Read La Bible en Sango courant – Mbeti ti Nzapa Osée 7 Bible Online

Osée 7 - La Bible en Sango courant – Mbeti ti Nzapa bible

Osée 7

¹si mbi ye ti kai kobela ti Israel, sioni ti Efraim na sioni sarango ye ti azo ti Samarii ayeke sigigi polele. Azo ayeke handa amba ti ala ti mu ye ti ala, azo ti nzi ayeke li na ya ti da ti nzi ye ti azo, asioni zo amu ndö ti alege kue.

²Ala yeke tene na be ti ala pepe, atene: asioni ye so kue ala yeke sara so, mbi hinga ni pepe; fadeso asarango ye ti ala ni akanga ala mbage na mbage awe, aye ni kue ayeke na le ti mbi.

³Ala yeke zia ngia na be ti gbia, andaa ala yeke asioni zo; ala yeke zia ngia na be ti amakonzi, andaa ala yeke azo ti mvene.

⁴Ala kue ayeke gi wali ti zo wala koli ti zo; ala yeke tongana fur so amu wâ ahon ndoni, so zo ti zongo mapa azia ti leke wâ ni na ndembe so lo pika ya ti farini ngbii farini ni alondo si.

⁵Na lango ti matanga ti gbia ti e, amakonzi anyon samba ahon ndö ti ala si ala woko kue; gbia asara beoko na azo ti hengo ndo

⁶na ndembe so ala ga nduru na tere ti lo. Biani, azo ni ayeke leke tënë na be ti ala ti sara sioni, ala yeke tongana wâ ti fur. Na bi kue, ala kanga ngonzo ti ala, me na ndaperere, ngonzo ni ayeke gbi ndo tongana kota wâ.

⁷Ala kue amu wâ tongana fur, ala fâ akota zo ti ala ahunzi ala; agbia ti ala kue ati awe, mbeni zo oko na popo ti ala ti iri mbi ayeke daa pepe.

⁸“Azo ti Efraim abongbi aga oko na ambeni mara, azo ti Efraim aga tongana makara so a yoro ni gi mbage oko.

⁹Awande ayeke gboto ngangu ti azo ti Efraim, me ala hinga ye oko daa pepe; kua ti li ti ala avuru, me ala hinga ye oko daa pepe.

¹⁰Baba ti azo ti Israel ayeke fa sioni ti ala na le ti azo; me ala kiri na *KOTA GBIA, Nzapa ti ala pepe. Ataa so kue, ala gi lo pepe.

¹¹Azo ti Efraim ayeke tongana mbipa so le ti lo azi pepe si lo hinga ndo pepe. Ala iri Ezipte, na pekoni ala kpe na sese ti Asirii.

¹²Na ndembe so ala yeke kpe ti gue, mbi bi gbanda ti mbi na ndö ti ala, mbi bi ala na sese tongana andeke ti nduzu; mbi yeke pika ala tongana ti so mbi tene tënë ni na ala na ya ti bongbi ti ala so.

¹³“Mawa na azo ti Efraim, ngbanga ti so ala kpe yongoro na tere ti mbi! Kota kpale na ndö ti ala, ngbanga ti so ala tomboka na tere ti mbi! Ala so ayeke tene mvene na tere ti mbi so, fade mbi yeke zi ala tongana nyen?

¹⁴Tongana ala yeke dekongo na mbi, ala yeke sara ni na be ti ala kue pepe. Me na ndö ti gbogbo ti ala, ala yeke dema, ala yeke suru tere ti ala na ka ti wara kobe na fini vin. Na sarango ye tongaso, ala yeke hon yongoro na tere ti mbi.

¹⁵Mbi laa mbi fa lege na ala, mbi mu ngangu na ala, me ala leke na be ti ala ti sara sioni na mbi.

¹⁶Tongana ala yeke kiri, ala yeke kiri na mbage ti mbi pepe. Ala yeke tongana kokora so aba bango. Fade amakonzi ti ala ayeke kui na ya ti bira ndali ti sioni yanga ti ala; ye so ayeke sara si azo ayeke he ala na ngia na sese ti Ezipte.”