Read La Bible en Sango courant – Mbeti ti Nzapa Nahum 2 Bible Online

Nahum 2 - La Bible en Sango courant – Mbeti ti Nzapa bible

Nahum 2

¹Ala azo ti Juda, baa mbeni zo alondo na ndö ti ahoto ayeke ga, lo yeke ga na nzoni tënë: lo yeke tene tënë ti siriri! Ala sara amatanga ti ala, ala sara ye alingbi na zendo so ala mu na Nzapa. Zo ti sioni pialo ti bubango ndo so ayeke kiri ti hon na ya ti kodro ti ala pepe; ti lo ahunzi biani biani awe.

²Ninive, azo ayeke ga na ngangu ti tiri bira na mo. Ala aturugu, ala bata ngangu gbagba! Le ti ala akpengba na ndö ti alege, ala leke tere ti ala ti tiri bira, ala luti ngangu tongana koli!

³Lani, azo ti nzi anzi aye ti *ahale ti Jacob kue, ala buba ayaka ti *vinye ti ala kue; me fadeso, KOTA GBIA akiri na ala ye so ala yeke pika kate ti ala daa, lo wani laa azo ti Israel ayeke pika kate ti ala ndali ti lo.

⁴Angangu turugu ti awato ti Ninive ayeke na *avala so tere ni ayeke bengba si ala yu abengba bongo. Na ndembe so ala leke tere ti ala ti tiri bira, apusu ti mbarata ti ala aza tongana wâ, ala yoro alikongo ti ala na nduzu.

⁵Apusu ti mbarata ni ayeke hon gi na ngangu, ala tuku na ndö ti alege nga na ndö ti abalabala. Ala yeke tongana *tanda so aza wâ, ala yeke hon tongana wâ ti bekpa.

⁶Gbia ti Asirii airi aturugu ti lo ti kota kamba, me na gango ti ala, gere ti ala ayeke do dongo. Azo so ayeke ga na bira ni ayeke gue hio hio na tere ti ngangu gbagba; ala leke ndo ti batango tere ti ala daa na gbe ti agbagba ni.

⁷Gi hio tongaso, awato akungbi ayanga ti gbagba so ayeke na tere ti ngu so awe; yangbo ti gbia ati awe!

⁸Ala gbu nzapa-wali ti gbata ni, ala mu lo ahon na lo; awali so ayeke sara kua na lo, ala yeke dema tere ti ala tongana ambipa; ala zia maboko na ndö ti go ti fa mawa ti ala.

⁹Ninive ayeke ando tongana mbeni ndo ti batango ngu so ngu ayeke daa gbani gbani, me fadeso, ngu ni ayuru kue awe. Azo ti Ninive kue ayeke kpe ti hon. Azo ayeke dekongo, atene: “Ala luti! Ala luti!”, me zo oko abi le ti lo ti baa ndo na peko pepe.

¹⁰Ala azo, ala nzi nginza na lôro ahon na ni! Amosoro asi singo na ya ti gbata ni, apendere ye ayeke daa gbani gbani.

¹¹A nzi ye kue awe, a buba ye kue awe, a ro ye kue ahon na ni awe! Ngangu ahunzi na azo kue awe; tere ti ala kue ayeke do, le ti ala kue akpa le ti akuâ.

¹²Fadeso, ndo ti lango ti abamara ayeke na ndo wa? Ndo so akete bamara ayeke te kobe daa ayeke na ndo wa? Lani, tongana bamara ahon ti gi nyama ndali ti amolenge ti lo, zo oko ti zia mbeto na be ti ala ayeke daa pepe.

¹³Bamara ni ayeke fâ nyama, lo yeke suru ya ti nyama ni, lo zia na wali ti lo nga na amolenge ti lo. Lo yeke sara si ya ti du ti lo asi singo na anyama; du ti lo so lo yeke lango daa so asi singo na anyama so lo suru ya ti ala kete kete.

¹⁴Baa, mbi yeke ga na tere ti mo, so tënë ti yanga ti *KOTA GBIA so ayeke na ndö ti dunia kue laa: Mbi yeke gbi apusu ti mbarata ti bira ti mo, fade ayeke ga guru ti wâ. Amaseka ti mo so ayeke fade tongana amolenge ti bamara so, azo ayeke fâ ala kue na ya ti bira. Na ndö ti sese so, mbi yeke sara titene nzi ti mo ahunzi; zo ayeke kiri ti ma go ti alembe ti mo pepe.