Read La Bible en Sango courant – Mbeti ti Nzapa Zakarii 12 Bible Online

Zakarii 12 - La Bible en Sango courant – Mbeti ti Nzapa bible

Zakarii 12

¹Nengo tënë. So ayeke tënë so *KOTA GBIA atene na ndö ti azo ti Israel. So tënë ti yanga ti KOTA GBIA laa, lo so lo gbara le ti nduzu si lo lu gere ti sese, lo so lo zia pupu na ya ti zo, lo tene:

²“Fade mbi yeke sara titene Jérusalem aga tongana kopo so asi singo na ngonzo ti mbi ndali ti azo so kue alango nduru na gbata ni; ala yeke nyon ni si ayeke sara ala tongana samba. Azo ti Juda nga ayeke nyon ngonzo ni si ayeke sara ala na ndembe so azo ayeke ga ti mu gbata ni na bira.

³Biani, na lango ni so, fade mbi yeke sara titene Jérusalem aga tongana mbeni ngbongboro têne ndali ti amara kue; têne so zo alingbi ti yo ni na nduzu pepe. Zo so kue aye ti yo ni, lo yeke wara ka. Tongaso, amara ti sese kue ayeke bongbi oko ti tiri na lo.

⁴So tënë ti yanga ti KOTA GBIA laa: Na lango ni so, fade mbi yeke bi tomboka na li ti ambarata kue, mbi yeke bi fuu na li ti azo ti kpengo na ambarata ni. Ti azo ti Juda, mbi yeke baa ndo na ndö ti ala, me mbi yeke sara si le ti ambarata kue ti amara abuba.

⁵Fade amakonzi ti Juda ayeke tene na be ti ala: ‘Ngangu ti azo ti Jérusalem ayeke na maboko ti KOTA GBIA, Nzapa ti ala so ayeke na ndö ti dunia kue.’

⁶Na lango ni so, fade mbi yeke sara titene amakonzi ti Juda aduti tongana mbeni kota le ti wâ na ya ti gbako, wala tongana mbeni *tanda so a zia wâ daa na gbe ti gba ti ale ti kobe. Fade ale ti wâ ni ayeke te mbage na mbage kue amara so kue angoro ala. Me azo ti Jérusalem ayeke ngba ti duti gi na ya ti gbata ti ala.”

⁷KOTA GBIA ayeke soo azo ti sewa ti Juda kozoni, tongaso si *ahale ti David nga na azo so alango na Jérusalem abaa tere ti ala kota ahon azo ti Juda pepe.

⁸Na lango ni so, fade KOTA GBIA ayeke bata azo ti Jérusalem: azo so ayeke na popo ti ala si ayeke na ngangu pepe, ala yeke ga azo ti ngangu tongana David. Ahale ti David ayeke duti na le ti azo ni tongana Nzapa, tongana *ange ti KOTA GBIA so ayeke tambula na dawa ti ala.

⁹*KOTA GBIA atene: “Na lango ni so, mbi yeke sara kue ti fâ amara so kue ti hunzi ala; amara so ayeke ga ti tiri bira na azo ti Jérusalem.

¹⁰Mbi yeke sara titene yingo ti sarango ye ti nzoni na yingo ti sambelango mbi aga na ndö ti *ahale ti David nga na ndö ti azo ti gbata ti Jérusalem. Fade ala yeke baa ndo na mbage ti mbi, lo so ala kpo lo so. Ala yeke toto kuâ ti lo tongana ti so a yeke toto kuâ ti oko molenge-koli. Ala yeke toto lo ngangu mingi tongana ti so a yeke toto kuâ ti kozo molenge.

¹¹Na lango ni so, azo ayeke toto kuâ mingi na Jérusalem tongana ti so azo ayeke toto kuâ ti Hadad-Rimon na popo-hoto ti Megido.

¹²Fade akete mara oko oko ti kodro ni ayeke duti nde nde ti toto kuâ: ahale ti David ayeke duti nde, akoli na mbage, awali na mbage. Ahale ti Natan ayeke duti nde, akoli na mbage, awali na mbage.

¹³Ahale ti Lévi ayeke duti nde, akoli na mbage, awali na mbage. Ahale ti Shimei ayeke duti nde, akoli na mbage, awali na mbage.

¹⁴Tanga ti akete mara ni ayeke duti nde nde ti toto kuâ: akoli na mbage, awali na mbage.