Read La Bible en Sango courant – Mbeti ti Nzapa Amos 5 Bible Online

Amos 5 - La Bible en Sango courant – Mbeti ti Nzapa bible

Amos 5

¹Azo ti Israel, ala ma tënë so: mbi ye ti he bia ti totongo kuâ so na ndö ti ala.

²Lo ti awe, Israel, maseka-wali so, lo yeke kiri ti londo pepe. Lo lango na sese na kodro ti lo wani, zo ti yo lo na nduzu ayeke daa pepe.

³Biani, tënë so Kota Gbia NZAPA atene na ndö ti azo ti Israel ayeke so: “Gbata so atokua aturugu saki oko na bira, gi ngbangbo oko laa ayeke kiri na kodro; gbata so atokua aturugu ngbangbo oko na bira, gi baleoko laa ayeke kiri na kodro.”

⁴Tënë so *KOTA GBIA atene na azo ti Israel ayeke so: “Ala gi mbi si fade ala duti na fini.

⁵Me ala gue, agi mbi na Betel pepe, ala li na Gilgal pepe, ala gue, asi kâ na Bersheba pepe. Biani, fade a yeke gbu azo ti Gilgal kue ti gue na ala na kodro wande si Betel, da ti Nzapa ayeke ga da ti ayanda.”

⁶Ala gi KOTA GBIA si fade ala duti na fini. Tongaso pepe, fade lo yeke ga tongana wâ na tere ti asewa ti Joseph, wâ ni ayeke gbi ye kue na Betel si zo oko ti mingongo ni ayeke duti daa pepe.

⁷Ala sara si sarango ye na lege ti ndia aga tongana sioni yoro ti fango zo, ala yeke do na sese fango ngbanga ti mbirimbiri.

⁸Lo so lo sara bongbi ti atongoro, Pleyade na Orion, lo sara si ndo so avuko pitipiti aga lumiere ti ndaperere; lo sara si kota lâ avuko si aga bi. Lo iri ngu ti kota ngu-ingo ti ga si lo tuku ni na ndö ti sese: iri ti lo ayeke KOTA GBIA.

⁹Lo yeke sara si azo akinda zo ti ngangu, ala buba ngangu gbagba kue.

¹⁰Zo so ayeke ke na awafango-ngbanga sioni fango ngbanga ti ala, be ti ala ake lo; zo so aga ti tene taa-tënë na le ti ngbanga, ala yeke baa lo na sioni le.

¹¹Ala yeke sara ngangu na azo ti mawa, ala yeke gbu ale ti kobe ti azo ni na ngangu. Ndani laa apendere da so ala sara na têne so, fade ala yeke lango na ya ni pepe; anzoni vinye so ala lu so, fade ala yeke nyon vin ni pepe.

¹²Biani, mbi hinga gba ti asioni ye so ala sara na asiokpari ti ala so ahon ndoni so. Ala yeke sara ngangu na azo ti mbirimbiri, ala yeke mu goro na maboko ti azo. Na le ti ngbanga, ala yeke kanga lege titene a fâ ngbanga ti azo ti mawa na legeni.

¹³Ngoi ni so ayeke ngoi ti sioni, ndani laa zo ti ndara akai kpoo.

¹⁴Ayeke nzoni ala gi lege ti sara nzoni ye, me ala sara sioni ye pepe. Tongaso, fade ala yeke duti na fini si KOTA GBIA, Nzapa so ayeke na ndö ti dunia kue ayeke duti na ala, tongana ti so ala wani ayeke tene so.

¹⁵Ala ke ye ti sioni, ala ye ye ti nzoni. Na le ti ngbanga, ala kiri afâ ngbanga na lege ti ndia; e hinga pepe, fade KOTA GBIA, Nzapa so ayeke na ndö ti dunia kue ayeke baa mawa ti tanga ti azo ti sewa ti Joseph.

¹⁶Ndani laa, tënë so KOTA GBIA, Nzapa so ayeke na ndö ti dunia kue atene ayeke so: “Na ndo so kue azo ayeke bongbi daa, fade azo ayeke ma abia ti totongo kuâ; na ndö ti alege kue, azo ayeke tene: ‘So ye ti mawa ti nyen! So ye ti mawa ti nyen!’ Fade a yeke iri zo ti fango yaka ti ga ti toto kuâ; a yeke iri nga azo so ahinga lege ti totongo kuâ ti ga ti toto kuâ.

¹⁷Na ya ti ayaka ti *vinye kue, fade azo ayeke ma abia ti totongo kuâ na ndembe so mbi yeke hon na popo ti ala”; tënë so KOTA GBIA atene laa.

¹⁸Mawa na ala, azo so ayeke ku *lango ti KOTA GBIA! Nzoni ye ti nyen laa ala yeke wara na lango ti KOTA GBIA ni nyen? Lango ni ayeke duti lango ti vukongo ndo, me lango ti lumiere pepe.

¹⁹Lango ni ayeke duti tongana lango ti mbeni zo so akpe bamara si lo gue, lo tengbi na ze; na pekoni, zo ni asi na da ti lo, lo zia maboko ti lo na tere ti dere ti da si ngbo ate lo.

²⁰Lango ti KOTA GBIA ni ayeke duti ande lango ti lumiere? — Oko pepe! Me ayeke duti lango ti vukongo ndo, lango so ndo avuko pitipiti, lango so lumiere ayeke daa kete pepe!

²¹*KOTA GBIA atene: “Amatanga ti ala so ala yeke sara so, mbi ke ni, mbi ye ti baa ni mbeni pepe; abongbi ti ala, mbi lingbi ti kanga be ti mbi na ni mbeni pepe.

²²Asandaga ti anyama so a yeke gbi ni kue na wâ na ale ti kobe ti ala so ala ya na mbi na *sandaga so, be ti mbi anzere na ni oko pepe. Anyama ti mafuta so ala mu na sandaga ti beoko so, mbi ye ti baa na le ti mbi oko pepe.

²³Ala zia ti so mê ti mbi na abia ti ala ni; mbi ye ti ma go ti kundi ti ala pepe.

²⁴Me ayeke nzoni fango ngbanga na lege ti ndia asua tongana ngu si fango ngbanga ti mbirimbiri asua tongana ngu so ayeke hole laoko pepe.

²⁵“Ala azo ti Israel, ngu baleosio so ala sara ando na benyama so, ala mu na mbi asandaga ti nyama na ti ale ti kobe?

²⁶Ala yeke yo ando ayanda ti ala so ala wani asara: Sakut, nzapa-gbia ti ala nga na Kewan, tongoro ti ala na nzapa ti ala tongana ti so ala yeke sara fadeso so? Oko pepe!

²⁷Ndani laa, mbi yeke sara si a gbu ala ti gue na ala yongoro na peko ti Damas kâ”; tënë so KOTA GBIA atene laa. Iri ti lo ayeke “Nzapa so ayeke na ndö ti dunia kue.”