Read La Bible en Sango courant – Mbeti ti Nzapa Matthieu 26 Bible Online

Matthieu 26 - La Bible en Sango courant – Mbeti ti Nzapa bible

Matthieu 26

¹So Jésus atene tënë so kue awe, lo tene na adisiple ti lo:

²“Ala hinga kue, na ya ti lango use, fade *matanga ti Pake ayeke duti daa. Fade a yeke mu *Molenge ti Zo titene a fâ lo na ndö ti keke ti kroa.”

³Tongaso akota wayango-sandaga na *akangba ti azuife abongbi tere na ya ti gbagba ti kota wayango-sandaga so iri ti lo Kaife.

⁴Ala leke tënë ti gbu Jésus na lege ti mbeni mayere titene ala fâ lo.

⁵Me ala tene: “Alingbi e gbu lo na lango ti matanga pepe, ngbanga ti azo atomboka.”

⁶So Jésus ayeke na Betanii, na ya ti da ti Simon, zo ti buruma,

⁷mbeni wali aga nduru na tere ti lo na mbeni ngbenda ti yombo so ngere ni ayeke ngangu mingi; a sara ngbenda ni na mbeni têne so iri ni albatre. Lo tuku yombo ni na li ti Jésus, na ndembe so Jésus ayeke te kobe.

⁸So adisiple abaa ye ni tongaso, be ti ala aso si ala tene: “Ngbanga ti nyen si lo yeke buba yombo so tongaso?

⁹A lingbi fade ti ka ni na ngangu ngere si amu nginza ni na azo ti mawa pepe?”

¹⁰Jésus ahinga tënë so adisiple ni ayeke tene si lo tene: “Ngbanga ti nyen si ala yeke so li ti wali so tongaso? Ye so lo sara na mbi so ayeke ye ti nzoni.

¹¹Biani, azo ti mawa ayeke duti lakue na popo ti ala, me ti mbi, mbi yeke duti lakue na popo ti ala pepe.

¹²Lo tuku yombo so na tere ti mbi ti leke mbi ti ku na ndembe so a yeke lu ande kuâ ti mbi.

¹³Mbi tene na ala taa-tënë: na ndo so kue a yeke fa ande Nzoni Tënë so daa, na ndö ti dunia kue, azo ayeke fa tënë ti ye so wali so asara si azo ayeke dabe ti ala na lo.”

¹⁴Tongaso, mbeni disiple oko na popo ti adisiple baleoko na use, so iri ti lo Judas Iskariote ague na ndo ti akota wayango-sandaga;

¹⁵lo tene na ala: “Tongana mbi ka Jésus na ala, fade ala yeke mu na mbi nyen?” Akota wayango-sandaga ni adiko ale ti nginza baleota si ala mu na lo.

¹⁶Ti londo na ndembe ni so, Judas ato nda ti gi nzoni lege ti ka Jésus na ala.

¹⁷Na kozo lango ti matanga ti Mapa so a sara na mama ni pepe, adisiple aga na tere ti Jésus si ala hunda lo, atene: “Mo ye e leke na mo kobe ti *Pake na ndo wa?”

¹⁸Jésus atene na ala: “Ala gue na ya ti gbata ni na ndo ti pakara tongaso; ala tene na lo: ‘Wafango-ye atene: Ngbonga ti mbi aga nduru awe; mbi na adisiple ti mbi, e yeke sara ande matanga ti Pake na ndo ti mo.’ ”

¹⁹Adisiple asara ye ni gi tongana ti so Jésus amu yanga na ala si ala leke kobe ti Pake ni.

²⁰Na lakui ni, Jésus na adisiple baleoko na use aduti ti te kobe.

²¹So ala yeke te kobe ni, Jésus atene na ala: “Mbi tene na ala taa-tënë: mbeni oko na popo ti ala ayeke ka mbi.”

²²Vundu agbu be ti adisiple mingi si ala oko oko ato nda ti hunda lo, atene: “*Kota Gbia, ayeke mbi?”

²³Jésus akiri tënë na ala: “Zo so mbi na lo, e yeke yoro maboko oko na ya ti sembe, lo laa lo yeke ka mbi.

²⁴Fade *Molenge ti Zo ayeke kui gi tongana ti so Mbeti ti Nzapa atene tënë ni na ndö ti lo; me mawa na zo so ayeke ka ande Molenge ti Zo ni so! Ti zo ni so, tongana a du lo fade pepe, ka ayeke nzoni mingi!”

²⁵Judas, zo ti kango Jésus amu tënë si lo tene: “Wafango-ye, ayeke mbi?” Jésus akiri tënë na lo, atene: “Tënë ni laa mo tene awe so.”

²⁶So ala yeke te kobe, Jésus amu mapa, lo mu singila na Nzapa; na pekoni lo fâ ya ni, lo mu na adisiple si lo tene: “Ala mu ni ate, so ayeke tere ti mbi.”

²⁷Na pekoni, lo mu kopo ti vin, lo mu singila na Nzapa si lo mu ni na ala, lo tene: “Ala kue anyon ni,

²⁸ngbanga ti so ayeke mene ti mbi, mene so abongbi azo na Nzapa na ya ti *mbuki; mene so atuku ndali ti gba ti azo titene azi siokpari ti ala.

²⁹Mbi tene na ala: fade mbi yeke kiri ti nyon ngu ti le ti *vinye pepe, ngbii asi na lango so fade mbi na ala, e yeke nyon fini vin na ya ti *Kodro-gbia ti Nzapa, Babâ ti mbi.”

³⁰Na peko ti so ala he bia ti gondango Nzapa awe, ala mu lege ti gue na hoto ti a-olive.

³¹Tongaso, Jésus atene na adisiple ti lo: “Gi na bi so, fade ala kue ayeke zia mbi ti hon, ngbanga ti so Mbeti ti Nzapa atene: ‘Fade mbi yeke fâ wabatango-taba si ataba ni ayeke kangbi kirikiri.’

³²Me tongana mbi zingo ande na kuâ, mbi yeke hon kozo ti ala na Galile.”

³³Pierre atene na lo: “Tongana azo kue azia mo ahon, fade mbi yeke zia mo oko pepe.”

³⁴Jésus akiri tënë na lo: “Mbi tene na mo taa-tënë: gi na bi so, kozo titene koli-kondo atoto, fade mo yeke bere tënë ti mbi fani ota.”

³⁵Pierre atene na lo: “Tongana ayeke titene mbi na mo, e kui, mbi yeke bere tënë ti mo oko pepe!” Adisiple ni kue atene gi oko tënë so.

³⁶Jésus na adisiple ti lo asi na mbeni ndo so iri ni Getsemane si lo tene na ala: “Ala duti na ndo so, mbi yeke gue kâ ti sambela.”

³⁷Lo mu Pierre na amolenge ti Zebede use na tere ti lo si lo na ala ague. Vundu ato nda ti gbu lo si mbeto asara lo ahon ndoni.

³⁸Tongaso lo tene na ala: “Be ti mbi ayeke na vundu mingi, mo baa mo tene, mbi ye ti kui kuingo; ala ngba na ndo so, mbi na ala, e lango pepe!”

³⁹Lo hon yongoro kete, lo ti, lo kpo li ti lo na sese, lo sambela, lo tene: “Babâ ti mbi, tongana lege ayeke daa, ayeke nzoni kopo ti pasi so ahon yongoro na tere ti mbi. Me mbi ye pepe titene mo sara ye so be ti mbi aye, me mo sara gi ye so be ti mo aye.”

⁴⁰Na pekoni, lo kiri lo ga na mbage ti adisiple si lo wara ala na lango. Lo tene na Pierre: “Ala lingbi ti ngba na le ti ala tongaso ndali ti mbi na ya ti ngbonga oko pepe?

⁴¹Ala lango pepe! Ala sambela si ala ti na ya ti ye ti tarango be pepe. Yingo ti zo ayeke na nzara ti sarango nzoni ye, me zo ni ayeke na ngangu pepe.”

⁴²Lo kiri lo gue yongoro ti fani use ni si lo sambela, lo tene: “Babâ ti mbi, tongana kopo so alingbi ti hon yongoro na tere ti mbi pepe si mo ye mbi nyon ni, ayeke nzoni mo sara gi ye so be ti mo aye!”

⁴³Lo kiri lo ga na mbage ti adisiple ni si lo wara ala na lango, ngbanga ti so lango ahon ndö ti ala.

⁴⁴Jésus azia ala, lo kiri lo gue yongoro si lo sambela ti fani ota ni, lo tene gi oko tënë so lo tene kozoni so.

⁴⁵Lo kiri lo ga na mbage ti adisiple si lo tene na ala: “Ala ngba ti lango? Ala ngba ti wu tere ti ala? Ngbonga ni aga nduru awe; a yeke mu *Molenge ti Zo ti zia lo na maboko ti azo ti siokpari.

⁴⁶Ala londo e gue! Baa, zo ti kango mbi asi awe!”

⁴⁷So Jésus angba ti tene tënë, Judas, mbeni oko ti adisiple baleoko na use asi; lo ga na azo gbani gbani na tere ti lo. Azo ni kue amu ayongoro zeme na akeke na maboko ti ala. Akota wayango-sandaga na *akangba ti azuife laa atokua ala.

⁴⁸Judas, zo ti kango Jésus, afa na azo ni ye so fade lo yeke sara; lo tene: “Zo so mbi yeke su ande ngbangba ti lo, andaa lo laa. Ala gbu lo.”

⁴⁹Gi hio tongaso, Judas aga nduru na tere ti Jésus si lo tene na lo: “Wafango-ye, mbi bara mo!” Na pekoni, lo su ngbangba ti lo.

⁵⁰Jésus atene na lo: “Ita, mo sara ye so mo ga ngbanga ni so!” Azo so amu peko ti Judas aga, ala zia maboko na ndö ti Jésus si ala gbu lo.

⁵¹Mbeni disiple oko ti Jésus agboto yongoro zeme ti lo, lo de mbeni zo ti kua ti kota wayango-sandaga si lo fâ mê ti lo.

⁵²Jésus atene na lo: “Kiri yongoro zeme ti mo na plase ni, ngbanga ti so azo so kue afâ zo na yongoro zeme, fade ala yeke kui kuâ ti yongoro zeme.

⁵³Mo baa mo tene, mbi lingbi ti hunda na Babâ ti mbi ti mu na mbi maboko pepe? Lo lingbi ti tokua na mbi fafadeso *a-ange so wungo ti ala ahon wungo ti aturugu na ya ti akota bongbi baleoko na use.

⁵⁴Tongana mbi iri a-ange ni, fade tënë ti Mbeti ti Nzapa ayeke ga taa-tënë tongana nyen? Mbeti ti Nzapa atene, fade ye ni ayeke duti tongaso.”

⁵⁵Na pekoni, Jésus atene na gba ti azo ni, atene: “Ala ga na ayongoro zeme na akeke ti gbu mbi, mo baa mo tene, mbi yeke zo ti nzi! Lakue mbi yeke duti na ya ti kota da ti Nzapa ti fa ye, me ala gbu mbi pepe!

⁵⁶Me ye so kue asi tongaso si tënë ti yanga ti awayanga-Nzapa so a su na mbeti ando so aga taa-tënë.” Tongaso adisiple kue azia lo si ala kpe ahon.

⁵⁷Azo so agbu Jésus so ague na lo na Kaife, kota wayango-sandaga. Andaa awafango-ndia na *akangba abongbi tere ti ala kâ awe.

⁵⁸Pierre ague na peko ti Jésus, me lo yeke gue nduru nduru pepe; lo gue ngbii lo si na ya ti gbagba ti kota wayango-sandaga. Lo li si lo na azo ti kua ayeke duti na sese na ndo oko, lo yeke ku ti baa wala ye ni ayeke hunzi ande tongana nyen.

⁵⁹Akota wayango-sandaga na azo kue ti *Kota Bongbi ti Fango Ngbanga ayeke gi lege ti wara mbeni tënë ti mvene ti bi na li ti Jésus, ti fâ ngbanga ti kuâ na li ti lo;

⁶⁰me ala wara ni pepe, ataa so azo mingi aga na atënë ti mvene ti bi na li ti lo. Ti hunzi na ni, ambeni koli use aga aluti

⁶¹si ala tene: “Koli so atene lani, atene: ‘Mbi lingbi ti kungbi kota da ti Nzapa si mbi yeke kiri ti leke ni na ya ti lango ota.’ ”

⁶²Kota wayango-sandaga alondo si lo tene na Jésus: “Mo yeke na tënë ti kiri na ni pepe? Tënë ti nyen laa azo so ayeke tene na iri ti mo so?”

⁶³Me Jésus azi yanga oko pepe. Kota wayango-sandaga atene na lo: “Mbi hunda na mo ti deba yanga ti mo, na iri ti Nzapa so ayeke na fini, mo tene na e: Mo yeke *Mesii, Molenge ti Nzapa?”

⁶⁴Jésus akiri tënë na lo: “Gi tënë ni laa mo tene awe so. Me mbi tene na ala so fade ala yeke baa *Molenge ti Zo aduti na tere ti Nzapa so ngangu ti lo ahon angangu kue; lo yeke duti na mbage ti maboko ti lo ti koli. Lo yeke londo na yayu, lo duti na ndö ti ambinda ti ga.”

⁶⁵Tongaso kota wayango-sandaga ni asuru ya ti bongo ti lo si lo tene: “Lo zonga Nzapa awe! E ye ti kiri ti hunda mbeni zo na tënë ngbanga ti nyen? Ala ma zonga so lo zonga na Nzapa so awe!

⁶⁶Ti be ti ala, ala tene nyen?” Azo ni akiri tënë na lo: “Lo lingbi na kuâ!”

⁶⁷Na pekoni, ala tuku ngu ti yanga ti ala na le ti lo si ala kpo lo na gobo, ambeni apika ngbangba ti lo,

⁶⁸ala tene: “Mo so mo yeke *Mesii so, sara tongana wayanga-Nzapa: fa na e, zo wa laa apika mo?”

⁶⁹Pierre ayeke duti na gigi na ya ti gbagba ni. Mbeni wali so ayeke sara kua kâ aga nduru na tere ti lo si atene na lo: “Mo nga, mo yeke mu peko ti Jésus, zo ti Galile so!”

⁷⁰Me Pierre abere na le ti azo kue, lo tene: “Mbi hinga tënë so mo ye ti tene so pepe!”

⁷¹So Pierre amu lege ti gue na yanga ti gbagba, mbeni wali nde so ayeke sara kua kâ abaa lo si atene na azo so ayeke kâ, atene: “Koli so ayeke mu nga peko ti Jésus, zo ti Nazaret!”

⁷²Pierre akiri abere; lo deba yanga ti lo, lo tene: “Mbi hinga koli so oko pepe!”

⁷³Kete na pekoni, azo so ayeke kâ aga nduru na Pierre si ala tene na lo: “Taa-tënë, mo nga, mo yeke mbeni zo ti Jésus! Sarango tënë ti mo aka mo awe.”

⁷⁴Pierre ato nda ti deba yanga ti lo, atene: “Ayeke nzoni Nzapa afâ ngbanga na li ti mbi tongana mbi tene mvene! Mbi hinga koli so oko pepe!” Gi na pekoni, koli-kondo atoto.

⁷⁵Pierre adabe ti lo na tënë so Jésus atene lani na lo, atene: “Kozo titene koli-kondo atoto, fade mo yeke bere tënë ti mbi fani ota.” Lo sigigi si lo toto ngangu mingi.