Read La Bible en Sango courant – Mbeti ti Nzapa Malashii 2 Bible Online

Malashii 2 - La Bible en Sango courant – Mbeti ti Nzapa bible

Malashii 2

¹Fadeso, ala awayango-sandaga, tënë ti gbotongo mê so ayeke ndali ti ala.

²Tënë so *KOTA GBIA so ayeke na ndö ti dunia kue atene laa: “Tongana ala ma tënë ti mbi pepe, tongana ala sara si tënë ti nengo mbi agbu be ti ala pepe, fade mbi yeke deba ala si tufa so mbi ye ti sara na ndö ti ala, mbi yeke sara titene akiri aga deba. Biani, fade mbi yeke deba ala, ngbanga ti so tënë ti gbotongo mê so mbi gboto mê ti ala agbu be ti ala pepe.

³Baa, mbi yeke suku na *ahale ti ala. Me ti ala awayango-sandaga, mbi yeke tuku puru na le ti ala, puru ti anyama so ala fâ ti mu na mbi na *sandaga so. Fade a yeke mu ala na puru ni kue ti hon na ala.

⁴Tongaso, fade ala yeke hinga atene, mbi tene tënë ti gbotongo mê so na ala titene tënë ti *mbuki ti mbi na azo ti mara ti Lévi angba; tënë so KOTA GBIA so ayeke na ndö ti dunia kue atene laa.

⁵Na lege ti mbuki so, mbi sara lani si ala duti na fini nga na siriri; ala kpe mbeto ti mbi. Biani, lani ala kpe mbeto ti mbi si na le ti mbi, ala do na mbeto.

⁶Ala fa gi taa-tënë na azo si mbeni tënë ti mvene asigigi na yanga ti ala pepe. Ala tambula na mbi na siriri, na legeni. Ala sara si azo mingi azia lege ti sarango ye ti sioni.

⁷Biani, kua ti wayango-sandaga ayeke ti fa lege na azo si ala hinga Nzapa. Azo ayeke ga na mbage ti lo ti gi ti hinga ye so ndia afa, ngbanga ti so lo yeke watokua ti KOTA GBIA so ayeke na ndö ti dunia kue.

⁸Me ala awayango-sandaga, ala zia lege so mbi fa na ala so awe. Na lege ti fango ye ti ala, ala sara si azo mingi amu sioni lege. Ala buba lege ti mbuki so ayeke na popo ti mbi na azo ti mara ti Lévi; tënë so KOTA GBIA so ayeke na ndö ti dunia kue atene laa.

⁹Mbi nga, mbi yeke sara titene azo abaa ala tongana ambumbuse zo si azo ni abi buba na tere ti ala. Biani, lege so mbi fa na ala, awayango-sandaga, ala yeke mu ni pepe; ala yeke baa azo bango si ala yeke fâ ya ti tënë ti ala na lege ti ndia.”

¹⁰E kue, e yeke gi na babâ oko pepe? Gi Nzapa oko laa asara e kue pepe? Ngbanga ti nyen si e yeke ka amba ti e na popo ti e? Ngbanga ti nyen si e yeke buba lege ti *mbuki so Nzapa aleke ni na akotara ti e?

¹¹Azo ti Juda asara ye so ayeke nde na tënë ti mbuki ni. Na Jérusalem nga na kodro ti Israel kue, ala sara ye ti sioni mingi. Biani, ndo so a zia ni nde ndali ti KOTA GBIA si lo ye tënë ni mingi so, ala sara si aga buba ye na lege ti mungo ambeni wali so ayeke voro anzapa nde.

¹²Zo so asara mara ti ye tongaso, ayeke nzoni *KOTA GBIA azi asewa ti lo kue na popo ti azo ti Israel! Ayeke nzoni zo oko akiri angba pepe ti mu *sandaga na iri ti lo na KOTA GBIA so ayeke na ndö ti dunia kue.

¹³Mbeni use ye so ala yeke sara ni ayeke so: ala sara si ngu ti le ti ala amu ndö ti gbalaka ti KOTA GBIA kue. Ala yeke dema tere ti ala si ala yeke toto, ngbanga ti so aye so ala yeke mu na KOTA GBIA so, lo kiri lo baa ni na nzoni le pepe, lo kiri lo yamba ni na nzoni be pepe.

¹⁴Ala hunda ndo, atene: “Ye tongaso asi ngbanga ti nyen?” — Asi ngbanga ti ye tongaso: Na dawa ti KOTA GBIA laa zo oko oko amu tere na wali ti lo ti maseka; wali ni ayeke mba ti lo, lo na wali ni aga oko na lege ti *mbuki so ayeke na popo ti ala. Me zo ni abuba lege ti mbuki ni na wali ni awe!

¹⁵Mbeni zo so li ti lo ayeke daa kete asara mara ti ye tongaso pepe. Gi mbeni zo oko si asara ando ni; me lo sara ni ngbanga ti nyen? Lo sara ni ngbanga ti so lo yeke gi ti wara molenge so Nzapa atene tënë ti mungo lo na lo so. Ala sara hange! Ala bata fini ti ala. Zo oko abuba lege ti mbuki ti lo na wali ti lo ti maseka pepe!

¹⁶Tënë so KOTA GBIA, Nzapa ti Israel, atene laa: “Tumbango wali ayeke ye so mbi ke tongana ti so mbi ke zo so ayeke sara ngangu na mba ti lo. Tënë so KOTA GBIA so ayeke na ndö ti dunia kue atene laa. Ala sara hange! Ala bata fini ti ala. Ala buba lege ti mbuki ti ala pepe!”

¹⁷Ala woko KOTA GBIA na atënë ti ala. Ala hunda ndo, atene: “Atënë ti nyen laa e woko lo na ni?” Ala woko lo na lege ti tënë so ala yeke tene: “Zo so asara ye ti sioni, lo laa lo yeke nzoni zo na le ti KOTA GBIA. Mara ti azo tongaso laa be ti KOTA GBIA anzere na ala”; wala ala yeke tene: “Nzapa so ayeke fâ ngbanga mbirimbiri so ayeke na ndo wa?”