Read La Bible en Sango courant – Mbeti ti Nzapa Matthieu 12 Bible Online

Matthieu 12 - La Bible en Sango courant – Mbeti ti Nzapa bible

Matthieu 12

¹Na ndembe ni so, Jésus ayeke hon na ya ti yaka ti *ble na *lango ti wungo tere. Nzara agbu adisiple ti lo si ala to nda ti fango ale ti ble ni ti te.

²So *afarizien abaa tongaso, ala tene na Jésus: “Baa ye! Adisiple ti mo ayeke sara ye so *Ndia ake titene zo asara na lango ti wungo tere!”

³Jésus akiri tënë na ala: “Ye so David na azo so amu peko ti lo asara ando na ndembe so nzara agbu ala, ala diko tënë ni pepe?

⁴Lo li na ya ti da ti Nzapa si lo na azo so amu peko ti lo ate mapa so a mu na *sandaga na Nzapa. Andaa a mu lege na ala pepe ti te mapa ni, me gi awayango-sandaga laa alingbi fade ti te ni!

⁵Na mbage, na lango ti wungo tere, awayango-sandaga ayeke sara kua na ya ti kota da ti Nzapa, me a fâ ngbanga na li ti ala pepe! Ala diko tënë ni na ya ti Ndia ti Moïse pepe?

⁶Mbi tene na ala so, mbeni ye ayeke ge so ayeke kota ahon kota da ti Nzapa!

⁷Tongana ala hinga fade nda ti tënë so Mbeti ti Nzapa atene: ‘Mbi ye si zo abaa mawa ti mba ti lo, me mbi ke tënë ti sandaga ti anyama’, ka ala lingbi pepe ti fâ ngbanga na li ti azo so asara sioni pepe so.

⁸Biani, *Molenge ti Zo laa ayeke makonzi ti lango ti wungo tere.”

⁹Jésus alondo na ndo so si lo gue, lo li na ya ti da ti sambelango Nzapa ti ala.

¹⁰Mbeni koli so maboko ti lo abuba ayeke kâ. Azo aye ti bi tënë na li ti Jésus; tongaso ala hunda lo, atene: “*Ndia amu lege na zo ti kai kobela na tere ti azo na *lango ti wungo tere?”

¹¹Jésus akiri tënë na ala: “Tongana mbeni zo na popo ti ala ayeke na taba oko si taba ni ati na ya ti kota du na lango ti wungo tere, fade lo yeke gue ti gboto lo ti sigigi na lo pepe?

¹²Zo ahon taba mingi! Tongaso, Ndia amu lege na zo ti sara nzoni na mba ti lo na lango ti wungo tere.”

¹³Na pekoni, Jésus atene na koli so: “Yoro ya ti maboko ti mo.” Lo yoro ni si maboko ti lo aga nzoni tongana ti mbage ni.

¹⁴So *afarizien asigigi na ya ti da ti sambelango Nzapa, ala bongbi ti gbu li ti ala ti gi lege ti fâ Jésus.

¹⁵So Jésus ama tënë ti ye so ala ye ti sara na lo, lo londo na ndo so si lo hon. Gba ti azo amu peko ti lo, lo kai kobela ti ala kue.

¹⁶Lo gboto mê ti ala ngangu titene ala sara si azo ahinga tënë ti lo pepe.

¹⁷Lo sara tongaso titene tënë so wayanga-Nzapa Ésaïe atene, aga taa-tënë; lo tene:

¹⁸“Baa, zo ti kua ti mbi laa, lo so mbi soro lo, lo so mbi ye lo mingi, lo so be ti mbi anzere na lo mingi. Mbi yeke zia Yingo ti mbi na ndö ti lo si lo yeke fa lege ti sarango ye ti mbirimbiri na amara nde.

¹⁹Lo yeke papa na zo pepe, lo yeke dekongo nga pepe. Zo ayeke ma lo na dikongo tënë na ndö ti akota lege pepe.

²⁰Sosongo so a do ni na sese awe, lo yeke fâ ni pepe; lamba so wâ ni aye ti mingo, lo yeke mingo ni pepe, ngbii lo sara si ye ti mbirimbiri aso benda.

²¹Fade amara nde ayeke zia be ti ala ti ku lo.”

²²Tongaso, azo amu mbeni koli so sioni yingo ayeke na ya ti lo aga na lo na Jésus; lo yeke waziba si lo yeke nga buburu. Jésus akai kobela ti lo; lo to nda ti tene tënë si lo baa ndo.

²³Li ti azo ni kue akpe si ala tene: “So Molenge ti David laa pepe?”

²⁴So *afarizien ama tënë so, ala tene: “Koli so ayeke tumba asioni yingo gi na ngangu ti Beelzebul, makonzi ti asioni yingo!”

²⁵Jésus ahinga tënë ti be ti ala si lo tene na ala: “Kodro so kue akangbi si azo ni ayeke tiri na popo ti ala, fade kodro ni ayeke buba. Gbata so kue wala sewa so akangbi si azo ni ayeke tiri na popo ti ala alingbi ti ngba pepe.

²⁶Tongana Satan ayeke tumba ye so ayeke ti Satan, so afa atene, lo yeke tiri na lo wani; fade kodro so lo yeke gbia daa ayeke ngba tongana nyen?

²⁷Tongana mbi yeke tumba asioni yingo na ngangu ti Beelzebul, azo ti ala ayeke tumba ti ala asioni yingo na ngangu ti zo wa? Gi azo ti ala laa ayeke fa na gigi so tënë ti ala ayeke na legeni pepe!

²⁸Me tongana mbi yeke tumba asioni yingo na ngangu ti Yingo ti Nzapa, andaa *Kodro-gbia ti Nzapa asi na ala awe.

²⁹“Zo alingbi ti li na ya ti da ti zo ti ngangu ti gbu akungba ti lo ti hon na ni gi tongana lo kanga zo ti ngangu ni kozoni si. Tongana lo kanga zo ti ngangu so awe, lo lingbi ti nzi akungba ti da ni kue ti hon na ni.

³⁰Zo so ayeke na mbage ti mbi pepe, andaa lo ke mbi; zo so ayeke bongbi aye legeoko na mbi pepe, andaa lo yeke kangbi ya ti aye ni kirikiri.

³¹Ndani laa mbi tene na ala: fade Nzapa ayeke zi tënë na li ti azo so asara siokpari, na ala so azonga Nzapa; me zo so azonga Yingo-Vuru, fade Nzapa ayeke zi tënë na li ti lo oko pepe.

³²Tongana zo atene sioni tënë na tere ti *Molenge ti Zo, fade Nzapa ayeke zi tënë na li ti zo ni; me tongana zo atene sioni tënë na tere ti Yingo-Vuru, fade Nzapa ayeke zi tënë na li ti lo pepe, ataa na ngoi ti fadeso, ataa na ngoi so ayeke ga.”

³³“Tongana mbeni keke ayeke nzoni, fade lengo ni ayeke nzoni. Tongana keke ni abuba, fade lengo ni nga abuba. Biani, a yeke hinga keke gi na lege ti alengo ti lo.

³⁴Ala asioni mara ti ngbo! Ala yeke tene anzoni tënë ngbanga ti nyen, so ala wani ayeke asioni zo so? Ye so asi singo na be ti zo laa ayeke sigigi na lege ti tënë ti yanga ti lo.

³⁵Nzoni zo ayeke sigigi na anzoni ye so ayeke na be ti lo; sioni zo ayeke sigigi na asioni ye so ayeke na be ti lo.

³⁶Mbi tene na ala: na lango ti fango ngbanga, fade azo ayeke kiri tënë na ndö ti asenge senge tënë so kue ala tene ando.

³⁷Biani, gi na lege ti atënë ti yanga ti mo laa a yeke fa ande atene, mo yeke zo ti mbirimbiri; gi na lege ti atënë ti yanga ti mo nga laa a yeke fâ ande ngbanga na li ti mo.”

³⁸Tongaso, ambeni wafango-ndia na ambeni *farizien atene na Jésus: “Wafango-ye, e ye titene mo sara mbeni ye ti kpene si e baa.”

³⁹Jésus akiri tënë na ala: “Azo ti fadeso ayeke azo ti sioni, ala ye ti ma yanga ti Nzapa pepe. Ala yeke hunda ti baa mbeni ye ti kpene; me fade ala yeke baa mbeni ye ti kpene oko pepe, gi ye ti kpene so asi ando na wayanga-Nzapa Jonas so alingbi awe.

⁴⁰Biani, tongana ti so Jonas asara lango ota na bi ota na ya ti kota susu, fade *Molenge ti Zo ayeke sara nga lango ota na bi ota na gbe ti sese.

⁴¹Na lango ti fango ngbanga, fade azo ti Ninive ayeke londo ti luti na le ti azo ti fadeso ti fâ ngbanga na li ti ala, ngbanga ti so na ndembe so azo ti Ninive ama tënë ti Nzapa so Jonas afa, ala zia ngbene lege ti sarango ye ti ala. Mbeni zo ayeke ge so ayeke kota ahon Jonas!

⁴²Na lango ti fango ngbanga, fade gbia-wali ti kodro so ayeke na Mbongo ayeke londo ti luti na le ti azo ti fadeso ti fâ ngbanga na li ti ala, ngbanga ti so lo londo ando na nda ti sese yongoro ti ga ti ma atënë ti ndara so Salomon ayeke tene. Mbeni zo ayeke ge so ayeke kota ahon Salomon!”

⁴³“Tongana mbeni sioni yingo asigigi na ya ti zo, yingo ni ayeke fono na ndo so ngu ayeke daa pepe ti gi mbeni ndo ti wu tere ti lo daa; me lo wara ndo ni pepe.

⁴⁴Tongaso, lo tene na be ti lo: ‘Mbi yeke kiri na ndo ti mbi so mbi londo daa si mbi sigigi so.’ So lo kiri lo si, lo baa so ya ti da ni ayeke gi senge senge, andaa a sukula ya ni si a leke ya ni nzoni.

⁴⁵Tongaso lo gue, lo mu ambeni yingo mbarambara so ayeke sioni ahon lo; lo na ala aga ali na ya ti da ni si aduti daa. Na pekoni, dutingo ti zo so ayeke ga sioni ahon ti kozoni. Ye so ayeke si ande na azo ti sioni ti fadeso laa.”

⁴⁶So Jésus angba ti tene tënë na gba ti azo so, mama ti lo na a-ita ti lo asi. Ala yeke luti na gigi, ala yeke gi lege ti tene tënë na lo.

⁴⁷Mbeni zo atene na Jésus: “Baa, mama ti mo na a-ita ti mo ayeke luti na gigi; ala ye ti tene tënë na mo.”

⁴⁸Jésus akiri tënë na zo ni: “Mama ti mbi ayeke zo wa? A-ita ti mbi ayeke azo wa?”

⁴⁹Na pekoni, lo yoro maboko ti lo, lo fa adisiple ti lo si lo tene: “Baa, mama ti mbi na a-ita ti mbi laa so!

⁵⁰Zo so asara ye so be ti Babâ ti mbi so ayeke na yayu aye, andaa lo yeke ita ti mbi ti koli, wala ita ti mbi ti wali, wala mama ti mbi.”