Read La Bible en Sango courant – Mbeti ti Nzapa Matthieu 5 Bible Online

Matthieu 5 - La Bible en Sango courant – Mbeti ti Nzapa bible

Matthieu 5

¹So Jésus abaa gba ti azo so, lo gue na li ti hoto, lo duti; adisiple ti lo abongbi na tere ti lo

²si lo to nda ti fango ye na ala, lo tene:

³“Ti ala nzoni, ala so ahinga atene, ye ti yingo atia ala, ngbanga ti so *Kodro-gbia ti yayu ayeke ti ala!

⁴Ti ala nzoni, ala so ayeke na vundu, ngbanga ti so Nzapa ayeke zi ande vundu ti ala!

⁵Ti ala nzoni, ala so ayeke sara ngangu na azo pepe, ngbanga ti so ala yeke ga ande awa ti sese so Nzapa aleke ndali ti ala!

⁶Ti ala nzoni, ala so nzara ti sarango ye ti mbirimbiri ayeke sara ala tongana ti so nzara ti kobe na ti ngu ayeke sara zo, ngbanga ti so Nzapa ayeke mu ande na ala ye so be ti ala aye!

⁷Ti ala nzoni, ala so ayeke baa mawa ti amba ti ala, ngbanga ti so Nzapa ayeke baa ande mawa ti ala!

⁸Ti ala nzoni, ala so ayeke na vuru be, ngbanga ti so ala yeke baa ande Nzapa!

⁹Ti ala nzoni, ala so asara si siriri aduti na popo ti azo, ngbanga ti so Nzapa ayeke iri ande ala atene, ala yeke amolenge ti ni!

¹⁰Ti ala nzoni, ala so a yeke sara ngangu na ala ndali ti sarango ye ti mbirimbiri, ngbanga ti so Kodro-gbia ti yayu ayeke ti ala!

¹¹Ti ala nzoni, ala so azo ayeke zonga ala, ayeke sara ngangu na ala si ayeke tene amara ti asioni tënë ti mvene nde nde na iri ti ala ndali ti mbi!

¹²Ayeke nzoni be ti ala anzere, ala duti na ngia, ngbanga ti so futa ti ala ayeke ande kota na yayu. Biani, gi tongaso laa azo asara ando ngangu na awayanga-Nzapa so ayeke kozoni na ala.”

¹³“Ala laa ayeke ingo ti sese so. Me tongana nzerengo ti ingo ahon awe, fade zo ayeke sara tongana nyen ti kiri na ni daa? Mbeni ye ti sara na ni ayeke daa pepe; alingbi gi titene a tuku ni na gigi si azo ado ni na gere ti ala.

¹⁴“Ala laa ayeke lumiere ti dunia so. Gbata so a sara ni na li ti hoto alingbi ti honde tere ti lo pepe.

¹⁵Zo ayeke zia wâ na ya ti lamba ti zia ni na gbe ti ta pepe. Me lo yeke zia ni na ndö ti mbeni ye na nduzu titene aza si azo ti ya ti da ni kue abaa ndo na ni.

¹⁶Legeoko nga, alingbi lumiere ti ala aza na dawa ti azo kue. Tongaso, fade azo ni ayeke baa anzoni sarango ye ti ala si ala yeke gonda Babâ ti ala, azo ti mbi, so ayeke na yayu.

¹⁷“Ala baa ti ala pepe atene, mbi ga ti mingo *Ndia ti Moïse wala tënë ti awayanga-Nzapa. Mbi ga ti mingo ye oko pepe, me ti sara si mbirimbiri nda ti atënë ni aduti daa.

¹⁸Mbi tene na ala taa-tënë: kozoni si yayu na sese ahon, fade gere ti mbeti ti Ndia wala mbeni kete ye ti tere ni oko ayeke hon pepe, ngbii asi na nda ti aye kue.

¹⁹Ndani laa, zo so ake mbeni kete kete mbage ti Ndia si lo fa lege ti kengo ni na ambeni zo, fade lo yeke duti ndangba zo na ya ti *Kodro-gbia ti yayu. Me zo so asara ye alingbi na atënë ni si lo fa lege na amba ti lo ti sara ye alingbi na ni, fade lo yeke duti kota zo na ya ti Kodro-gbia ti yayu.

²⁰Mbi tene na ala: tongana ala sara ye ti mbirimbiri ahon ti awafango-ndia na ti *afarizien pepe, fade ala yeke li na ya ti Kodro-gbia ti yayu pepe.”

²¹“Ala ma tënë so a tene ando na akotara, atene: ‘Alingbi mo fâ zo pepe. Zo so afâ zo, fade a yeke gue na lo na ngbanga.’

²²Ti mbi, mbi tene na ala: zo so asara ngonzo na tere ti ita ti lo, fade a yeke gue na lo na ngbanga; zo so atene na ita ti lo: ‘Buba zo!’, fade a yeke gue na lo na gbe ti azo ti *Kota Bongbi ti Fango Ngbanga; zo so atene na ita ti lo: ‘Mo, zo ti gbogbolinda so!’, lo lingbi titene a bi lo na ndo so wâ ayeke gbi daa lakue.

²³Tongana mo yeke leke tere ti mo ti mu *sandaga na ndö ti gbalaka na Nzapa si be ti mo ati na ndö ti mbeni ita ti mo so tënë ayeke na popo ti mo na lo,

²⁴ayeke nzoni mo zia sandaga ti mo na tere ti gbalaka ni, mo gue, mo na lo, ala leke tënë na popo ti ala si. Na pekoni, mo ga, mo mu sandaga ni na Nzapa.

²⁵“Tongana zo so mo na lo awara tënë amu mo ti gue na mo na ngbanga, so ala ngba na lege ti gue, mo gi lege ti leke tënë ni hio, ngbanga ti lo mu mo na wafango-ngbanga si wafango-ngbanga ni azia mo na maboko ti aturugu titene ala bi mo na da ti kanga.

²⁶Mbi tene na mo taa-tënë: tongana a diko nginza na li ti mo si mo futa ni kue pepe, fade mo yeke sigigi na da ti kanga ni pepe.”

²⁷“Ala ma tënë so a tene ando, atene: ‘Mo gi wali ti zo wala koli ti zo pepe.’

²⁸Ti mbi, mbi tene na ala: zo so abaa wali ti mba ti lo si asara nzara ti wali ni, andaa na be ti lo, lo gi wali ni awe.

²⁹Tongana le ti mo ti mbage ti koli ayeke handa mo titene mo ti na ya ti siokpari, mo zi ni, mo bi yongoro na tere ti mo. Titene mo girisa mbeni mbage ti tere ti mo oko, so laa ayeke nzoni ahon titene a bi tere ti mo kue na ndo so wâ ayeke gbi daa lakue.

³⁰Tongana maboko ti mo ti koli ayeke handa mo titene mo ti na ya ti siokpari, mo fâ ni, mo bi yongoro na tere ti mo. Titene mo girisa mbeni mbage ti tere ti mo oko, so laa ayeke nzoni ahon titene tere ti mo kue ague na ndo so wâ ayeke gbi daa lakue.”

³¹“Ala ma nga tënë so a tene ando, atene: ‘Koli so atumba wali ti lo, alingbi lo mu na lo mbeti ti kangbingo tere.’

³²Ti mbi, mbi tene na ala: koli so atumba wali ti lo, ataa so wali ni agi mbeni koli nde pepe, andaa lo laa lo pusu wali ni ti gi koli. Koli so amu wali so mbeni koli atumba lo, andaa lo gi wali ti zo awe.”

³³“Ala ma nga tënë so a tene ando na akotara, atene: ‘Mo deba yanga ti mo senge senge pepe. Me ye so mo deba yanga ti mo ti sara ni na *Kota Gbia ti mo, alingbi mo sara ni.’

³⁴Ti mbi, mbi tene na ala: ala deba yanga ti ala oko pepe. Ala deba na iri ti yayu pepe, ngbanga ti so yayu ayeke mbata ti Gbia Nzapa.

³⁵Ala deba na iri ti sese pepe, ngbanga ti so sese ayeke mbata so Nzapa ayeke zia gere ti lo na ndö ni. Ala deba nga na iri ti Jérusalem pepe, ngbanga ti so Jérusalem ayeke Gbata ti kota Gbia.

³⁶Mo deba na iri ti mo wani pepe, ngbanga ti so mo lingbi ti sara si mbeni kua ti li ti mo oko avuru wala avuko pepe.

³⁷Tongana ala yeke tene tënë, ala tene gi tënë oko: ‘Een, tënë ni laa’, wala ‘Ên-en, tënë ni laa pepe’. Tënë so kue ala zia na ndö ni alondo na Sioni wato.”

³⁸“Ala ma tënë so a tene ando, atene: ‘Tongana zo akoro le ti mba ti lo, alingbi a koro nga le ti lo. Tongana zo afâ pembe ti mba ti lo, alingbi a fâ nga pembe ti lo.’

³⁹Ti mbi, mbi tene na ala: zo so asara sioni na ala, ala kiri na peko ti sioni ni na lo pepe. Tongana mbeni zo apika ngbangba ti mo ti mbage ti koli, yoro na lo mbeni mbage ni lo pika.

⁴⁰Tongana mbeni zo aye ti gue na mo na ngbanga titene lo mu nduzu bongo ti mo, zia nga na lo kota bongo ti mo ti de.

⁴¹Tongana mbeni zo agbu mo na ngangu ti yo kungba ti lo ti tambula na ni kilometere oko, yo ni mo tambula na ni na lo kilometere use.

⁴²Tongana mbeni zo ahunda ye na mo, mu ni na lo. Tongana mbeni zo ahunda yongo na mo, gbanzi lo na ni pepe.”

⁴³“Ala ma tënë so a tene ando, atene: ‘Mo ye zo so aye mo si mo ke wato ti mo.’

⁴⁴Ti mbi, mbi tene na ala: ala ye awato ti ala! Ala sambela ndali ti azo so ayeke sara ngangu na ala!

⁴⁵Tongaso si ala lingbi ti ga amolenge ti Babâ ti ala so ayeke na yayu. Babâ ti ala ni ayeke sara si lâ ti lo asu na ndö ti anzoni zo nga na ndö ti asioni zo kue. Lo yeke tokua ngu-Nzapa na ndö ti azo ti mbirimbiri nga na ndö ti azo ti kirikiri.

⁴⁶Tongana ala ye gi azo so aye ala, nzoni ye ti nyen laa ala yeke wara na pekoni? Azo ti rongo nginza ti lapo ayeke sara nga gi tongaso pepe?

⁴⁷Tongana ala yeke bara gi a-ita ti ala, ye so ala sara ahon tanga ti azo na ni ayeke nyen? Azo so ahinga Nzapa pepe ayeke sara nga tongaso pepe?

⁴⁸Alingbi ala ga azo so ayeke nzoni kue tongana ti so Babâ ti ala so ayeke na yayu ayeke nzoni kue.