Read La Bible en Sango courant – Mbeti ti Nzapa Zakarii 13 Bible Online

Zakarii 13 - La Bible en Sango courant – Mbeti ti Nzapa bible

Zakarii 13

¹“Na lango ni so, fade mbeni li ti ngu ayeke sigigi ti sukula asiokpari na asioni ti *ahale ti David na ti azo ti Jérusalem.”

²So tënë ti yanga ti *KOTA GBIA so ayeke na ndö ti dunia kue laa: “Na lango ni so, fade mbi yeke zi ayanda so ayeke na ya ti kodro ni, zo ayeke kiri ti di iri ti ala pepe. Mbi yeke tumba nga awayanga-nzapa ti mvene nga na yingo ti sarango sioni ye so ala yeke na ni.

³Tongana mbeni zo angba ti tene peko ti tënë ti yanga ti Nzapa, ataa so zo ni ayeke taa wayanga-Nzapa pepe, fade babâ na mama ti lo wani ayeke tene na lo: ‘Alingbi mo kui, ngbanga ti so mo yeke tene mvene na iri ti KOTA GBIA.’ Na ndembe so lo ngba ti tene tënë ni, babâ na mama ti lo wani ayeke kpo lo.

⁴Na lango ni so, fade wayanga-nzapa oko oko ayeke sara kamene ti tene peko ti tënë ti yanga ti Nzapa; kamene ti tene peko ti ye so lo baa na ya ti mbeni ye tongana bango-li ayeke sara lo. Fade lo yeke kiri ti handa azo pepe na yungo yongoro bongo ti awayanga-nzapa so a sara na kua ti tere ti nyama.

⁵Fade wayanga-nzapa oko oko ayeke bere, atene: ‘Mbi yeke wayanga-Nzapa pepe. Mbi yeke ti mbi zo ti fango yaka. Na ngoi so mbi de maseka, mbi yeke na ayaka ti mbi so mbi yeke fâ ni ngbii asi laso.’

⁶Me tongana mbeni zo ahunda lo: ‘Aka ti nyen laa na kate ti mo so?’ Lo yeke kiri tënë: ‘Mbi wara aka ni na ya ti da ti azo so mbi na ala e ye tere mingi.’ ”

⁷So tënë ti yanga ti *KOTA GBIA so ayeke na ndö ti dunia kue laa: “Yongoro zeme, londo mo gue na tere ti wabatango-taba ti mbi nga na tere ti mba ti mbi so ayeke mu maboko na mbi! Fâ wabatango-taba ni si ataba ni akangbi kirikiri, mbi yeke kiri ti pika akete taba ni.”

⁸So tënë ti yanga ti KOTA GBIA laa: “Fade a yeke kangbi ya ti azo ti kodro ni kue ota; use mbage ti azo ni ayeke kui si gi oko mbage ti ala laa ayeke ngba na fini.

⁹Fade mbi yeke mu ota mbage ti azo so angba na fini so, mbi yeke hon na ala na le ti wâ ti zi sioni ye na tere ti ala tongana ti so a yeke kporo wen ti nginza na ya ti wâ ti zi sioni ye na tere ni. Mbi yeke tara ala ti zi sioni ye na tere ti ala tongana ti so a yeke tara lôro na le ti wâ ti zi sioni ye na tere ni. Fade ala yeke iri mbi ti mu maboko na ala; ti mbi, mbi yeke ma ala. Mbi yeke tene: ‘Ala yeke azo ti mbi’, ala yeke tene: ‘KOTA GBIA ayeke Nzapa ti e.’ ”