Read La Bible en Sango courant – Mbeti ti Nzapa Matthieu 18 Bible Online

Matthieu 18 - La Bible en Sango courant – Mbeti ti Nzapa bible

Matthieu 18

¹Gi na ngbonga ni so, adisiple aga nduru na tere ti Jésus si ala hunda lo, atene: “Zo wa laa ayeke kota zo na popo ti azo ti *Kodro-gbia ti yayu?”

²Jésus airi mbeni kete molenge, lo zia lo na popo ti ala

³si lo tene na ala: “Mbi tene na ala taa-tënë: tongana be ti ala akiri aga tongana ti akete molenge pepe, ala yeke li na Kodro-gbia ti yayu pepe.

⁴Kota zo ti Kodro-gbia ti yayu ayeke zo so asara tere ti lo kete si lo ga tongana molenge so.

⁵Zo so ayamba mbeni kete molenge tongana lo so na iri ti mbi, andaa mbi wani laa lo yamba mbi.”

⁶“Zo so asara si oko ti akete molenge so ama na be na mbi ati na ya ti siokpari, ayeke nzoni a kanga kota têne na go ti lo si a bi lo na gbe ti kota ngu-ingo.

⁷So ayeke ye ti mawa mingi na azo ti dunia! Aye mingi ayeke daa so ayeke sara si azo azia lege ti mabe ti ala. Biani, aye ni so ayeke duti ande daa lakue, me mawa na zo so asara si aye ni asi!

⁸Tongana maboko ti mo wala gere ti mo ayeke handa mo titene mo ti na ya ti siokpari, mo fâ ni, mo bi yongoro na tere ti mo. Titene mo li na ndo so zo ayeke duti na fini daa na maboko oko wala na gere oko, so laa ayeke nzoni ahon titene mo bata amaboko ti mo use na agere ti mo use kue si a bi mo na ni na ya ti wâ so ayeke gbi lakue lakue.

⁹Tongana le ti mo ayeke handa mo titene mo ti na ya ti siokpari, mo zi ni, mo bi yongoro na tere ti mo. Titene mo li na ndo so zo ayeke duti na fini daa na le ti mo oko, so laa ayeke nzoni ahon titene mo bata ale ti mo use kue si a bi mo na ni na ndo so wâ ayeke gbi daa lakue.”

¹⁰“Ala sara hange si ala baa mbeni molenge oko na popo ti amolenge so tongana mbumbuse zo pepe! Mbi tene na ala so *a-ange ti amolenge so ayeke kâ na yayu, ala yeke luti lakue na le ti Nzapa, Babâ ti mbi so ayeke na yayu. [

¹¹*Molenge ti Zo aga ti soo azo so agirisa awe.]

¹²“Ti be ti ala, tongana mbeni zo ayeke na ataba ngbangbo oko si mbeni oko agirisa, lo yeke zia atanga ni balegumbaya na gumbaya na li ti hoto ti gue ti gi lo so agirisa so pepe?

¹³Mbi tene na ala taa-tënë: tongana lo wara lo, fade ngia ti be ti lo ndali ti taba oko so ayeke hon ngia so lo yeke na ni ndali ti ataba balegumbaya na gumbaya so agirisa pepe so.

¹⁴Tongaso nga, Babâ ti ala so ayeke na yayu aye titene mbeni oko na popo ti amolenge so agirisa pepe.”

¹⁵“Tongana ita ti mo asara siokpari ti ke mo, mo gue, mo baa lo; mo na lo aduti use si mo fa na lo sioni ti lo. Tongana lo ma mo, andaa mo kiri na ita ti mo na nzoni lege awe.

¹⁶Me tongana lo ke ti ma mo, mo mu zo oko wala azo use na tere ti mo ti kiri ti baa lo, tongaso si ‘na lege ti tënë ti yanga ti azo use wala ota so ahinga tënë ni, ala leke tënë ni nzoni’, tongana ti so Mbeti ti Nzapa atene.

¹⁷Tongana lo ke ti ma ala, mo fa peko ti tënë ni na azo ti *Eglize. Tongana lo ke ti ma azo ti Eglize, mo baa lo tongana zo so ahinga Nzapa pepe, wala tongana zo ti rongo nginza ti lapo.

¹⁸“Mbi tene na ala taa-tënë: ye so kue ala yeke gbanzi lege ni na sese ge, fade Nzapa ayeke gbanzi lege ni na yayu kâ. Ye so kue ala yeke zi lege ni na sese ge, fade Nzapa ayeke zi lege ni na yayu kâ.

¹⁹“Mbi kiri mbi tene na ala: tongana azo use na popo ti ala na sese so ama tere ti hunda mbeni ye na lege ti sambela, ataa nyen, fade Babâ ti mbi so ayeke na yayu ayeke mu ye ni na ala.

²⁰Biani, na ndo so azo use wala ota abongbi daa na iri ti mbi, mbi yeke na popo ti ala.”

²¹Tongaso Pierre ague nduru na tere ti Jésus si lo hunda lo: “*Kota Gbia, tongana ita ti mbi asara sioni na mbi, fade mbi yeke zi tënë ni na li ti lo fani oke? Fani mbarambara?” —

²²Jésus akiri tënë na lo: “Mbi tene na mo ti sara ni gi fani mbarambara pepe, me ti sara ni ngbii asi fani balembarambara lege mbarambara.

²³Ndani laa, tënë ti *Kodro-gbia ti yayu ayeke tongana tënë ti mbeni gbia so aye ti baa lege ti yongo ti lo so ayeke na li ti azo ti kua ti lo.

²⁴So lo to nda ti baa tënë ni, a mu mbeni zo ti kua ti lo aga na lo na lo; nginza ti lo ayeke na li ti zo ti kua ni kutu mingi.

²⁵Koli so ayeke na ye oko ti futango na yongo ti lo ni pepe. Tongaso gbia ni amu yanga titene a ka koli so, lo, wali ti lo, amolenge ti lo na aye so kue lo yeke na ni si a mu nginza ni ti futa na yongo ni.

²⁶Na mango tënë so, zo ti kua so ati na gbe ti gbia, lo kuku na sese, lo voro lo, lo tene: ‘Ku mbi kete, fade mbi yeke futa na mo ye ti mo kue!’

²⁷Tongaso, gbia abaa mawa ti lo si lo zi yongo ni na li ti lo, lo zia lo ti gue.

²⁸Zo ti kua ni asigigi si lo tengbi na mbeni mba ti lo; yongo ti lo ayeke ale ti nginza ngbangbo oko na li ti mba ti lo ni. Lo gbu go ti mba ti lo ni si lo to nda ti pete ni ngangu, lo tene: ‘Futa na mbi yongo ti mbi!’

²⁹Mba ti lo ni ati na gbe ti lo, avoro lo si atene na lo: ‘Ku mbi kete, fade mbi yeke futa na mo yongo ti mo!’

³⁰Me koli so ake. Lo mu lo, lo gue, lo bi lo na da ti kanga titene lo ngba kâ ngbii lo futa yongo ni kue si.

³¹So amba ti lo, azo ti kua abaa ye ni tongaso, ye ni asara ala mawa; ala gue, afa peko ti tënë ni kue na gbia.

³²Tongaso, gbia airi zo ti kua ni so si lo tene na lo: ‘Mo, sioni zo ti kua! Mbi zi yongo so kue ayeke na li ti mo, ngbanga ti so mo voro tere ti mo na mbi mingi.

³³Mbi baa mawa ti mo; mo nga, mo lingbi fade ti baa mawa ti mba ti mo so pepe?’

³⁴Ngonzo agbu gbia ni mingi si lo mu zo ti kua ni na azo titene ala sara pasi na lo ngbii lo futa yongo ti lo ni kue si.”

³⁵Ti hunzi na ni, Jésus atene na ala: “Fade Babâ ti mbi so ayeke na yayu ayeke sara na ala oko oko kue tongaso, tongana ala zi tënë na li ti amba ti ala pepe.”