Read La Bible en Sango courant – Mbeti ti Nzapa Matthieu 20 Bible Online

Matthieu 20 - La Bible en Sango courant – Mbeti ti Nzapa bible

Matthieu 20

¹“Tënë ti *Kodro-gbia ti yayu ayeke tongana tënë ti mbeni wa ti da so asigigi na kota ndaperere ti gi azo, ti mu ala na kua ti yaka ti *vinye ti lo.

²Lo na azo ti kua ni ama tere titene lo futa na ala nginza so a yeke mu na zo ndali ti kua ti lango oko. Na pekoni, lo tokua ala na yaka ti vinye ti lo ni.

³Na ngbonga gumbaya, lo kiri lo sigigi, lo baa ambeni zo so aluti senge senge si ala yeke sara kua pepe.

⁴Lo tene na ala: ‘Ala nga, ala gue, asara kua na yaka ti mbi, fade mbi yeke futa ala alingbi na kua so ala yeke sara.’

⁵Ala mu lege ague na yaka ni. Wa ti yaka ni akiri asigigi na bekombite, lo kiri lo sigigi nga na ngbonga ota ti peko ti bekombite si lo sara gi tongaso.

⁶So lo sigigi na ngbonga oku ti peko ti bekombite, lo baa ambeni zo so aluti senge senge. Lo hunda ala, lo tene: ‘Ngbanga ti nyen si, ti londo na ndaperere ngbii asi na lakui, ala duti senge senge na ndo so si ala yeke sara kua pepe so?’

⁷Ala kiri tënë na lo: ‘E duti senge senge, ngbanga ti so zo ti mungo e na kua ayeke daa pepe.’ Lo tene na ala: ‘Ala nga, ala gue, asara kua na yaka ti vinye ti mbi.’

⁸“So lâ akui awe, wa ti yaka ni atene na zo ti li ti kua ti lo: ‘Mo iri azo ti kua ni kue, mo futa na ala nginza ti ala. Mo to nda ni na azo so mbi iri ala na pekoni si mo hunzi na azo so mbi iri ala kozoni.’

⁹Ala so a mu ala na ngbonga oku ti peko ti bekombite so aga si ala wara futa ti lango oko.

¹⁰Ala so a mu ala kozoni aga; ala baa ti ala atene, ala yeke wara nginza mingi ahon ambeni so; me a mu na ala nga gi nginza ti lango oko.

¹¹So ala wara nginza ni, ala yeke kasa wa ti yaka ni,

¹²ala tene: ‘Azo so amu ala na ndani so asara kua gi na ya ti ngbonga oko, me mo futa ala legeoko na e so e baa pasi na ndaperere ngbii asi na lakui si lâ asu e ngbii so!’

¹³Me wa ti yaka ni akiri tënë na mbeni oko na popo ti ala, atene: ‘Ita, mbi handa mo oko pepe. E na mo, e ma tere fade titene mbi futa mo na nginza ti lango oko pepe?

¹⁴Mu nginza ti mo, mo gue. Mbi ye ti mu na zo so aga na ndani gi wungo ti nginza so mbi mu na mo so.

¹⁵Mbi lingbi ti sara ye so be ti mbi aye na nginza ti mbi pepe? Be ti mo aso, ngbanga ti so mbi yeke zo ti nzoni be?’

¹⁶Ti hunzi na ni, Jésus atene: ‘Fade azo ti ndani ayeke ga azo ti li ni si azo ti li ni ayeke ga azo ti ndani.’ ”

¹⁷So Jésus ayeke gue na Jérusalem, na lege, lo mu adisiple baleoko na use yamba si lo tene na ala:

¹⁸“Ala ma! E yeke gue na Jérusalem. Kâ, fade azo ayeke zia *Molenge ti Zo na maboko ti akota wayango-sandaga na awafango-ndia. Ala yeke fâ ngbanga ti kuâ na li ti lo,

¹⁹ala yeke zia lo na maboko ti azo ti mbeni mara nde titene ala he lo, ala pika lo na fimbo si ala fâ lo na ndö ti keke ti kroa. Na lango ota ni, fade lo yeke zingo na kuâ.”

²⁰Na pekoni, mama ti amolenge ti Zebede aga nduru na tere ti Jésus; lo na amolenge ti lo ti koli laa aga. Lo kuku na gbe ti Jésus ti hunda mbeni ye na lo.

²¹Jésus ahunda lo, atene: “Mo ye nyen?” Lo kiri tënë na Jésus: “Amolenge ti mbi so use so, na lango so mo yeke ga ti duti Gbia, ayeke nzoni mo mu yanga titene ala duti na tere ti mo, mbeni na mbage ti maboko ti mo ti koli si mbeni na mbage ti maboko ti mo ti wali.”

²²Jésus akiri tënë, atene: “Ala hinga ye so ala yeke hunda so pepe. Ala lingbi ti nyon kopo ti pasi so mbi yeke nyon ande so?” Ala tene na lo: “E lingbi ti nyon ni.”

²³Jésus atene na ala: “Biani, fade ala yeke nyon kopo ti mbi ni; me tënë ti dutingo na mbage ti maboko ti mbi ti koli na ti wali, mbi laa mbi yeke mu ni na azo pepe. Ndo ni ayeke ti azo so Babâ ti mbi aleke ni ndali ti ala.”

²⁴So tanga ti adisiple baleoko ama tënë so, be ti ala aso na a-ita use so.

²⁵Jésus airi ala kue na tere ti lo si lo tene na ala: “Ala hinga so, amakonzi ti amara nde ayeke sara komandema na ndö ti amara ni; akota zo ayeke na ngangu na ndö ti azo ti ala.

²⁶Ti ala azo ti mbi, alingbi ye ni aduti tongaso pepe na popo ti ala. Me tongana mbeni zo aye ti ga kota zo na popo ti ala, ayeke nzoni lo ga zo ti sarango kua na ala.

²⁷Tongana mbeni zo na popo ti ala aye ti ga zo ti li ni, ayeke nzoni lo ga ngbaa ti ala.

²⁸Legeoko tongaso, *Molenge ti Zo aga titene azo asara kua na lo pepe, me lo ga titene lo sara kua na azo, ti ka tere ti lo na kuâ ti soo gba ti azo.”

²⁹So Jésus na adisiple ti lo alondo na gbata ti Jéricho si ala yeke sigigi, gba ti azo amu peko ti lo.

³⁰Awaziba use aduti na tere ti lege; ala ma a tene, Jésus laa ayeke hon so. Ala dekongo, atene: “*Kota Gbia, Molenge ti David, baa mawa ti e!”

³¹Gba ti azo ni kue asuku ngangu na ala titene ala kanga yanga ti ala, me ala kiri adekongo ngangu, atene: “Kota Gbia, Molenge ti David, baa mawa ti e!”

³²Jésus aluti, lo iri ala si lo hunda ala, lo tene: “Ala ye mbi sara nyen na ala?”

³³Ala kiri tënë na lo: “Kota Gbia, e ye ti baa ndo.”

³⁴Mawa ti ala agbu Jésus si lo ndu le ti ala. Gi hio tongaso, ala kiri abaa ndo si ala mu peko ti lo.