Read La Bible en Sango courant – Mbeti ti Nzapa Wungo ti azo 4 Bible Online

Wungo ti azo 4 - La Bible en Sango courant – Mbeti ti Nzapa bible

Wungo ti azo 4

²“Ala diko wungo ti *ahale ti Kehat so ayeke na popo ti azo ti mara ti Lévi, na lege ti akete mara ti ala oko oko nga na lege ti asewa ti ala oko oko.

³Ala diko ala so ngu ti ala alondo na ngu baleota asi na ngu baleoku, ala so alingbi ti sara kua na ya ti da ti bongo so KOTA GBIA na azo ti lo ayeke wara tere daa.

⁴Kua ti ahale ti Kehat na ya ti da ti bongo so KOTA GBIA na azo ti lo ayeke tere daa ayeke ti batango aye nde nde so ayeke nde si ayeke nzoni kue ahon atanga ni.

⁵Na ndembe so tambula ni ayeke londo, fade Aaron na amolenge ti lo ayeke ga ti zi ridoo so akangbi ya ti da ni ti kanga na ndö ti sanduku so a zia na ya ni atêne so a su atënë ti mbuki na le ni.

⁶Ala yeke kanga ndö ni na mbeni pendere poro ti nyama, ala yeke bi na ndö ti aye ni kue, mbeni kota bongo so nzoroko ni akpa le ti nduzu. Na pekoni, ala yeke yoro ayongoro keke ti yongo na sanduku ni.

⁷Ala yeke bi na ndö ti meza so a yeke zia mapa na ndö ni bongo so nzoroko ni akpa le ti nduzu si ala yeke zia na ndö ni aye tongana: akpangbara sembe, akete kopo, adu ti sembe nga na akopo ti samba. Ala yeke zia na ndö ti meza ni mapa so ala lingbi ti zia na dawa ti mbi KOTA GBIA lakue lakue.

⁸Ala yeke bi na ndö ti aye ni kue mbeni bengba bongo so ayeke za zango si ala yeke kanga ndö ni na mbeni pendere poro ti nyama. Na pekoni, ala yeke yoro ayongoro keke na tere ti meza ni ti yo na ni.

⁹Ala yeke mu mbeni bongo so nzoroko ni akpa le ti nduzu, ala bi na ndö ti gere ti alamba, alamba ni na aye ti tere ni kue, aye ti zingo na zende na tere ti ameshe ti lamba ni, akete sembe so a yeke tuku amburu ti wâ daa nga na akete ngbenda ti mafuta.

¹⁰Ala yeke mu aye ni kue, ala kanga ndö ni na mbeni pendere poro ti nyama. Na pekoni, ala yeke zia ni na ndö ti ye ti yongo na ni.

¹¹Ala yeke zia mbeni bongo so nzoroko ni akpa le ti nduzu na ndö ti gbalaka ti lôro. Ala yeke kanga ndö ni na mbeni pendere poro ti nyama si ala yeke yoro ayongoro keke na tere ti gbalaka ni ti yo na ni.

¹²Na pekoni, ala yeke mu aye kue ti vorongo na Nzapa so ala yeke sara na kua na ya ti da so a zia nde ndali ti KOTA GBIA, ala yeke zia ni na ya ti mbeni bongo so nzoroko ni akpa le ti nduzu, ala yeke kanga ndö ni na mbeni pendere poro ti nyama si ala yeke zia ni na ndö ti ye ti yongo na ni.

¹³Ala yeke zi amburu ti wâ so ayeke na ndö ti gbalaka ni si ala yeke kanga ndö ni na mbeni bengba bongo so ayeke za zango.

¹⁴Ala yeke zia na ndö ti bongo ni aye kue ti sarango na kua ti yango *sandaga: akete ta ti zongo na dukani, afurshete, apao na adu ti sembe so a yeke zia mene ti anyama daa ti fi na tere ti aye. Ala yeke kanga ndö ti aye ni kue na mbeni pendere poro ti nyama. Na pekoni, ala yeke yoro ayongoro keke na tere ti gbalaka ni ti yo na ni.

¹⁵Tongana Aaron na amolenge ti lo akanga akungba ti da ni kue nga na aye so kue a yeke sara na kua na ya ti da ni, gi na ndembe so ala yeke londo ti hon, ahale ti Kehat ayeke ga ti yo aye ni. Me ala yeke ndu mbeni ye ti ya ti kungba ni oko pepe, ngbanga ti ala kui. So kua ti ahale ti Kehat laa.

¹⁶Ti Elazar, molenge ti wayango-sandaga Aaron, kua ti lo ayeke ti baa lege ti mafuta ti ziango na ya ti alamba, dukani ti zongo na wâ, sandaga ti ale ti kobe so azo ayeke mu na ya ti lango oko oko nga na mafuta ti tukungo na li ti zo ti zia lo nde. Kua ti lo ayeke nga ti baa ndo na ndö ti da so a zia nde ndali ti Nzapa, na aye ti ya ni kue, aye nde nde ti sarango na kua ti ya ti da ni nga na agbakuru ni kue.”

¹⁷KOTA GBIA akiri atene na Moïse na Aaron:

¹⁸“Ala sara kue titene azo ti kete mara ti Kehat angba na fini na popo ti azo ti mara ti Lévi.

¹⁹Ala sara tongaso si azo ti kete mara ni alingbi ti ngba na fini, ala kui pepe na ndembe so ala yeke ga nduru na ndo so ayeke nde si ayeke nzoni kue ahon atanga ni: ti mo Aaron, mo na amolenge ti mo, fade ala yeke ga ti mu na zo oko oko kua ti lo nga na akungba ti lo ti yongo ni.

²⁰Tongaso, azo ti kete mara ni ayeke li pepe ti baa aye so a zia ni nde ndali ti Nzapa, ataa na ya ti kete ngoi. Tongaso pepe, fade ala yeke kui.”

²¹*KOTA GBIA atene na Moïse:

²²“Mo diko wungo ti *ahale ti Gershon na lege ti asewa ti ala oko oko nga na lege ti akete mara ti ala oko oko.

²³Mo yeke diko wungo ti akoli kue so ngu ti ala ato ndani na ngu baleota asi na ngu baleoku, ala so kue alingbi ti sara kua na ya ti da ti bongo so KOTA GBIA na azo ti lo ayeke wara tere daa.

²⁴Akua so azo ti kete mara ti Gershon alingbi ti sara ayeke so:

²⁵ala yeke yo bongo ti li ti da so a zia ni nde ndali ti Nzapa, aporo ti koli-taba nga na apendere poro ti nyama so a yeke kanga na li ti da ni, ridoo ti yanga ti da ti bongo so KOTA GBIA na azo ti lo ayeke wara tere daa.

²⁶Ala yeke yo nga abongo ti tere ti gbagba so angoro da ni na gbalaka, ridoo ti yanga ti gbagba ni, akamba ti kangango na gbagba ni, na akungba nde nde ti sarango na akua ti ala.

²⁷Akua so azo ti mara ti Gershon ayeke sara ande, ataa ti yongo akungba, ataa ti sarango kua ti ala, ala yeke sara ni na gbe ti komandema ti Aaron na amolenge ti lo. Ala laa ayeke fa na azo ti mara ti Gershon akua ti sarango ni nga na akungba so ala lingbi ti yongo ni.

²⁸So ayeke akua so azo ti kete mara ti Gershon ayeke sara na ya ti da ti bongo so KOTA GBIA na azo ti lo ayeke wara tere daa laa. Ala yeke sara kua ni na gbe ti Itamar, molenge ti wayango-sandaga Aaron.

²⁹“Ti *ahale ti Merari, mo yeke diko wungo ti ala na lege ti asewa ti ala oko oko nga na lege ti akete mara ti ala oko oko.

³⁰Mo yeke diko wungo ti akoli kue so ngu ti ala ato ndani na ngu baleota asi na ngu baleoku, ala so kue alingbi ti sara kua ti da ti bongo so *KOTA GBIA na azo ti lo ayeke wara tere daa.

³¹Akua so ala lingbi ti sara ayeke so: ala yeke yo *amabaya ti da ni, alate ti da ni, angbongboro keke ti da ni, agere ni,

³²angbongboro wen so angoro gbagba ni, agere ti awen ni, awen so a kpo ti gbu da ni na nduzu, akamba ti da ni nga na akungba nde nde so ala yeke sara na kua. Fade awayango-sandaga ayeke fa na zo oko oko kungba ti lo ti yongo ni.

³³So ayeke kua ti azo ti kete mara ti Merari so ala yeke sara na ya ti da so KOTA GBIA na azo ti lo ayeke wara tere daa laa. Ala yeke sara akua ni na gbe ti Itamar, molenge ti wayango-sandaga Aaron.”

³⁴Moïse, Aaron na amakonzi ti bongbi ti azo ti Israel adiko wungo ti azo ti kete mara ti Kehat na lege ti akete mara ti ala oko oko nga na lege ti asewa ti ala oko oko,

³⁵ala so ngu ti ala ato ndani na ngu baleota asi na ngu baleoku, ala so alingbi ti sara kua na ya ti da so *KOTA GBIA na azo ti lo ayeke wara tere daa.

³⁶Wungo ti ala so a diko ala kue na lege ti akete mara ti ala oko oko ayeke 2 750.

³⁷So ayeke wungo ti azo ti kete mara ti Kehat, ala so kue ayeke sara kua na ya ti da ti bongo so KOTA GBIA na azo ti lo ayeke wara tere daa laa; ala so Moïse na Aaron adiko wungo ti ala alingbi na yanga so KOTA GBIA amu Moïse.

³⁸Azo ti kete mara ti Gershon so a diko wungo ti ala na lege ti akete mara ti ala oko oko nga na lege ti asewa ti ala oko oko,

³⁹ala so kue ngu ti ala ato ndani na ngu baleota asi na ngu baleoku, ala so alingbi ti sara kua na ya ti da ti bongo so KOTA GBIA na azo ti lo ayeke wara tere daa,

⁴⁰wungo ti azo ni na lege ti kete mara ti ala nga na lege ti asewa ti ala ayeke 2 630.

⁴¹So ayeke wungo ti azo ti kete mara ti Gershon, ala so kue ayeke sara kua na ya ti da ti bongo so KOTA GBIA na azo ti lo ayeke wara tere daa laa. Moïse na Aaron adiko wungo ti ala alingbi na yanga so KOTA GBIA amu.

⁴²Azo ti kete mara ti Merari so a diko wungo ti ala na lege ti akete mara ti ala oko oko nga na lege ti asewa ti ala oko oko,

⁴³ala so kue ngu ti ala ato ndani na ngu baleota asi na ngu baleoku, ala so alingbi ti sara kua na ya ti da ti bongo so KOTA GBIA na azo ti lo ayeke wara tere daa,

⁴⁴wungo ti azo ni na lege ti kete mara ti ala kue ayeke 3 200.

⁴⁵So ayeke wungo ti azo ti kete mara ti Merari laa. Moïse na Aaron adiko wungo ti ala alingbi na yanga so KOTA GBIA amu na Moïse.

⁴⁶Moïse, Aaron na amakonzi ti Israel adiko wungo ti azo ti mara ti Lévi na lege ti akete mara ti ala oko oko nga na lege ti asewa ti ala oko oko,

⁴⁷ala so kue ngu ti ala ato ndani na ngu baleota asi na ngu baleoku, ala so alingbi ti sara kua na ya ti da ni, kua ti yongo da ni nga na kungba ti da ti bongo so KOTA GBIA na azo ti lo ayeke wara tere daa.

⁴⁸Wungo ti azo ni kue ayeke 8 580.

⁴⁹A diko wungo ti ala alingbi na yanga so KOTA GBIA amu na Moïse; a fa na zo oko oko kua ti lo ti sarango ni na kungba ti lo ti yongo ni alingbi na yanga so KOTA GBIA amu na Moïse.