Read La Bible en Sango courant – Mbeti ti Nzapa Habakuk 3 Bible Online

Habakuk 3 - La Bible en Sango courant – Mbeti ti Nzapa bible

Habakuk 3

¹Wayanga-Nzapa Habakuk asambela. Sambela ni ayeke tongana bia ti mawa.

²*KOTA GBIA, mbi ma tënë so mo tene awe; mbeto agbu mbi ndali ti ye so mo sara. KOTA GBIA, na ya ti angu so ayeke ga so, sara si aye ni abaa gigi; na ya ti angu so ayeke ga so, sara si azo abaa ni. Me tongana mo sara ngonzo, mo girisa ti baa mawa ti zo pepe.

³Nzapa alondo na Teman si ayeke ga; lo so lo yeke nde si lo yeke nzoni kue so, lo londo na ahoto ti Paran si lo yeke ga. Luti kete Nengo ti lo ti gbia amu ya ti yayu kue, sese asi singo na tënë ti sepelango lo.

⁴Lo yeke su tongana lâ. Azango ye tongana ti lâ asigigi na maboko ti lo; na ndo so laa ngangu ti lo ahonde tere daa.

⁵Kobela ti bubango kodro ayeke tambula na dawa ti lo, kobela ti wâ ti tere ayeke tambula na peko ti lo.

⁶Tongana lo luti, sese ayeke yingi. Tongana lo baa ndo, amara ayeke do na mbeto. Ahoto ti giriri, ya ni asungba, akete hoto ti giriri ayeke kungbi, ati na sese, akete hoto ni ayeke ando lege so lo yeke tambula daa.

⁷Mbi baa azo ti Kushan, tere ti ala ado na ya ti ada ti ala ti bongo; mbi baa azo ti Madian, ala sara mbeto na ya ti ada ti ala so ala sara na bongo.

⁸KOTA GBIA, be ti mo aso na tere ti akota ngu? Ngonzo ti mo alondo na tere ti akota ngu? Ngonzo ti mo ti wâ alondo na tere ti kota ngu-ingo? Tongana mo ko na ndö ti ambarata ti mo, apusu ti mbarata ti mo ayeke gue na mo ti so benda.

⁹Mo leke kokora ti mo nduru ti pika ni awe, dengo ba ti yanga ti mo ayeke tongana ale ti kokora ni. Luti kete Mo suru ya ti sese si kota ngu asigigi daa.

¹⁰Akota hoto abaa mo, ala yeke do na mbeto; kota ngu-Nzapa apika, amu ndo kue; kota ngu-ingo atoto, lo tuku *amapo ti lo kâ na nduzu.

¹¹Na dawa ti zango ti ale ti kokora ti mo nga na dawa ti zango le ti alikongo ti mo so ayeke hon hongo, lâ na nze aluti kpoo.

¹²Na ngonzo na be ti mo, mo yeke tambula na ndö ti sese; na kota ngonzo na be ti mo, mo yeke do amara na gbe ti gere ti mo.

¹³Mo ga ti soo azo ti mo, mo ga ti soo zo so mo zia lo gbia. Mo kinda makonzi ti asioni zo, mo hunzi nga azo ti lo kue. Luti kete

¹⁴Mo koro li ti amakonzi ti awato ni taa na ale ti kokora ti ala wani. Lani awato ni aga na loro tongana kota pupu ti ngu-Nzapa ti tumba e. Ala yeke dekongo na ngia, mo baa mo tene, ala gbu zo awe si ala yeke gue ti te lo na hondengo ni.

¹⁵Mo hon na ambarata ti mo na ya ti kota ngu-ingo, na popo ti angangu mapo.

¹⁶Mbi ma tënë ti aye so si li ti mbi kue akpe. Toto ti aye ni asara si yanga ti mbi ado dongo, bio ti mbi awoko kue, gere ti mbi awoko kue, mbi lingbi ti luti na nduzu pepe. Mbi duti kpoo ti ku lango ti ye ti vundu ni, ti ku lango ti gue ti tiri bira na azo so ayeke sara ngangu na e.

¹⁷Biani, akeke ti fige akiri ale pepe, akeke ti *vinye akiri adu alengo ni pepe, akeke ti olive akiri adu alengo ni pepe, ayaka akiri amu kobe ti tengo ni na azo pepe. Na ya ti gbagba, ataba ayeke daa mbeni pepe, na ya ti gbagba ti batango abagara, abagara ayeke daa mbeni pepe.

¹⁸Ti mbi, mbi yeke na ngia ndali KOTA GBIA, mbi yeke dodo na ngia ndali ti Nzapa, lo so lo soo mbi na kuâ.

¹⁹Kota Gbia NZAPA ayeke ngangu ti mbi. Lo sara si gere ti mbi ayapu tongana ti tagba, lo sara si mbi tambula na ndö ti ahoto. Bia so ayeke ndali ti makonzi-bia. A he ni na kundi.