Read La Bible en Sango courant – Mbeti ti Nzapa Matthieu 17 Bible Online

Matthieu 17 - La Bible en Sango courant – Mbeti ti Nzapa bible

Matthieu 17

¹Lango omene na pekoni, Jésus amu Pierre, Jacques na Jean, ita ti Jacques na tere ti lo, lo gue na ala na li ti mbeni kota hoto si ala aduti kâ gi ala oko.

²Tere ti Jésus akiri aga nde na le ti ala: ndö ti le ti lo aza tongana lâ, abongo ti lo avuru si ayeke za zango.

³Ala baa Moïse na Élie so ayeke tene tënë na Jésus.

⁴Pierre atene na Jésus: “*Kota Gbia, ayeke nzoni e ngba na ndo so! Tongana mo ye, fade mbi leke agbefa ota na ndo so: oko ti mo, oko ti Moïse, oko ti Élie.”

⁵So lo ngba ti tene tënë ni, mbeni mbinda so aza zango aga amu ndö ti ala kue. Mbeni go alondo na ya ti mbinda ni, atene: “So ayeke Molenge ti mbi so mbi ye lo mingi, be ti mbi anzere na lo mingi. Ala ma yanga ti lo!”

⁶So adisiple ama go so, mbeto ahon ndö ti ala, ala ti na sese si ala honde le ti ala.

⁷Jésus aga nduru na tere ti ala, lo ndu ala si lo tene na ala: “Ala londo, mbeto asara ala pepe!”

⁸Ala yo le ti ala na nduzu, ala baa mbeni zo pepe, gi Jésus oko.

⁹So ala londo na li ti hoto ni si ala yeke zu, Jésus amu yanga na ala, atene: “Ala tene tënë ti ye so ala baa so na zo oko pepe; ala ku ngbii na ngoi so *Molenge ti Zo ayeke zingo ande na kuâ.”

¹⁰Adisiple ni ahunda lo, atene: “Ngbanga ti nyen si awafango-ndia atene, alingbi Élie aga kozoni si so?”

¹¹Jésus akiri tënë na ala: “Taa-tënë, alingbi Élie aga ti leke ye kue na legeni.

¹²Me mbi tene na ala so Élie aga awe; andaa azo ahinga lo pepe, me ala sara ye ti be ti ala na lo. Gi tongaso laa ala yeke sara ande pasi na Molenge ti Zo.”

¹³Tongaso, adisiple ahinga atene, lo yeke tene tënë ti Jean-Baptiste.

¹⁴So ala si nduru na ndo so gba ti azo ayeke daa, mbeni koli aga nduru na Jésus, lo kuku na gbe ti lo si lo tene:

¹⁵“*Kota Gbia, baa mawa ti molenge ti mbi! Lo yeke na kobela ti makako si lo yeke baa pasi mingi. Fani mingi lo ti na le ti wâ nga na ya ti ngu.

¹⁶Mbi ga na lo na adisiple ti mo, me ala kai kobela ni gbaa.”

¹⁷Jésus akiri tënë: “Ala azo ti fadeso, ala yeke na mabe pepe, ala yeke azo ti kirikiri! Mbi yeke ngba ti duti na tere ti ala ngbii asi lawa? Mbi yeke ngba ti kanga be ti mbi na ala ngbii asi lawa? Ala ga na mbi molenge ni ge!”

¹⁸Jésus asuku ngangu na sioni yingo ni si yingo ni asigigi na ya ti molenge ni. Gi na ndembe ni so, tere ti molenge ni aga nzoni.

¹⁹Na pekoni, adisiple aga nduru na tere ti Jésus si gi ala na lo, ala hunda lo, atene: “Me ti e, e tumba yingo so gbaa ngbanga ti nyen?”

²⁰Jésus akiri tënë na ala: “Ngbanga ti so mabe ti ala ayeke kete. Biani, mbi tene na ala: tongana konongo ti mabe ti ala alingbi na konongo ti kete kete le ti keke ti mutarde, fade ala yeke tene na hoto so: ‘Londo na ndo so, mo gue kâ.’ Fade hoto ni ayeke hon; ye alingbi ti kara ala oko pepe. [

²¹Me gi na lege ti sambela na kengo kobe laa ala lingbi ti tumba mara ti yingo so.”]

²²So adisiple abongbi tere ti ala na Galile, Jésus atene na ala: “Fade a yeke zia *Molenge ti Zo na maboko ti azo

²³titene ala fâ lo, me na lango ota ni, lo yeke zingo na kuâ.” Na peko ti tënë so, vundu agbu be ti adisiple mingi.

²⁴Jésus na adisiple ti lo asi na Kapernaum; azo ti rongo nginza ti lapo ti kota da ti Nzapa aga nduru na Pierre si ala hunda lo, atene: “Zo so ayeke fa ye na ala so ayeke futa lapo ti kota da ti Nzapa pepe?”

²⁵Pierre akiri tënë na ala: “Lo yeke futa ni-aa!” So Pierre aga ali na da, Jésus amu tënë kozoni si lo tene: “Simon, na be ti mo, zo wa laa alingbi ti futa lapo na agbia ti sese? Amolenge ti kodro wala awande?”

²⁶Pierre akiri tënë na lo: “Awande.” Jésus atene na lo: “Tongaso, amolenge ti kodro alingbi ti futa ni pepe.

²⁷Me e ye titene be ti azo so aso na e pepe. Tongaso mo gue kâ na kota ngu, mo bi yango. Tongana mo gboto kozo susu, mo zi yanga ti lo, fade mo yeke wara le ti nginza daa so alingbi titene mo futa na lapo ti mbi, na ti mo kue.”