Read La Bible en Sango courant – Mbeti ti Nzapa Mishe 7 Bible Online

Mishe 7 - La Bible en Sango courant – Mbeti ti Nzapa bible

Mishe 7

¹Mawa na mbi! Mbi yeke tongana zo so ague ti gi ale ti keke na peko ti so azo ako ale ti keke ni kue awe; mbi yeke tongana zo so ague ti gi ale ti *vinye na peko ti so azo afâ ale ti vinye ni awe. Me mbi wara mbeni ye oko ti tengo ni pepe, ataa le ti vinye wala le ti fige so anzere na mbi mingi so.

²Azo so abata be ti ala na Nzapa ayeke na ya ti kodro ni mbeni pepe. Mbeni zo ti mbirimbiri oko ayeke na popo ti azo ti kodro ni pepe. Azo kue ayeke gi gi lege ti fâ amba ti ala; zo oko oko ayeke gi lege titene mba ti lo ati na ya ti gbanda.

³Maboko ti ala ayapu na sarango sioni ye. Titene amakonzi asara nzoni ye, ala yeke hunda titene a mu na ala ye si; awafango-ngbanga ayeke hunda goro. Akota zo ayeke tene gi tënë ti nzara ti warango aye so ahon ndö ti ala si ala kue ayeke ma tere ti sara gi aye ni so.

⁴Zo ti nzoni na popo ti ala ayeke tongana aki; zo ti mbirimbiri na popo ti ala ayeke sioni ahon gba ti akeke ti ki. Lango ti fango ngbanga na ndö ti ala alingbi awe, lango so asanziri ti ala, awayanga-Nzapa, atene tënë ni kozoni awe so. Fadeso be ti ala afun kue awe.

⁵Ala azo, azo so ayeke nduru na ala, ala yeda na tënë ti ala pepe; azo so ala ye ala mingi so, ala zia be ti ala na ndö ti ala pepe. Ataa na awali ti ala wani, ala bata yanga ti ala.

⁶Biani, molenge-koli ayeke iri babâ ti lo zo ti gbogbolinda, molenge-wali ayeke ga wato ti mama ti lo, wali ayeke ga wato ti mama ti koli ti lo; wato ti zo oko oko ayeke azo ti da ti lo wani.

⁷Me ti mbi, mbi yeke baa ndo na mbage ti *KOTA GBIA, mbi yeke ku Nzapa, wasongo mbi; fade Nzapa ti mbi ayeke ma mbi.

⁸Mo, wato ti mbi, mo he mbi pepe. Tongana mbi ti, fade mbi yeke londo; tongana mbi duti na ya ti vukongo ndo, *KOTA GBIA ayeke lumiere ti mbi.

⁹Ayeke nzoni mbi kanga be ti mbi na ngonzo ti KOTA GBIA, ngbanga ti so mbi sara siokpari ti ke ti lo. Me mbeni lango ayeke ga so fade lo yeke mu tënë ti mbi na maboko ti lo, lo yeke sara si fango ngbanga ti mbi aduti na legeni. Lo yeke zi mbi na ya ti vukongo ndo ti zia mbi na ya ti lumiere si fade mbi yeke baa aye ti lo so lo sara ni na lege ti mbirimbiri.

¹⁰Fade wato ti mbi ayeke baa ye ni na le ti lo si kamene ayeke gbu le ti lo; wato ti mbi so ayeke hunda lani mbi, atene: “KOTA GBIA, Nzapa ti mo ni ayeke na ndo wa?” Fade mbi yeke baa lo na le na ndembe so a yeke do lo na gere, tongana ti so a yeke do potopoto na lege.

¹¹Lango titene a kiri ti leke gbagba ti tere ti gbata ti mo ayeke ga. Na lango ni so, fade azo ayeke kiri ti kono ya ti kodro ti mo.

¹²Na lango ni so, azo ti mo ayeke londo mbage na mbage ti kiri na ndo ti mo; ambeni ayeke londo na Asirii, ambeni ayeke londo na Ezipte nga na ya ti akodro nde nde so ayeke na popo ti ngu ti Ezipte na ti Efrate; ambeni ayeke londo na yanga ti kota ngu-ingo kâ, ambeni ayeke londo na yanga ti kota ngu-ingo ge; ambeni ayeke londo na sese ti ahoto kâ, ambeni ayeke londo na sese ti ahoto ge.

¹³Fade tanga ti sese ayeke ga tongana benyama ndali ti sioni sarango ye ti azo so alango kâ.

¹⁴KOTA GBIA, na keke ti mo, mo fa lege na azo ti mo tongana ti so wabatango-taba ayeke fa lege na ataba ti lo. Azo ni aga ye ti mo awe. Fadeso ala yeke duti gi ala oko na ya ti ngonda, me anzoni sese so akeke ayeke sigigi daa pendere angoro tere ni kue. Gue na azo ti mo na nzoni sese ti Bashan na ti Galaad, tongana ti so mo sara ando.

¹⁵Sara titene e baa aye ti kpene ti mo tongana ti so mo sara ando na ndembe ti sigingo ti e na kodro ti Ezipte.

¹⁶Fade amara nde ayeke baa aye ni na le ti ala, kamene ayeke gbu le ti ala, ataa so ala yeke na ngangu mingi. Ala yeke hinga tënë so ala yeke tene pepe, ala yeke yeda ti ma tënë oko pepe.

¹⁷Fade ala yeke su fuku ti sese tongana ngbo, tongana anyama so ayeke hara na sese. Na mbeto na be ti ala, ala yeke sigigi na ya ti angangu gbagba ti ala ti bira ti ga na mo KOTA GBIA, Nzapa ti e. Fade mbeto ayeke hon ndö ti ala mbeto ti mo ayeke sara ala.

¹⁸Mbeni nzapa wa laa alingbi na mo? Mo laa mo yeke zi siokpari ti tanga ti azo ti mo so angba na fini, mo yeke zia be ti mo na kpengbango li ti azo ni pepe. Ndali ti yengo so mo ye na tanga ti azo ti mo so angba na fini, mo yeke sara ngonzo na tere ti ala ngbii aninga pepe, me ye so anzere na be ti mo ayeke titene mo sara nzoni be na azo.

¹⁹Fade mo yeke kiri ti baa mawa ti e, mo yeke do asiokpari ti e na gbe ti gere ti mo, mo yeke tuku asioni ti e kue na gbe ti kota ngu-ingo.

²⁰Mo yeke bata tënë ti yanga ti mo na *ahale ti Jacob na ti Abraham. Ye so mo deba yanga ti mo ti sara na akotara ti e ngbene ye ando laa.