Read La Bible en Sango courant – Mbeti ti Nzapa Sofonii 3 Bible Online

Sofonii 3 - La Bible en Sango courant – Mbeti ti Nzapa bible

Sofonii 3

¹Mawa na gbata ti ngangu li so, gbata so *sioni ayeke na tere ti lo so, gbata ti sarango ngangu na azo so!

²Gbata ni ama iringo ndo pepe, lo ma wango pepe, lo zia be ti lo na ndö ti *KOTA GBIA pepe, lo ga nduru na Nzapa ti lo pepe.

³Amakonzi ti lo ayeke tongana abamara so ayeke toto; awafango-ngbanga ti lo ayeke tongana ambo ti ngonda so ate kobe ti ala ti lakui kue si na ndaperere, ala yeke na ye oko ti tengo ni pepe.

⁴Awayanga-Nzapa ti lo ayeke azo ti kirikiri, azo ti handango zo; awayango-sandaga ti lo asara si ye so a zia nde ndali Nzapa aga *sioni; ala do ndia na sese.

⁵Andaa KOTA GBIA ayeke na ya ti gbata ni, lo yeke mbirimbiri, lo yeke sara ye ti sioni pepe. Lakue na ndaperere, lo yeke fâ ngbanga polele; lo zia lege ni pepe. Ataa so kue, kamene ayeke sara zo ti sioni pepe.

⁶KOTA GBIA atene: “Mbi hunzi ambeni mara kue awe, mbi kungbi agbagba ti bira ti ala; mbi sara si ndö ti alege ti ala angba senge, zo oko akiri ahon daa pepe; mbi buba agbata ti ala kue awe, zo oko angba pepe, zo ti lango na ya ni ayeke daa pepe.

⁷Mbi tene na be ti mbi, mbi tene: ‘Mo gbata so, tongana mo kpe fade mbeto ti mbi, tongana mo ma fade wango ti mbi, ka a yeke buba mo pepe.’ Me lakue so mbi yeke ga ti pika mo, azo ti mo ayeke kpe hio ti sara sioni ahon ndoni.

⁸So tënë ti yanga ti KOTA GBIA laa: Ala ku mbi! Ala ku lango so mbi yeke ga ti sigigi na nda ti ala. Mbi leke na be ti mbi ti bongbi amara kue, ti bongbi akodro ti agbia kue, ti fâ ngbanga na li ti azo ni, ti tuku ngonzo ti mbi ti wâ na ndö ti ala. Biani, mbanda ti mbi so ayeke londo tongana wâ ayeke gbi sese kue.”

⁹“Tongaso, fade mbi yeke ndu poro ti yanga ti amara titene aga *nzoni si ala kue alingbi ti di iri ti mbi *KOTA GBIA, ala kue ayeke sara kua ti mbi na be oko.

¹⁰Ataa azo so ayeke voro mbi, ala so akangbi yongoro kâ na peko ti *bale ti Etiopii, fade ala yeke ga na mbi *sandaga ti ala.”

¹¹“Na lango ni so, ala azo ti mbi, asioni ye so kue ala sara, aye so ala sara ti ke mbi, fade kamene ni ayeke kiri ti sara ala pepe. Biani, na lango ni so, azo ti kirikiri so baba ahon ndö ti ala, mbi yeke zi ala na popo ti ala, azo ti mbi. Tongaso si ala zia lege ti sarango kuru baba na ndö ti hoto ti mbi so ayeke nde si ayeke nzoni kue.

¹²Fade mbi yeke zia asenge zo na azo ti mawa angba na popo ti ala. Ala yeke kpe na mbi *KOTA GBIA titene mbi bata ala.

¹³Tanga ti azo ti Israel so angba na fini ayeke kiri ti sara sioni pepe, ala yeke kiri ti tene mvene pepe, a yeke kiri ti wara tënë ti handango ndo na yanga ti ala pepe. Me fade ala lingbi ti te kobe nzoni, ala lingbi ti wu tere ti ala nzoni, zo oko ti zia mbeto na be ti ala ayeke daa pepe.”

¹⁴Mo gbata ti *Sion, mo dekongo na ngia! Ala azo ti Israel, ala pika maboko ti ala na ngia. Mo gbata ti Jérusalem, mo duti na ngia na be ti mo kue!

¹⁵Ngbanga so *KOTA GBIA aye ti fâ na li ti ala so, lo zia ni awe; lo tumba awato ti ala yongoro awe. KOTA GBIA, gbia ti Israel, ayeke na popo ti ala, mbeni ye ti sioni ayeke kiri ti zia mbeto na be ti ala pepe.

¹⁶Na lango ni so, fade a yeke tene na gbata ti Jérusalem: “Sion, sara mbeto pepe, be ti mo awoko pepe!

¹⁷KOTA GBIA, Nzapa ti mo ayeke na popo ti mo, lo yeke kpengba zo ti bira, lo yeke zo ti songo mo na kuâ. Tere ti lo anzere mingi ndali ti mo; na lege ti ndoye ti lo, lo yeke kiri ti bi tënë na li ti mo pepe. Lo yeke dodo, lo yeke dekongo na ngia ndali ti mo.

¹⁸Azo so ayeke na ya ti vundu, azo so ayeke yongoro na mo si ala lingbi ti sara matanga pepe so, fade mbi yeke bongbi ala. Tongaso, mbi yeke zi kamene so fade ane na ndö ti Jérusalem.

¹⁹Na ngoi ni so, fade mbi yeke sara sioni na azo so kue asara ngangu na ala. Azo so awara ka, fade mbi yeke kanga le ti ka ti ala; azo so a gbu ala, a gue na ala na kodro wande, mbi yeke kiri ti bongbi ala na ndo oko. Fade mbi yeke sara titene azo ane ala si iri ti ala awu, amu ya ti akodro so kue a zia lani kamene na le ti ala daa.

²⁰Na ngoi ni so, mbi yeke kiri na ala; gi na ngoi ni so, mbi yeke bongbi ala na ndo oko. Gi na le ti ala wani, mbi yeke sara titene gigi ti ala akiri aga nzoni. Mbi yeke sara titene azo ane ala si iri ti ala awu, amu ndo na popo ti azo ti sese kue.” Tënë so KOTA GBIA atene laa.