Read La Bible en Sango courant – Mbeti ti Nzapa Wungo ti azo 14 Bible Online

Wungo ti azo 14 - La Bible en Sango courant – Mbeti ti Nzapa bible

Wungo ti azo 14

¹Bongbi ti azo ti Israel kue ato nda ti dekongo si azo atoto na bi ni kue.

²Ala kasa Moïse na Aaron, atene: “Tongana e kui lani na kodro ti Ezipte, ka ayeke nzoni! Tongana e kui na ya ti benyama so, ka ayeke nzoni!

³Ngbanga ti nyen *KOTA GBIA aga na e ge titene e kui kuâ ti yongoro zeme so? Fade awato ayeke gbu awali ti e na amolenge ti e kue. Ayeke fade nzoni titene e kiri na Ezipte!”

⁴Ala tene na popo ti ala, atene: “Ala ga, e soro mbeni makonzi, e kiri na Ezipte!”

⁵Moïse na Aaron ati akpo li ti ala na sese na dawa ti bongbi ti azo ti Israel ni kue.

⁶Josué, molenge ti Nune na Kaleb, molenge ti Yefune ayeke lani na popo ti azo so ague ti *bembe ndo na ya ti kodro ni, ala suru bongo na tere ti ala.

⁷Ala tene na bongbi ti azo ti Israel kue, atene: “Kodro so e gue, e bembe ndo daa so ayeke nzoni kodro mingi.

⁸Tongana KOTA GBIA aye ti sara nzoni na e, fade lo yeke gue na e na ya ti kodro ni, lo yeke mu na e kodro ni, *kodro so ngu ti me ti bagara na mafuta ti wotoro asi singo daa.

⁹Gi ye oko, ala sara ngangu li na KOTA GBIA pepe, ala sara mbeto ti azo ti kodro ni pepe, e yeke nika ala gi legeoko awe! Anzapa ti batango ala ado ala azia awe; me ti e, KOTA GBIA ayeke na e. Ala sara mbeto ti azo ni pepe!”

¹⁰Bongbi ti azo ti Israel kue atene tënë ti bongo ala na têne. Hio tongaso, azo ni abaa gonda ti KOTA GBIA na ndö ti da ti bongo so KOTA GBIA na azo ti lo ayeke wara tere daa.

¹¹*KOTA GBIA atene na Moïse: “Azo so ayeke ngba ti ke mbi ngbii asi lawa? Ala yeke ke ti zia be ti ala na ndö ti mbi ngbii asi lawa, ataa aye ti kpene so kue mbi sara na popo ti ala?

¹²Fade mbi yeke pika ala na kobela ti bubango kodro, mbi yeke gbanzi ala na ye so ayeke ga ti ala. Ti mo Moïse, fade mbi yeke sara titene mo ga mbeni kota mara nga na mara so ayeke ngangu ahon ala.”

¹³Moïse akiri tënë na KOTA GBIA, atene: “Azo ti Ezipte ahinga atene, mo laa, na lege ti ngangu ti mo, mo sara si azo so asigigi na kodro ti Ezipte.

¹⁴Ala tene tënë ni na azo ti kodro so awe. Azo ni ahinga atene, mo KOTA GBIA, mo yeke na popo ti azo ti mo, mo yeke fa ka tere ti mo na ala. Mbinda ti mo ayeke luti na ndö ti ala; na kota lâ, mo yeke tambula na dawa ti ala na lege ti mbeni ngbongboro mbinda; na bi, mo yeke tambula na dawa ti ala na lege ti mbeni ngbongboro wâ.

¹⁵Tongana mo fâ ala kue na ya ti lango oko, azo ti amara nde so ama sango ti mo, ayeke tene ande, atene:

¹⁶‘KOTA GBIA alingbi ti zia azo so pepe ti li na ya ti kodro so lo deba yanga ti lo lani ti mu na ala; ndani laa lo fâ ala kue na ya ti benyama.’

¹⁷KOTA GBIA, mbi gbu gere ti mo; ayeke nzoni mo fa ngangu ti mo fadeso alingbi na tënë so mo tene:

¹⁸‘Mbi yeke KOTA GBIA, mbi yeke sara ngonzo hio hio pepe, nzoni be ti mbi asi singo, mbi yeke kanga be na ndö ti sioni na siokpari ti zo. Me zo so asara siokpari, mbi yeke zia lo senge pepe. Tongana mbeni zo asara siokpari, mbi yeke zi tënë ni na li ti lo pepe, ngbii asi na amolenge ti lo ti molongo ota ni wala osio ni.’

¹⁹KOTA GBIA, ndali ti nzoni be ti mo, zi siokpari ti azo so na li ti ala tongana ti so mo sara, ti to ndani na Ezipte ngbii asi na ndo so.”

²⁰KOTA GBIA akiri tënë, atene: “Mbi yeke zi sioni ni na li ti ala tongana ti so mo hunda.

²¹Me na iri ti mbi KOTA GBIA so mbi yeke na fini si gonda ti mbi asi singo na ndö ti sese kue:

²²Azo so abaa gonda ti mbi kue, ala baa aye ti kpene so mbi sara na Ezipte nga na ya ti benyama. Ala tara be ti mbi fani baleoko, ala ma yanga ti mbi pepe.

²³Nilaa, fade zo oko na popo ti ala ayeke baa pepe kodro so mbi deba yanga ti mbi ti mu na akotara ti ala. Azo so kue abaa mbi tongana mbumbuse zo so, mbeni oko ayeke baa kodro ni pepe.

²⁴Me ti Kaleb, zo ti kua ti mbi, mbeni yingo nde ayeke na lo, lo sara ye alingbi na tënë ti yanga ti mbi, nilaa mbi yeke sara titene lo li na ya ti kodro so lani lo gue, lo *bembe ndo daa; fade *ahale ti lo ayeke mu ni titene aga ti ala.

²⁵— Ti fadeso, azo ti mara ti Amalek na azo ti Kanaan ayeke lango na popo-hoto so. — Kekereke ala, azo ti Israel, ala yeke kiri na benyama, ala mu lege so ague na mbage ti kota ngu-ingo ti Asosongo.”

²⁶*KOTA GBIA atene na Moïse na Aaron:

²⁷“Mbi ma azo ti Israel ayeke kasa mbi. Fade bongbi ti asioni zo so ayeke ngba ti kasa mbi ngbii asi lawa?

²⁸Ala tene na azo ti Israel, atene: ‘Na iri ti mbi KOTA GBIA so mbi yeke na fini, mbi deba yanga ti mbi awe. Fade mbi yeke sara ye na ala alingbi na atënë ti ala so ala tene na mê ti mbi so. So tënë ti yanga ti mbi, KOTA GBIA laa.

²⁹Fade ala yeke kui na ya ti benyama so. Ala so kue ngu ti ala alingbi baleuse na ala so ngu ti ala ahon baleuse si a diko wungo ti ala, ala so akasa mbi, ala yeke kui kue.

³⁰Mbi deba yanga ti mbi lani ti mu na ala kodro ni titene ala duti daa. Mbi deba yanga ti mbi awe, fade ala yeke li na ya ti kodro ni pepe, gi Kaleb, molenge ti Yefune na Josué, molenge ti Nune.

³¹Âdu ti akete molenge ti ala so lani ala tene, fade awato ayeke gbu ala so, amolenge ni laa mbi yeke sara titene ala li na ya ti kodro ni; ala yeke hinga kodro so ala, azo ti Israel ake ni so.

³²Me ti ala, ala yeke kui na ya ti benyama so.

³³Fade amolenge ti ala ayeke ga awabatango-nyama na ya ti benyama na ya ti ngu baleosio. Amolenge ti ala ayeke baa pasi ti asioni ye so ala, ababâ ni asara; amolenge ni ayeke ngba na ya ti benyama ngbii ala, ababâ ni akui kue si.

³⁴Ala mu lani lango baleosio ti *bembe ndo na ya ti kodro ni; nilaa asioni ye so ala sara so, ala yeke baa pasi na peko ni na ya ti ngu baleosio; so ti tene ngu oko ndali ti lango oko, ngu oko ndali ti lango oko. Tongaso, ala yeke hinga atene, sarango ngangu li na mbi, ayeke sioni mingi.

³⁵Mbi KOTA GBIA, mbi tene tënë awe. Fade mbi yeke sara gi tongaso na bongbi ti asioni zo so asara ngangu li na mbi so; ala yeke kui kue na ya ti benyama so, mbeni zo oko ayeke ngba pepe.’ ”

³⁶Azo so lani Moïse atokua ala ti bembe ndo na ya ti kodro ni, na peko ti so ala kiri awe, ala tene sioni tënë ti kodro ni si apusu bongbi ti azo ti Israel ti kasa Moïse.

³⁷Ala so atene sioni tënë ti kodro ni so, ala kui gi kuâ ti ngangu na dawa ti KOTA GBIA.

³⁸Na popo ti azo so ague lani abembe ndo so, gi Josué, molenge ti Nune na Kaleb, molenge ti Yefune laa angba na fini.

³⁹Moïse atene peko ti atënë so kue na azo ti Israel; ala sara kota mawa.

⁴⁰Na ndaperere, so ndo angba kâ, ala londo ti gue na mbage ti sese so ahoto ayeke daa mingi si ala tene: “E sara siokpari awe! Ti fadeso, e yeke nduru ti gue na ndo so *KOTA GBIA afa na e.”

⁴¹Moïse atene: “Nyen laa ala yeke sara so? Ala yeke ke yanga ti KOTA GBIA ngbanga ti nyen? Fade ye ni ayeke ga nzoni na ala pepe!

⁴²Ala ma na ndö ti ahoto ni pepe, ngbanga ti so KOTA GBIA ayeke na ala pepe. Ala gue kâ pepe, ndali ti awato ti ala ayeke hon ndö ti ala na bira.

⁴³Azo ti mara ti Amalek na azo ti Kanaan laa ayeke na dawa ti ala so. Azo ni ayeke fâ ala kue na ya ti bira ni, ngbanga ti so ala ke KOTA GBIA awe; fade lo yeke na ala pepe.”

⁴⁴Me azo ti Israel asara ngangu li, ala ma na ndö ti ahoto ni; andaa Moïse na sanduku ti *mbuki ti KOTA GBIA angba na ya ti bâbâ ni.

⁴⁵Nilaa azo ti mara ti Amalek na azo ti Kanaan so alango na ndö ti ahoto ni so azu, ala tiri bira na azo ti Israel, ala nika ala ngbii asi na Horma.