Read La Bible en Sango courant – Mbeti ti Nzapa Sofonii 1 Bible Online

Sofonii 1 - La Bible en Sango courant – Mbeti ti Nzapa bible

Sofonii 1

¹So ayeke tënë ti *KOTA GBIA so asi na Sofonii, molenge ti Kushi; Kushi ayeke molenge ti Gedalia; Gedalia ayeke molenge ti Amaria; Amaria ayeke molenge ti Ezekias. KOTA GBIA atene tënë ni na ngoi so Yosias, molenge ti Amon ayeke gbia ti Juda.

²So tënë ti yanga ti *KOTA GBIA laa: “Fade mbi yeke hunzi aye kue kue kue na ndö ti sese.

³Fade mbi yeke hunzi azo na anyama kue, andeke ti le ti nduzu na asusu ti kota ngu-ingo kue; mbi yeke hunzi asioni zo nga na aye so kue ayeke sara si ala yeke ti so. Mbi yeke hunzi azo kue kue kue na ndö ti sese.” So tënë ti yanga ti KOTA GBIA laa.

⁴“Fade mbi yeke yoro maboko ti mbi ti pika azo ti Juda nga na azo so kue alango na Jérusalem. Mbi yeke sara si aye so azo ayeke voro na *Baal angba na ya ti kodro ni oko pepe; ataa awayango-sandaga so ayeke sara kua na lo, azo ayeke girisa iri ti ala.

⁵Fade mbi yeke hunzi azo so ayeke gue na li ti ada ti voro lâ, nze nga na atongoro, mbi yeke hunzi azo so ayeke voro mbi *KOTA GBIA si ala yeke deba na iri ti mbi, me na pekoni, ala yeke deba nga na iri ti yanda ti ala Milkom.

⁶Mbi yeke hunzi azo so ado mbi KOTA GBIA azia, ala so ayeke gi mbi pepe si ala yeke hunda mbi pepe so.”

⁷Ala azo, ala kai kpoo na dawa ti Kota Gbia NZAPA, ngbanga ti so *lango ti KOTA GBIA aga nduru awe. KOTA GBIA aleke mbeni *sandaga awe, lo iri azo ti tengo kobe ti sandaga ni si ala leke tere ti ala awe.

⁸KOTA GBIA atene: “Na lango ti sandaga ni, fade mbi yeke ga na tere ti akota zo, amolenge ti gbia nga na azo so ayeke yu bongo tongana ti awande.

⁹Na lango ni so, fade mbi yeke ga na tere ti azo so kue ayeke huru hurungo ti li na ya ti da, ala so ayeke sara si ya ti da ti makonzi ti ala asi singo na aye so ala gbu na ngangu nga na aye so ala wara na lege ti handango zo.

¹⁰So tënë ti yanga ti KOTA GBIA laa: na lango ni so, azo ayeke ma dekongo na yanga ti gbagba Ti-asusu; azo ayeke ma kota dekongo na ya ti Fini Vaka, ala yeke ma go ti aye so ati ngangu na ndö ti akete hoto.

¹¹Ala azo ti vaka Ti-gbeni, ala dekongo ngangu, ngbanga ti so a fâ azo ti kango ye kue awe, a hunzi azo ti dengo buze kue awe.

¹²Na ngoi ni so, fade mbi yeke mu lamba ti gi ndo na ya ti gbata ti Jérusalem; mbi yeke ga na tere ti azo so ayeke duti senge senge na ndö ti mosoro ti ala so; ala yeke tene na be ti ala, atene: ‘KOTA GBIA alingbi ti sara mbeni ye oko pepe, ataa nzoni ye wala sioni ye!’

¹³Fade a yeke nzi amosoro ti ala, a yeke buba ada ti ala; ala yeke sara ada, me ala yeke lango na ya ni pepe; ala yeke fâ ayaka ti *vinye, me ala yeke nyon vin ni pepe.”

¹⁴Kota lango ti *KOTA GBIA aga nduru awe; lango ni aga nduru awe, lango ni ayeke ga hio hio mingi. Na lango ti KOTA GBIA, fade be ti azo ayeke fun kue si ala yeke dekongo; ataa angangu zo ti bira, ala yeke dekongo na mbeto.

¹⁵Lango ni ayeke lango ti ngonzo, lango ti ye ti ngangu na ti kota mbeto, lango so ye kue ayeke buba na lango ti kota kpale; lango so ndo ayeke vuko pitipiti, lango ti vukongo ndo, lango ti mbinda na ti vuko mbinda.

¹⁶Lango ni ayeke lango ti hurungo didi, lango ti dekongo ti bira ti mu agbata so ngangu gbagba ayeke na tere ni nga na ada so ayo na nduzu mingi so.

¹⁷“Fade mbi yeke sara titene ye ti ngangu aga na ndö ti azo, ala yeke tatara ndo tongana awaziba, ngbanga ti so ala sara siokpari ti ke mbi KOTA GBIA. Fade a yeke tuku mene ti ala tongana fuku ti sese, a yeke tuku kuâ ti ala tongana zende.”

¹⁸Na lango so KOTA GBIA ayeke sara kota ngonzo, fade wen ti nginza ti ala, wala lôro ti ala ayeke soo ala na kuâ pepe; mbanda ti lo so ayeke londo tongana wâ ayeke gbi sese kue. Biani, ye ni ayeke duti ye ti ziango kota mbeto na be ti zo. KOTA GBIA ayeke fâ azo ti sese kue ti hunzi ala.