “Fade mbi yeke pika ala tongana ti so be ti mbi aye; gba ti amara ayeke bongbi na ndö ti ala ti tiri bira na ala ndali ti asioni use so ala sara.

¹¹“Efraim ayeke tongana kete mama ti bagara so aleke lo nzoni si lo ye ti pika ale ti *ble. Tongana mbi baa konongo go ti lo, mbi ye fade ti kanga nengo keke na go ti Efraim; ka tongaso, Juda afâ ti lo yaka si Israel apika ti lo ya ti sese.

¹²Ala lu ye alingbi na ye ti mbirimbiri si fade ala yeke ko ye alingbi na nzoni be; ala fâ fini yaka ti ala! Ngoi titene ala gi KOTA GBIA alingbi awe; ala gi lo ngbii lo ga lo sara si ye ti mbirimbiri atuku na ndö ti ala.

¹³Me ala lu ye ti sioni si ala ko ye ti sioni so ahon ndoni awe; ala te lengo ti mvene. “Israel, mo zia be ti mo na ndö ti ngangu ti mo wani nga na ndö ti gba ti angangu zo ti bira ti mo.

¹⁴Ndani laa fade toto ti bira ayeke si na popo ti azo ti mo si agbata ti mo so kue ngangu gbagba ayeke na tere ni ayeke buba. Agbata ni ayeke buba tongana ti so gbia Shalman abuba ando gbata ti Bet-Arbel si azo anika mama na ndö ti amolenge ti lo so.

¹⁵Azo ti Israel, baa ye so Betel ayeke ga ande na ni na ndö ti ala ndali ti sioni ti ala so ahon ndoni so laa! Na ndaperere, so ndo angba kâ, ti gbia ti Israel ayeke hunzi.”