Read La Bible en Sango courant – Mbeti ti Nzapa Nahum 3 Bible Online

Nahum 3 - La Bible en Sango courant – Mbeti ti Nzapa bible

Nahum 3

¹Mawa na mo, gbata ti tukungo mene! Tënë ti handango zo na tënë ti nzi laa asi singo kâ! Nzi angba ngbango na ya ti gbata ni!

²Kâ, gi toto ti fimbo, fia, fia, fia! Toto ti apusu ti mbarata, gada, gada, gada! Gere ti ambarata, kpakata, kpakata, kpakata! Apusu ti bira akpe fiuuu!

³Azo ti mbarata akpe loro, ala gue na bira, le ti ayongoro zeme aza tongana wâ; alikongo aza zango. Azo akui gbani gbani, akuâ na ndö ti tere, na ndö ti tere, zo alingbi ti diko ni pepe; azo ayeke pika gere ti ala na akuâ ni.

⁴Aye so kue ayeke si, ngbanga ti so Ninive ayeke tongana wali-ndumba; lo sara aye ti ndumba ti lo ni ahon ndoni. Lo handa azo na lege ti pendere ti lo, na lege ti sarango yoro ti lo. Tongaso lo mu azo ti mara mingi na ngbaa.

⁵Baa, mbi yeke ga na tere ti mo, so tënë ti yanga ti *KOTA GBIA so ayeke na ndö ti dunia kue laa: Mbi yeke yo bongo so ayeke na tere ti mo so na nduzu ngbii ti bi na li ti mo; mbi yeke sara titene amara nde abaa tere ti mo ti wali si ala baa kamene so ayeke na le ti mo.

⁶Mbi yeke tuku azende na li ti mo titene mo ga buba ye. Mbi yeke sara si mo ga tapande.

⁷Azo so kue ayeke baa mo ayeke kpe si ala yeke dekongo, atene: “Ninive ati awe! Zo wa laa ayeke baa mawa ti lo, zo wa? Zo wa laa ayeke sara si be ti lo ade, zo wa?”

⁸Ninive, mo hon gbata ti Tebes na nyen? Tebes ayeke na popo ti amaboko ti *bale ti Nil si angu angoro tere ti lo kue. Kota bale ni angoro tere ti lo kue tongana gbagba.

⁹Kodro ti Etiopii na ti Ezipte laa ayeke mu ando ngangu na lo, ngangu so ayeke hunzi pepe. Azo ti Put na ti Libii ayeke azo ti mungo maboko na lo.

¹⁰Me ti azo ti Tebes nga, a gbu ala, a gue na ala na kodro wande. A mu akete molenge ti gbata ni, a bi ala na ndö ti asangbi-lege si a nika ala nikango. A mu akota zo ni, a kanga ala na zingiri; a bi *dee ti kangbi amakonzi ni na popo ti azo so ahon ndö ti ala na bira.

¹¹Ti mo Ninive nga, fade pasi ayeke hon ndö ti mo si mo yeke ga tongana zo so samba ahon ndö ti lo! Mo yeke honde tere ti mo ndali ti kamene ti mo. Mo nga, mo yeke gi ndo ti honde tere ti mo ndali ti awato ti mo.

¹²Angangu gbagba ti mo kue ayeke tongana ale ti fige so abe awe. Gi so zo ayingi keke ti fige ni, ale ni ayeke ti na yanga ti zo ni.

¹³Azo ti bira ti mo awoko gi tongana awali, ayanga ti kodro ti mo kue azi kota na awato ti mo. Wâ agbi angbongboro keke so ayeke kanga na ayanga ti gbagba ti kodro ti mo.

¹⁴Ala azo ti Ninive, ala to ngu, ala bata ni ndali ti ngoi so awato ti ala ayeke ngoro ala kue so. Ala kiri aleke agbagba ti ala titene akiri akpengba ngangu. Ala gue, amu sese, ala do ya ni, ala sara na potopoto, ala gboto na biriki.

¹⁵Me ala yeke sara gbaa, fade wâ ayeke gbi ala si ala yeke kui kue na ya ti bira. Wâ na bira ayeke hunzi ala tongana ti so agbadola ayeke te ye kue si ahunzi so. Azo ti gbata ni awu ando mingi tongana agbadola; ala wu mingi tongana akinda-gozo.

¹⁶Awadengo-buze ti ala awu ahon atongoro ti le ti nduzu; awadengo-buze ni ahon awe tongana agbadola so ahuru ahon.

¹⁷Akota zo ti kodro ti ala awu tongana angadi, amakonzi ti aturugu ti ala ayeke tongana gba ti angadi so ayeke huru so. Na ngoi ti de, ala yeke duti na tere ti pere; tongana lâ asu, ala huru ague na ndo so zo ahinga pepe. Fadeso, ala yeke na ndo wa?

¹⁸Mo, gbia ti Asirii, akomanda ti mo alango biani biani awe, aturugu ti mo ti kota kamba alango na du ti kuâ biani biani awe. Azo ti mo akangbi kirikiri na ndö ti ahoto, zo ti bongbingo ala na ndo oko ayeke daa pepe.

¹⁹Mbeni yoro ndali ti kpale ti mo ayeke daa pepe, aka ti mo ni ayeke mu ande pepe. Azo so kue ama tënë ti ye ti sioni so asi na mo, ala yeke pika maboko ti ala na ngia. Zo wa si mo sara sioni na lo na ndoni na ndoni pepe, zo wa?