Read La Bible en Sango courant – Mbeti ti Nzapa Osée 14 Bible Online

Osée 14 - La Bible en Sango courant – Mbeti ti Nzapa bible

Osée 14

¹Fade azo ti Samarii ayeke wara ye ti peko ti sioni so ala sara, ngbanga ti so ala tomboka na tere ti Nzapa. Fade ala yeke kui na ya ti bira, a yeke nika amolenge ti ala so angba ti nyon me, a yeke suru ya ti amama ti ngo.”

²Israel, kiri na *KOTA GBIA Nzapa ti mo, ngbanga ti so sioni ti mo asara si mo ti.

³Ala kiri na KOTA GBIA si ala tene na lo atënë so: “Sioni so kue e sara so, zi tënë ni na li ti e. Yamba e na nzoni be! E ye ti ya na mo atënë ti yanga ti e, ahon titene e ya na mo *sandaga ti akoli-bagara.

⁴Asirii alingbi ti soo e na kuâ pepe. Fade e yeke kiri ti ko na ndö ti mbarata ti bira pepe; ayanda so e sara na maboko ti e so, e yeke kiri ti iri ala ‘Nzapa ti e’ pepe. Gi mo Nzapa oko laa, mo yeke baa mawa ti nyindu.”

⁵KOTA GBIA atene: “Fade mbi yeke zi nzara ti kengo mbi so ayeke na be ti ala so; mbi yeke ye ala na be ti mbi kue, ngbanga ti so ngonzo ti mbi akai na tere ti ala awe.

⁶Mbi yeke ga tongana ngu ti pere ndali ti Israel, lo yeke ga pendere tongana kongo ti ngonda, agunda ti lo ayeke li sese tongana gunda ti akeke ti Liban.

⁷Lo yeke ga tongana keke so amaboko ni agbara tere, pendere ti lo ayeke duti tongana ti keke ti olive, fion ti lo ayeke duti tongana nzoni fion ti keke ti Liban.

⁸Azo ti mbi ayeke kiri ti duti na gbe ti de ti lo, ala yeke kiri ti lu ale ti *ble, ala yeke mai tongana keke ti vinye; sango ti ala ayeke mu ndo kue tongana ti pendere vin ti Liban.

⁹Efraim, nyen laa ayeke kiri ti bongbi mbi na anzapa nde nyen? Mbi laa mbi yeke ma sambela ti mo si mbi yeke baa ndo na ndö ti mo. Mbi, mbi yeke tongana keke ti sipre so akugbe ni angba lakue fini ni. Mbi laa mbi yeke sara titene ale ti kobe ti mo adu.”

¹⁰Zo so ayeke na ndara, fade lo yeke hinga nda ti atënë so; zo so ahinga ndo, fade lo yeke ma ya ni. Biani, alege ti KOTA GBIA ayeke mbirimbiri; fade azo ti mbirimbiri ayeke tambula daa, me azo ti ngangu li ayeke ti daa.