Read La Bible en Sango courant – Mbeti ti Nzapa Nahum 1 Bible Online

Nahum 1 - La Bible en Sango courant – Mbeti ti Nzapa bible

Nahum 1

¹So ayeke nengo tënë ti wayanga-Nzapa na ndö ti kodro ti Ninive. So ayeke buku ti aye so asi na le ti Nahum, zo ti kodro ti Elkosh si lo baa ni na ya ti mbeni ye tongana bango-li.

²*KOTA GBIA ayeke Nzapa so ayeke sara mbanda, lo yeke kiri peko ti sioni na azo so asara sioni na lo. KOTA GBIA ayeke kiri peko ti sioni na azo so ake lo; ngonzo ti lo ayeke sioni mingi. Lo yeke kiri peko ti sioni na awato ti lo, ngonzo ti lo ayeke londo tongana wâ na tere ti ala.

³KOTA GBIA ayeke sara ngonzo hio hio pepe, lo yeke ngangu mingi. Me zo so asara siokpari, lo yeke zia lo senge pepe. Lo yeke tambula na ya ti kota pupu so ayeke ya ngangu, lo yeke tambula nga na ya ti ngu-Nzapa so ayeke pika mingi mingi so. Ambinda ayeke tongana fuku ti sese, fuku ti sese so ayeke londo na peko ti gere ti lo.

⁴Lo suku na kota ngu-ingo si kota ngu-ingo ni ahole; lo sara titene *abale kue ahole. Tongaso apere so ayeke na sese ti Bashan na akeke ti hoto ti Karmel ahole; akongo ti pere ti hoto ti Liban ahole.

⁵Akota hoto ayeke yingi na dawa ti lo si akete hoto aga tongana ngu. Na dawa ti lo, sese ayingi si dunia na azo ni kue ado.

⁶Tongana lo sara ngonzo, zo wa laa ayeke luti na le ti lo, zo wa? Tongana ngonzo ti lo alondo tongana wâ, zo wa laa ayeke ngba na fini, zo wa? Ngonzo ti lo ayeke gbi ye kue tongana ti so kota wâ ayeke gbi ye kue; ya ti akota têne ayeke suru na dawa ti lo.

⁷KOTA GBIA ayeke nzoni; na ngoi ti ye ti ngangu, lo yeke ndo so zo akpe daa ti bata tere ti lo. Lo yeke bata azo so azia be ti ala na ndö ti lo

⁸na ndembe so ye ti ngangu ahon ndö ti ala tongana ngu so ayeke sua ngangu. Me lo yeke buba kodro ti awato ti lo si lo yeke tumba ala na ndo so avuko pitipiti.

⁹Ala azo, nyen laa ala yeke leke na be ti ala na tere ti *KOTA GBIA so nyen? Lo yeke hunzi awato ti ala kue si mbeni ye ti ngangu ayeke kiri ti si na ala, azo ti Juda pepe.

¹⁰Awato ti ala ni ayeke tongana gba ti akeke ti ki so ali ya ti tere kirikiri; awato ni anyon samba ahon ndö ti ala awe. Fade ala yeke gbi kue tongana holengo pere.

¹¹Zo so aleke na be ti lo ti sara sioni na KOTA GBIA, zo ni asigigi na ya ti kodro ti mo. Zo ni aleke na be ti lo sioni pialo ti bubango ndo.

¹²Tënë so KOTA GBIA atene na azo ti Juda ayeke so: “Ataa awato ti ala awu mingi si awato ni ayeke ngangu, fade a yeke fâ ala kue, ti ala ayeke hunzi. Lani mbi sara pasi na azo ti Juda, me mbi yeke kiri ti sara pasi na ala pepe.

¹³Ti fadeso, mbi yeke zi keke so awato ti mo akanga na go ti mo ti sara mo na ngbaa so; mbi yeke fâ akamba so kue a kanga na mo.”

¹⁴Ti mo, gbia ti Ninive, yanga so KOTA GBIA amu na ndö ti mo ayeke so: “Mbeni *hale ti mo oko ti sara si iri ti mo angba na gigi ayeke duti daa pepe. Ayanda so mo leke na keke nga na wen si ayeke na ya ti da ti anzapa ti mo so, fade mbi yeke buba ni kue. Mbi yeke leke du ti kuâ ti mo, ngbanga ti so mo kiri mo ne na le ti mbi pepe.”