Read La Bible en Sango courant – Mbeti ti Nzapa Habakuk 1 Bible Online

Habakuk 1 - La Bible en Sango courant – Mbeti ti Nzapa bible

Habakuk 1

¹So ayeke nengo tënë so wayanga-Nzapa Habakuk abaa na ya ti mbeni ye tongana bango-li.

²*KOTA GBIA, mbi dekongo na mo ti mu maboko na mbi aninga awe; mo yeke ma mbi pepe ngbii asi lawa? Mbi dekongo na mo, mbi tene: “Sarango ngangu na azo ahon ndoni!”, me mo zi azo ni pepe.

³Mo sara si mbi baa ye ti sioni ngbanga ti nyen? Azo ayeke sara ngangu na amba ti ala, mo yeda ti baa ni na le ti mo ngbanga ti nyen? Ye so mbi yeke baa mbage na mbage ayeke gi gbungo ye ti azo na ngangu na sarango ngangu na azo. Tongana fango ngbanga ayeke daa, papa ayeke daa lakue.

⁴Ndani laa azo ayeke sara ye alingbi na ndia pepe, ala yeke fâ ngbanga na lege ti ndia pepe. Zo ti sioni ayeke hon ndö ti zo ti mbirimbiri, awafango-ngbanga ayeke fâ ngbanga kirikiri.

⁵Kota Gbia atene: “Ala zi le ti ala, ala baa ye so ayeke si na popo ti amara nde; fade li ti ala ayeke ga kirikiri, li ti ala kue ayeke kpe! So ala de na fini so, ala yeke baa mbeni ye so ayeke si, ataa mbeni zo atene peko ni na ala, ala yeke yeda na ni pepe.

⁶Baa, mbi yeke sara si azo ti Babilone aga, azo ti mara so ayeke sioni mingi so, ala so ayeke baa mawa ti zo pepe so. Ala yeke hon na ya ti akodro ti dunia kue ti mu sese ti azo, sese so ayeke ti ala pepe.

⁷Ala yeke asioni zo, ala yeke zia mbeto na be ti azo. Ala wani ayeke sara ndia ti li ti ala, ala yeke sara si iri ti ala awu.

⁸Ambarata ti ala ayapu na loro ahon ze, ala yeke hon hio na bira tongana ambo ti ngonda so ayeke gi anyama na lakui. Azo ti kpengo na mbarata ti ala alondo yongoro si ala ga, ala mu ndo kue, ala yeke huru tongana *ngoalo so ayeke huru ti ti na ndö ti nyama.

⁹Ala yeke ga, kua ti ala ayeke gi ti sarango ngangu na zo, le ti ala angba gi na dawa ti ala; ala bongbi azo ti kanga gbani gbani tongana mbutu.

¹⁰Ala yeke baa agbia tongana ambumbuse zo, akota zo ti kodro aga tongana ye ti ngia na le ti ala. Agbata so angangu gbagba ayeke na tere ni, ala yeke he ni hengo na ngia, ala yeke bongbi gba ti sese na tere ti gbagba ni si ala yeke mu agbata ni.

¹¹Ala hon tongana ngangu pupu, ala yeke hon ti ala hongo, tongaso tënë aga na li ti ala. Ngangu ti ala wani laa ayeke nzapa ti ala.”

¹²*KOTA GBIA, ngbene ye giriri, mo yeke Nzapa ti mbi pepe? Nzapa ti mbi, mo so mo yeke nde si mo yeke nzoni kue, zia e kui pepe! KOTA GBIA, mo soro azo so titene ala fâ ngbanga na li ti e. Mo so mo yeke Kota Têne so mbi luti na ndö ni ti bata tere ti mbi, mo mu lege na ala titene ala pika e.

¹³Le ti mo alingbi na bango asioni ye pepe, ngangu so zo ayeke sara na mba ti lo, mo lingbi ti yeda ti baa ni pepe. Azo so ayeke ka amba ti ala so, mo lingbi ti yeda ti baa ala? So azo ti sioni ayeke buba azo so ayeke mbirimbiri ahon ala so, mo ke ti zi yanga ti mo daa ngbanga ti nyen?

¹⁴Mo sara si azo aga tongana asusu na ya ti kota ngu-ingo; ala ga tongana akete nyama so makonzi ti ala ayeke daa pepe.

¹⁵Azo ti Babilone agbu azo tongana ti so a yeke gbu susu na yango, tongana ti so a yeke gboto susu na ya ti gbanda, tongana ti so a yeke gbu susu na ngbengbe. Na pekoni, azo ni ayeke na ngia, ala yeke dodo na ngia.

¹⁶Ndani laa, ala yeke mu *sandaga na gbanda ti ala, ala yeke zö dukani na ngbengbe ti ala, ngbanga ti so, ndali ti gbanda ni na ngbengbe ni si ala wara gba ti susu na nzoni kobe ti tengo ni.

¹⁷Fade azo ti Babilone ayeke ngba ti bi gbanda ti ala ni ti fâ na azo tongaso? Ala so ayeke baa mawa ti zo pepe so.