Read La Bible en Sango courant – Mbeti ti Nzapa Matthieu 4 Bible Online

Matthieu 4 - La Bible en Sango courant – Mbeti ti Nzapa bible

Matthieu 4

¹Na pekoni, Yingo ague na Jésus na benyama titene Zabolo atara be ti lo.

²Na ya ti lango baleosio na bi baleosio, lo ke kobe si na pekoni nzara asara lo.

³Zabolo aga nduru na tere ti lo si atene na lo: “Tongana mo yeke Molenge ti Nzapa, mo mu yanga na atêne so titene aga kobe!”

⁴Jésus akiri tënë na lo: “Mbeti ti Nzapa atene: ‘Fade zo ayeke ngba na fini gi na lege ti kobe oko pepe, me na lege ti tënë so kue asigigi na yanga ti Nzapa.’ ”

⁵Na pekoni, Zabolo ague na lo na Jérusalem, gbata so ayeke nde si ayeke nzoni kue; lo zia lo na li ti kota da ti Nzapa

⁶si lo tene na lo: “Tongana mo yeke Molenge ti Nzapa, mo londo na li ti da so, mo ti na sese, ngbanga ti so Mbeti ti Nzapa atene: ‘Fade Nzapa ayeke mu yanga na *a-ange ti lo ndali ti mo; ala yeke yo mo na maboko ti ala si mo pika gere ti mo na mbeni têne pepe.’ ”

⁷Jésus akiri tënë na lo: “Mbeti ti Nzapa atene nga, atene: ‘Mo tara be ti *Kota Gbia, Nzapa ti mo pepe.’ ”

⁸Zabolo akiri ague na lo na li ti mbeni kota hoto, lo fa na lo akodro kue ti dunia na apendere ye ti ya ni

⁹si lo tene na lo: “Tongana mo kuku na gbe ti mbi si mo voro mbi, fade mbi yeke mu aye so kue na mo.”

¹⁰Jésus atene na lo: “Hon kâ, Satan! Mbeti ti Nzapa atene: ‘Mo voro Kota Gbia, Nzapa ti mo si mo sara kua gi na lo oko!’ ”

¹¹Tongaso Zabolo azia Jésus si a-ange aga na tere ti lo, asara na lo.

¹²So Jésus ama a tene, a gbu Jean si a zia lo na da ti kanga awe, lo gboto tere ti lo si lo gue na Galile.

¹³Lo zia gbata ti Nazaret si lo gue, lo duti na gbata ti Kapernaum, so ayeke na tere ti kota ngu ti Galile, na sese ti Zabulon na ti Neftali.

¹⁴Lo sara tongaso titene tënë ti wayanga-Nzapa Ésaïe so aga taa-tënë:

¹⁵“Sese ti Zabulon na ti Neftali, so ayeke na lege ti guengo na kota ngu-ingo, na mbage ti ngu ti Jourdain laa ayeke Galile ti amara nde!

¹⁶Azo so aduti na ya ti vukongo ndo abaa kota lumiere! Ndo ahan na ndö ti azo so aduti ando na ya ti vukongo ndo, na kodro ti akuâ.”

¹⁷Gi na ndembe ni so, Jésus ato nda ti fa tënë, lo tene: “Ala zia ngbene lege ti sarango ye ti ala, ngbanga ti so *Kodro-gbia ti yayu aga nduru awe!”

¹⁸So Jésus ayeke tambula na yanga ti kota ngu ti Galile, lo baa a-ita use so ayeke azo ti gingo susu: Simon so mbeni iri ti lo ayeke Pierre, lo na ita ti lo André; ala yeke bi gbanda ti ala na ya ti kota ngu ni ti gi na asusu.

¹⁹Jésus atene na ala: “Ala ga na peko ti mbi, fade mbi yeke sara si ala ga azo ti gingo azo.”

²⁰Gi hio tongaso, ala zia agbanda ti ala si ala mu peko ti lo.

²¹Jésus ahon gi kete, lo baa ambeni ita use: Jacques na ita ti lo Jean, amolenge ti Zebede; ala na babâ ti ala ayeke na ya ti ngo si ala yeke leke agbanda ti ala. Jésus airi ala.

²²Gi hio tongaso, ala zia ngo ti ala na babâ ti ala kue si ala mu peko ti Jésus.

²³Jésus atambula na ya ti Galile kue; lo fa ye na azo na ya ti ada ti sambelango Nzapa ti kodro ni, lo fa Nzoni Tënë ti *Kodro-gbia ti yayu, lo kai akobela kue na tere ti azo, lo sara si azo so mbage ti tere ti ala abuba, aga nzoni.

²⁴Sango ti Jésus amu ya ti sese ti Sirii kue. Nilaa azo aga na lo azo so tere ti ala aso, ala so ayeke na akobela nde nde si ala yeke na siriri pepe: ala so ayeke na asioni yingo, ala so ayeke na kobela ti makako nga na ala so mbage ti tere ti ala abuba. Jésus akai kobela na tere ti ala kue.

²⁵Gba ti azo amu peko ti Jésus; ambeni alondo na Galile, ambeni alondo na ya ti Agbata-Baleoko, ambeni alondo na Jérusalem, na Judée nga na kodro so ayeke na mbage ti ngu ti Jourdain si aga.