Read La Bible en Sango courant – Mbeti ti Nzapa Zakarii 2 Bible Online

Zakarii 2 - La Bible en Sango courant – Mbeti ti Nzapa bible

Zakarii 2

¹Mbi yo le ti mbi na nduzu si na ya ti mbeni ye tongana bango-li, mbi kiri mbi baa adidi osio.

²Mbi hunda *ange so ayeke tene tënë na mbi so, mbi tene: “Adidi so aye ti fa nyen?” Lo kiri tënë na mbi, lo tene: “Adidi ni afa tënë ti angangu mara so akangbi azo ti Juda, ti Israel na ti Jérusalem na ando nde nde.”

³Na pekoni, *KOTA GBIA afa na mbi azo ti pikango ndao osio.

⁴Mbi hunda ndo, mbi tene: “Ala ga ti sara nyen?” Lo kiri tënë na mbi, lo tene: “Azo ti pikango ndao ni aga ti zia mbeto nga ti tumba angangu mara so akangbi azo ti Juda na ando nde nde; mbeni zo oko so agbu le ni na angangu mara ni ayeke daa pepe.”

⁵Mbi yo le ti mbi na nduzu si na ya ti mbeni ye tongana bango-li, mbi kiri mbi baa mbeni koli so agbu kamba ti hakango na ye na maboko ti lo.

⁶Mbi hunda lo, mbi tene: “Mo yeke gue na ndo wa?” Lo kiri tënë na mbi, lo tene: “Mbi yeke gue ti haka gbata ti Jérusalem, ti hinga yongoro ni na nduru ni.”

⁷*Ange so ayeke tene tënë na mbi so ague na dawa ti mbeni ange nde so ayeke ga ti tengbi na lo.

⁸Kozo ange ni atene na mbeni so, atene: “Kpe loro, mo tene na maseka-koli so kâ so, mo tene: Fade gbata ti Jérusalem ayeke ngba senge tongaso, a yeke sara gbagba na tere ni pepe, ngbanga ti so azo na anyama so ayeke lango na ya ni ayeke wu ahon ndoni.

⁹So tënë ti yanga ti *KOTA GBIA laa: ‘Ti mbi, fade mbi yeke duti daa; mbi yeke duti tongana ngangu gbagba ti wâ na tere ti gbata ni kue. Taa gi na ya ti gbata ni, mbi laa mbi yeke sara gonda ni.’ ”

¹⁰So tënë ti yanga ti *KOTA GBIA laa: “Ala londo, ala londo ahon! Ala so mbi kangbi ala na ndangoro osio ti sese kue so, ala londo hio na sese ti Banga, ala hon! So tënë ti yanga ti KOTA GBIA laa.

¹¹He, ala azo ti *Sion, ala londo, ala kpe, ala so aduti kâ na Babilone so!”

¹²KOTA GBIA so ayeke na ndö ti dunia kue - lo so lo tokua mbi na amara so anzi aye ti ala kue, azo ti Sion, tënë so lo tene ayeke so: “Zo so andu ala, andaa lo ndu mboma ti le ti mbi awe.

¹³Biani, mbi yeke yoro maboko ti mbi ti pika amara ni so. Tongaso, azo so amara ni agbu ala lani na ngbaa so, angbaa ni ayeke kiri ti gbu amara ni tongana aye so a gbu na peko ti bira.” Tongana ye ni asi, fade ala yeke hinga atene, KOTA GBIA so ayeke na ndö ti dunia kue laa atokua mbi.

¹⁴So tënë ti yanga ti KOTA GBIA laa: “Ala dekongo na ngia, ala duti na ngia, ala azo ti Sion. Baa, mbi yeke ga, fade mbi yeke duti na popo ti ala.

¹⁵Na lango ni so, fade amara mingi ayeke ngba ngbango na peko ti KOTA GBIA. Ala yeke ga azo ti mbi wani si mbi yeke duti na popo ti ala.” Tongana ye ni asi, fade ala yeke hinga atene, KOTA GBIA so ayeke na ndö ti dunia kue laa atokua mbi na ala.

¹⁶Fade KOTA GBIA ayeke kiri ti mu Juda titene aga ye ti lo, na ya ti sese so ayeke nde si ayeke nzoni kue. Lo yeke kiri ti soro Jérusalem titene aga ye ti lo.

¹⁷Azo kue, ala kai kpoo na dawa ti KOTA GBIA! Biani, lo londo, lo yeke sigigi na ya ti da ti lo so ayeke nde si ayeke nzoni kue.