Read La Bible en Sango courant – Mbeti ti Nzapa Jonas 1 Bible Online

Jonas 1 - La Bible en Sango courant – Mbeti ti Nzapa bible

Jonas 1

¹Mbeni lâ, tënë ti *KOTA GBIA asi na Jonas, molenge ti Amitai, atene:

²“Londo, mo gue na Ninive, kota gbata so! Mo dekongo na tënë ti yanga ti mbi na azo ni, mo tene, mbi baa sioni ti ala ahon ndoni awe.”

³Me Jonas alondo ti lo ti kpe ti gue na Tarsis, yongoro na le ti KOTA GBIA. Lo gue, lo si na Zafa. Kâ, lo wara mbeni mangboko so ayeke gue na Tarsis. Lo futa mangboko ni si lo na azo ti ya ni kue alondo ti gue na Tarsis, yongoro na le ti KOTA GBIA.

⁴Me KOTA GBIA atokua mbeni kota pupu na le ti kota ngu-ingo. Kota pupu ni ayeke ya ngangu si ya ti mangboko ni aye ti fâ.

⁵Mbeto asara azo ti kua ti mangboko ni. Nilaa, zo oko oko ayeke dekongo ti iri nzapa ti lo. Na pekoni, ala tuku akungba so ayeke na ya ti mangboko ni na ya ti ngu titene mangboko ni ayapu. Andaa Jonas azu ti lo na mbeni ndo so ayeke na ya ti mangboko ni, na mbage ti gbeni si lo kui na lango.

⁶Kapita ti mangboko ni asi na tere ti lo si atene na lo: “Ee mo! Nyen laa mo yeke sara so? Mo yeke lango? Londo! Mo dekongo, mo iri nzapa ti mo. E hinga pepe, fade lo yeke baa mawa ti e si e kui pepe.”

⁷Azo ti ya ti mangboko ni atene na popo ti ala: “Ala ga, e bi zeke ti hinga zo wa laa asara si pasi so asi na e so.” Ala bi zeke ni si afa Jonas.

⁸Tongaso ala hunda lo, atene: “Fa na e: ndali ti zo wa laa ye so asi na e so? Kua ti mo ayeke nyen? Mo londo na ndo wa? Mo yeke zo ti kodro wa? Mara ti mo ayeke nyen?”

⁹Jonas akiri tënë na ala, atene: “Mara ti mbi ayeke hebro; mbi yeke voro KOTA GBIA, Nzapa so ayeke na yayu, lo so asara kota ngu-ingo nga na sese.”

¹⁰Na pekoni, Jonas afa na azo ni peko ti ye so asi na lo. So ala hinga atene, Jonas ayeke kpe yongoro na le ti KOTA GBIA, be ti ala kue afun si ala hunda lo, atene: “Mo sara mara ti ye tongaso ngbanga ti nyen?”

¹¹So *amapo ti le ngu ni ayeke londo gi londongo ngangu ti gue na ni, ala hunda lo, atene: “Fade e sara nyen na mo titene amapo ni akai na tere ti e so?”

¹²Jonas akiri tënë na ala, atene: “Ala mu mbi, abi mbi na ya ti ngu si fade amapo ti le ti kota ngu-ingo ni akai. Mbi hinga, mbi tene, ndali ti mbi laa kota pupu so ayeke yingi ala so.”

¹³Azo ti kua ti mangboko ni ayeke sara ngangu ti si na yanga ti ngu, me ala sara gbaa, ngbanga ti so amapo so ayeke ga na ndö ti ala ayeke londo gi londongo ngangu ti gue na ni.

¹⁴Tongaso ala dekongo na KOTA GBIA, atene: “KOTA GBIA, e gbu gere ti mo! Sara si e kui ndali ti koli so pepe. Sara si ngbanga ti mene ti mbeni zo ti mbirimbiri ayeke na li ti e pepe. Biani mo, KOTA GBIA, mo yeke sara ye so be ti mo aye.”

¹⁵Na pekoni, ala mu Jonas abi lo na ya ti kota ngu-ingo si le ti ngu so ayeke yingi ngangu so akai kpoo.

¹⁶Mbeto ti KOTA GBIA ahon ndö ti azo ti mangboko ni, ala mu mbeni *sandaga na lo si ala deba yanga ti ala ti mu mbeni ye na lo.