Read La Bible en Sango courant – Mbeti ti Nzapa Matthieu 7 Bible Online

Matthieu 7 - La Bible en Sango courant – Mbeti ti Nzapa bible

Matthieu 7

¹“Ala fâ ngbanga na li ti azo pepe si Nzapa afâ nga ngbanga na li ti ala pepe.

²Biani, Nzapa ayeke fâ ande ngbanga na li ti ala gi tongana ti so ala yeke fâ ngbanga na li ti azo. Ye so ala mu ti haka na ye na azo, ni laa Nzapa ayeke mu ni ti haka na ye na ala.

³Ngbanga ti nyen si mo yeke baa gi kete pere so ayeke na le ti ita ti mo si mo yeke baa kota keke so ayeke na le ti mo so pepe?

⁴Tongana na nyen si mo lingbi ti tene na ita ti mo, mo tene: ‘Zia mbi zi pere so ayeke na le ti mo’ si kota keke so ayeke na le ti mo so mo yeke baa ni pepe?

⁵Mo so tënë ti yanga ti mo ayeke nde na sarango ye ti mo so, ayeke nzoni mo zi kota keke so ayeke na le ti mo so kozoni si. Na pekoni mo baa ndo nzoni ti zi pere so ayeke na le ti ita ti mo!

⁶“Ye so a zia ni nde ndali ti Nzapa, ala bi ni na ambo pepe, ngbanga ti fade ambo ni ayeke kiri na tere ti ala ti te ala. Ala tuku alenge ti ala na anguru pepe, ngbanga ti fade anguru ni ayeke do ni na gere ti ala.”

⁷“Ala hunda ye si fade a mu na ala; ala gi ye si fade ala wara; ala pika yanga ti da si fade a zi na ala.

⁸Zo so ahunda ye, fade a yeke mu na lo; zo so agi ye, fade lo yeke wara; zo so apika yanga ti da, fade a yeke zi na lo.

⁹Zo wa na popo ti ala si ayeke mu têne na molenge ti lo tongana molenge ni ahunda na lo kobe?

¹⁰Wala tongana molenge ni ahunda na lo susu, fade lo mu na lo ngbo?

¹¹Ala so ayeke asioni zo, ala hinga ti mu anzoni ye na amolenge ti ala. Babâ ti ala so ayeke na yayu alingbi biani ti mu anzoni ye na azo so ahunda ni na lo!

¹²“Ye so kue ala ye titene azo asara na ala, ala wani asara nga ye ni na azo. So ayeke kota tënë ti ya ti *Ndia ti Moïse na ti ambeti ti awayanga-Nzapa.”

¹³“Ala li na kete yanga ti da! Biani, zo so ali na kota yanga ti da, andaa lo mu lege ti kuâ. Lege ti kuâ ayeke kota si azo mingi ayeke mu ni.

¹⁴Yanga ti da so zo alingbi ti li daa si lo ngba na fini ayeke kete, lege ni ayeke kete; azo ti warango lege ni so ayeke mingi pepe.”

¹⁵“Ala sara hange na awayanga-Nzapa ti mvene! Awayanga-Nzapa ni ayeke yu poro ti tere ti taba si ayeke ga na popo ti ala. Andaa ala yeke taa asioni mbo ti ngonda.

¹⁶Ala yeke hinga ande azo ni so na lege ti sarango ye ti ala. Zo ayeke ko ale ti *vinye na tere ti akamba ti ki pepe, wala zo ayeke ko nga afige na tere ti akeke ti ki pepe.

¹⁷Keke so ayeke nzoni ayeke le nzoni lengo ni; keke so abuba ayeke le sioni lengo ni.

¹⁸Keke so ayeke nzoni alingbi pepe ti le sioni lengo ni; keke so abuba alingbi pepe ti le nzoni lengo ni.

¹⁹Keke so kue ale nzoni pepe, fade a yeke de ni si a tuku ni na le ti wâ.

²⁰Tongaso, ala yeke hinga ande awayanga-Nzapa ti mvene na lege ti asarango ye ti ala.”

²¹“Azo so kue ayeke iri mbi, atene: ‘*Kota Gbia, Kota Gbia’, ala kue laa ayeke li ande na ya ti *Kodro-gbia ti yayu pepe; me gi ala so asara ye so be ti Babâ ti mbi so ayeke na yayu aye.

²²Na lango ti fango ngbanga, fade azo mingi ayeke tene na mbi: ‘Kota Gbia, Kota Gbia, e tene peko ti tënë ti yanga ti mo, e tumba asioni yingo si e sara aye ti kpene mingi na iri ti mo pepe?’

²³Fade mbi yeke tene na ala: ‘Mbi hinga ala oko pepe. Ala hon yongoro na tere ti mbi, ala azo ti sarango sioni!’ ”

²⁴“Tongaso, zo so kue ama atënë so mbi tene si asara ye alingbi na ni, lo yeke tongana koli so ayeke na ndara si asara da ti lo na ndö ti kota têne.

²⁵Ngu-Nzapa apika, ngu asuku amu ndo kue, pupu aya ngangu na ndö ti da ni, me da ni akungbi pepe, ngbanga ti so gere ni ayeke na ndö ti kota têne.

²⁶Me zo so kue ama atënë so mbi tene si asara ye alingbi na ni pepe, lo yeke tongana buba koli so asara da ti lo na ndö ti mbutu.

²⁷Ngu-Nzapa apika, ngu asuku amu ndo kue, pupu aya ngangu na ndö ti da ni si da ni akungbi ati gburrr!”

²⁸So Jésus atene tënë so awe, li ti azo so abongbi kâ akpe ndali ti fango ye ti lo.

²⁹Biani, lo fa ye ni tongana awafango-ndia ti azuife pepe, me lo fa ni tongana zo ti komandema.