Read La Bible en Sango courant – Mbeti ti Nzapa Matthieu 13 Bible Online

Matthieu 13 - La Bible en Sango courant – Mbeti ti Nzapa bible

Matthieu 13

¹Gi na lango ni so, Jésus asigigi na ya ti da si lo gue, lo duti na yanga ti kota ngu ti fa ye.

²Gba ti azo abongbi na tere ti lo. Tongaso, lo ko na ya ti mbeni ngo, lo duti. Gba ti azo ni aluti na yanga ti ngu ni.

³Lo tene tënë na ala mingi na lege ti atoli, lo tene: “Mbeni zo ague na yaka ti lo ti bi ale ti kobe.

⁴So lo yeke bi ale ti kobe ni, ambeni atuku na tere ti lege; andeke aga si ate ni kue.

⁵Ambeni atuku na ndö ti sese so atêne ayeke daa, na ndo so sese ayeke daa mingi pepe. Ale ti kobe ni asigigi si akono hio, ngbanga ti so sese ni ali pepe.

⁶So lâ asu ngangu, lâ ni agbi ale ti kobe ni si ahole, ngbanga ti so agere ni ali mingi pepe.

⁷Ambeni le ni atuku na popo ti apere ti ki; apere ni alondo si akanga ndö ti ala kue.

⁸Ambeni le ni atuku na nzoni sese si ala le: ambeni ale ngbangbo oko, ambeni ale baleomene si ambeni ale baleota.”

⁹Jésus akiri atene: “Zo so ayeke na mê ti mango ndo, ayeke nzoni lo ma tënë so!”

¹⁰Adisiple aga nduru na tere ti Jésus si ala hunda lo, atene: “Ngbanga ti nyen si mo yeke tene tënë na ala na lege ti atoli?”

¹¹Lo kiri tënë na ala: “Ti ala, Nzapa amu na ala lege ti hinga nda ti tënë ti *Kodro-gbia ti yayu so angba na hondengo ni, me ti azo ni, Nzapa amu na ala lege ti hinga ni oko pepe.

¹²Biani, zo so ayeke na ye, fade a kiri amu mbeni na ndö ni na lo si lo yeke na ye ahon ndoni; me zo so ayeke na ye pepe, ataa kete ye so lo yeke na ni, fade a yeke zi na maboko ti lo.

¹³Ndani laa mbi yeke tene tënë na azo ni na lege ti toli, ngbanga ti so ala yeke baa ndo, me ala yeke baa ye pepe; ala yeke ma ndo, me ala yeke ma ya ti atënë ni pepe, ala yeke ma nga mbeni ye oko pepe.

¹⁴Tongaso, tënë ti yanga ti Nzapa so Ésaïe atene ando na ndö ti ala so aga taa-tënë; lo tene: ‘Fade ala yeke ma ndo, me ala yeke ma ya ti atënë ni oko pepe; ala yeke baa ndo, me ala yeke baa ye oko pepe.

¹⁵Biani, be ti azo ni akpengba; ala kanga mê ti ala, ala kanga le ti ala titene ala baa ndo pepe, titene ala ma ndo pepe, titene ala ma ya ti atënë pepe si ala zia pepe ngbene lege ti sarango ye ti ala, tongaso si mbi kai kobela ti ala.’

¹⁶“Ti ala nzoni, ala azo ti mbi, ngbanga ti so le ti ala ayeke baa ndo si mê ti ala ayeke ma ndo!

¹⁷Mbi tene na ala taa-tënë: awayanga-Nzapa mingi na azo mingi ti Nzapa aye ando ti baa ye so ala, azo ti mbi, ayeke baa ni laso so, me ala baa ni pepe; ala ye ando ti ma atënë so ala yeke ma ni laso so, me ala ma ni pepe.”

¹⁸“Tongaso, ala ma nda ti toli ti zo ti bingo ale ti kobe na le ti yaka.

¹⁹Azo so ama tënë ti *Kodro-gbia ti yayu si ala ma ya ni pepe so, ala yeke tongana tere ti lege so ale ti kobe atuku daa. Sioni wato aga si lo zi ye so a lu na be ti azo ni.

²⁰Ambeni zo ayeke tongana sese so atêne ayeke daa mingi si ale ti kobe atuku daa: ala ma tënë ni si ala yeda na ngia.

²¹Me tënë ni ali na ya ti be ti ala pepe, ala bata tënë ni na be ti ala aninga pepe. Tongana pasi wala ye ti ngangu asi na ala ngbanga ti tënë ti Nzapa, fafade ala do lege ti tënë ti Nzapa azia.

²²Ambeni zo ayeke tongana sese so aki ayeke daa si ale ti kobe atuku daa: ala ma tënë ni, me gingo be ti ala na ndö ti aye ti sese so na nzara ti mosoro akanga ndö ti tënë ni si ale pepe.

²³Ambeni zo ayeke tongana nzoni sese so ale ti kobe atuku daa: ala ma tënë ni si ala ma ya ni nzoni. Ala le nzoni: ambeni ale ngbangbo oko, ambeni ale baleomene si ambeni ale baleota.”

²⁴Jésus atene na ala mbeni toli, lo tene: “*Kodro-gbia ti yayu ayeke tongana ye so mbi ye ti fa: Mbeni koli abi anzoni le ti kobe na le ti yaka ti lo.

²⁵Na bi, so azo kue alango awe, wato ti lo aga si abi ale ti asioni pere na popo ti ale ti *ble so lo bi so si lo mu lege, lo hon.

²⁶Na ndembe so ale ti kobe ni asigigi si akono, ato nda ti lengo ni, asioni pere ni asigigi nga.

²⁷Azo so ayeke sara kua na wa ti yaka ni aga si atene na lo: ‘Kota zo, lani mo bi gi anzoni le ti kobe na le ti yaka ti mo pepe? Me asioni pere so alondo ti ala na ndo wa?’

²⁸Lo kiri tënë na ala: ‘Mbeni wato laa asara ye so.’ Azo ti kua ni ahunda lo, atene: ‘Mo ye e gue, e gboto asioni pere ni?’

²⁹Lo kiri tënë na ala: ‘Ala gboto ni pepe! Tongana ala gboto asioni pere ni, gbaa fade ala yeke gboto nga agere ti anzoni le ti kobe ni.

³⁰Ala zia ni kue akono legeoko ngbii asi na ngoi ti fango ale ti kobe ni. Tongana ngoi ti fango ale ti kobe ni alingbi awe, fade mbi yeke tene na azo ti kua ti mbi, mbi tene: Ala gboto asioni pere ni kozoni, ala kanga agba ni ti gbi ni. Na pekoni, ala ro ale ti ble ni azia na ya ti gogoro ti mbi.’ ”

³¹Jésus atene na ala mbeni toli, lo tene: “*Kodro-gbia ti yayu ayeke tongana le ti keke ti mutarde so mbeni zo amu si alu na yaka ti lo.

³²Le ni ayeke kete ahon tanga ti ale ti kobe kue; me tongana asigigi si akono awe, ayeke ga kota ahon akugbe ti kasa kue; ayeke ga nga kota keke si andeke aga, asara da ti ala na ya ti amaboko ni.”

³³Jésus atene na ala mbeni toli, lo tene: “*Kodro-gbia ti yayu ayeke tongana mama ti mapa so mbeni wali amu, lo bongbi na gba ti farini, lo pika ya ni si mapa ni kue asuku nzoni.”

³⁴Jésus atene tënë so kue na gba ti azo so gi na lege ti atoli. Lo tene tënë na ala na mbeni lege nde pepe, gi na lege ti atoli.

³⁵Lo sara tongaso titene tënë so wayanga-Nzapa atene, aga taa-tënë; lo tene: “Fade mbi yeke zi yanga ti mbi ti tene tënë na ala na lege ti atoli. Mbi yeke tene ande tënë ti aye so angba na hondengo ni, ngbene ye so dunia abaa gigi ngbii asi laso.”

³⁶Tongaso Jésus azia gba ti azo ni si lo kiri na da. Adisiple ti lo ague nduru na tere ti lo si ala tene na lo: “Fa na e nda ti toli ti asioni pere so ayeke na yaka so.”

³⁷Jésus akiri tënë na ala: “Zo so abi anzoni le ti kobe ni ayeke *Molenge ti Zo;

³⁸yaka ni ayeke dunia so; anzoni le ti kobe ni ayeke azo so aga azo ti kodro-gbia ti Nzapa; asioni pere ni ayeke azo ti Sioni wato;

³⁹wato so alu asioni pere ni ayeke Zabolo; ngoi ti fango ale ti kobe ni ayeke lango ti ndani; azo ti fango ale ti kobe ni ayeke *a-ange.

⁴⁰Na lango ti ndani, fade ye ni ayeke duti tongana ti so a sara na asioni pere so a bongbi ni si a gbi ni so:

⁴¹fade Molenge ti Zo ayeke tokua a-ange ti lo, ala yeke mu azo so ayeke sara si amba ti ala ayeke ti na ya ti siokpari nga na azo so ayeke sara aye ti sioni, ti sigigi na ala na ya ti *Kodro-gbia ti yayu,

⁴²ala yeke bi ande azo ni na ya ti kota wâ; kâ, gi toto na tengo pembe.

⁴³Me fade azo ti mbirimbiri ayeke za zango tongana lâ na ya ti Kodro-gbia ti yayu, lo so lo yeke Babâ ti ala. Zo so ayeke na mê ti mango ndo, ayeke nzoni lo ma tënë so!”

⁴⁴“*Kodro-gbia ti yayu ayeke tongana mosoro so a honde ni na ya ti yaka. Mbeni zo awara ni si akiri ahonde ni. Be ti lo anzere mingi si lo gue, lo ka aye so kue lo yeke na ni si lo vo yaka so.

⁴⁵“*Kodro-gbia ti yayu ayeke nga tongana zo ti dengo buze so ayeke gi apendere lenge ti vongo ni.

⁴⁶So lo wara mbeni lenge ti kota ngere, lo gue, lo ka aye so kue lo yeke na ni si lo vo lenge so.”

⁴⁷“*Kodro-gbia ti yayu ayeke nga tongana gbanda so a bi na ya ti kota ngu si agbu amara ti asusu nde nde.

⁴⁸So ya ti gbanda ni asi awe, azo ti gingo susu ni agboto ni, ague na ni na yanga ti ngu. Ala duti ti ro anzoni susu si azia ala na ya ti asakpa, ala tuku asusu so zo alingbi ti sara ye na ala pepe.

⁴⁹Na lango ti ndani, fade ye ni ayeke duti ande tongaso: *a-ange ayeke ga ti kangbi popo ti asioni zo na anzoni zo.

⁵⁰Fade ala yeke bi asioni zo na ya ti kota wâ; kâ, gi toto na tengo pembe.”

⁵¹Jésus ahunda ala, atene: “Ala ma ya ti atënë so kue?” Azo ni ayeda, atene: “E ma ya ni awe.”

⁵²Lo tene na ala: “So ti tene, wafango-ndia so ahinga ye na ndö ti *Kodro-gbia ti yayu awe, lo yeke tongana mbeni wa ti da so ayeke mu afini mosoro na angbene ni kue na ya ti gogoro ti lo ti sigigi na ni.”

⁵³So Jésus ahunzi ti tene atoli so awe, lo londo na ndo so si lo hon.

⁵⁴Lo gue na Nazaret, gbata so lo kono daa si lo yeke fa ye na azo ti gbata ni na ya ti da ti sambelango Nzapa ti ala. Li ti azo ni kue akpe si ala yeke hunda ndo, atene: “Lo wara ndara so na ndo wa? Lo wara ngangu ti sarango aye ti kpene so na ndo wa?

⁵⁵Molenge ti sarapande so laa pepe? Marie laa ayeke mama ti lo pepe? Jacques, Joseph, Simon na Jude ayeke a-ita ti lo ti koli pepe?

⁵⁶A-ita ti lo ti wali ayeke na popo ti e ge pepe? Lo wara ngangu so na ndo wa?”

⁵⁷Aye so kue asara si ala ma na be na lo pepe. Nilaa Jésus atene na ala: “Na ndo kue, azo ayeke ne wayanga-Nzapa; me na ya ti gbata so adu lo daa, wala na popo ti asewa ti lo, azo ayeke ne lo pepe.”

⁵⁸Jésus asara aye ti kpene mingi na ndo so pepe, ngbanga ti so azo ni ama na be pepe.